Naʻe akoʻi ʻe Sīsū ko e Puleʻanga ʻo e ʻOtuá te ne fakaleleiʻi ʻa e ngaahi palopalema kotoa ʻa e faʻahinga ʻo e tangatá. (Mātiu 6:10) ʻI he Mātiu 13:44-46, naʻá ne fai ai ʻa e talanoa fakatātā ʻe ua hokó ke fakahaaʻi ʻaki ʻa e mahuʻinga ʻo e moʻoni fekauʻaki mo e Puleʻanga ʻo e ʻOtuá:

•   Ko ha tangata naʻá ne ngāue ʻi ha ngoue pea naʻe taʻeʻamanekina ʻene maʻu ha koloa fufū.

•   Ko ha tokotaha mēsianiti fefonongaʻaki ʻokú ne kumi ki ha ngaahi mataʻitofe mahuʻinga naʻá ne maʻu ha mataʻitofe mahuʻinga lahi ʻe taha.

 Ko e ongo tangatá fakatouʻosi naʻá na fakatau atu ʻa e ngaahi meʻa kotoa naʻá na maʻú ke fakatau mai ʻaki ʻa e koloa naʻá na maʻú. Ko e ongo tangata ko ení ʻokú na fakafofongaʻi ʻa e kakai ʻoku nau fakamahuʻingaʻi lahi ʻaupito ʻa e Puleʻangá ʻo nau fai ai ʻa e ngaahi feilaulau lahi koeʻuhi ke maʻu hono ngaahi tāpuakí. (Luke 18:29, 30) ʻI he vitiō ko ení, sio ki he talanoa fekauʻaki mo ha ongo meʻa ʻe toko ua ʻokú na tatau mo e ongo tangata ʻi he talanoa fakatātā ʻa Sīsuú.