Mokgatlo wa Lefase wa tša Maphelo o re: “Tlaišo ya basadi ke bothata bja lefase ka moka bjo go nyakegago gore bo lebeledišišwe ka pela.” Mokgatlo woo o akanya gore mo e ka bago diperesente tše 30 “tša basadi ka moka bao ba kilego ba nyalwa goba ba ba le motho yo ba segišanago le yena ba kile ba bethwa goba ba tlaišwa ka tša thobalano” ke balekane ba bona. Le gona pegong ye nngwe mokgatlo wa UN o bolela gore, ngwageng o mongwe, mo mengwageng e sa tšwago go feta, basadi ba ka bago ba 137 ba be ba bolawa letšatši le letšatši ke banna ba bona goba setho se sengwe sa ka lapeng. a

 Dipalopalo di ka no ba di bontšha gore bothata bja bao ba tlaišwago ka lapeng ke bjo bogolo gakaakang, eupša ga di hlalose bohloko bjo ba bo kwago maikwelong le mmeleng.

 Na le wena o a tlaišwa ka lapeng? Goba o tseba motho yo a tlaišwago? Ge e ba go le bjalo, bona dintlha tše di latelago tše di tšwago Beibeleng tšeo di ka thušago.

  Ge e ba o tlaišwa ka lapeng, ga se phošo ya gago

  O ka hwetša thušo

  Ga o nnoši

  Go tlaišwa ka lapeng go tlo fela

  Kamoo o ka thušago motho yo a tlaišwago

 Seo Beibele e se bolelago: “Yo mongwe le yo mongwe wa rena o tla ikarabela go Modimo.”—Baroma 14:12.

 Gopola: Molato o magetleng a yo a go tlaišago.

 Ge e ba molekane wa gago a go bea molato ka seo a go dirago sona, phošo ke ya gagwe. Basadi ba swanetšwe ke go ratwa, e sego go tlaišwa.—Bakolose 3:19.

 Ka dinako tše dingwe motho yo a tlaišago setho sa lapa a ka ba a dirwa ke gore o na le bolwetši bja monagano, o goletše ka lapeng leo go lona ditho tša lapa di bego di tlaišana goba a ka ba a dirwa ke botagwa. Le ge go le bjalo, o sa ikarabela go Modimo ka tsela yeo a go swarago ka yona. Gape ke yena a swanetšego go dira sohle seo a ka se kgonago gore a fetoše mekgwa ya gagwe.

 Seo Beibele e se bolelago: “Taba e a atlega mo go nago le baeletši ba bantši.”—Diema 15:22.

 Gopola: Ge e ba o ikwa o sa šireletšega goba o sa tsebe seo o ka se dirago, ba bangwe ba ka go thuša.

 Ke ka baka la’ng o ka nyaka thušo go ba bangwe? Tlaišego ka lapeng ke taba e raraganego. Go tseba gore ke eng seo o swanetšego gore o se dire go ka ba thata ka ge o sa tsebe gore mo go tše di latelago, ke efe yeo e lego bohlokwa kudu go feta tše dingwe:

•   Go šireletšega ga gago

•   Seo se loketšego bana ba gago

•   Boemo bja gago bja tša ditšhelete

•   Lerato la gago go molekane wa gago

•   Go duma gore tswalano ya lena e se ke ya senyega ge e ba molekane wa gago a ka fetoša mekgwa ya gagwe

 Ka tlhago, o ka ikwa o gakanegile e bile o se na maano. O ka kgopela thušo go mang?

 Mogwera yo o mo tshepago goba yo mongwe ka lapeng a ka kgona go go thuša ka dikeletšo le go go thekga. Go ntšhetša yo mongwe yo a tshwenyegago ka wena sa mafahleng, go ka go hola kudu.

 Dinomoro tša megala tša bao ba thušago batho ba tlaišwago ka malapeng di ka go thuša le semeetseng. Batho bao ba šomago dinomorong tše ba ka go thuša gore o bone gore o ka dira’ng gore o šireletšege. Ge e ba molekane wa gago a dumela gore o na le bothata gomme a tloga a nyaka go fetoga, ba dinomoro tše tša megala ba ka mo thuša ka megato yeo a swanetšego go thoma ka yona.

 Ba bangwe ba thušo ya tša tšhoganetšo ba ka go thuša ge e ba o nyaka thušo ya ka pelapela. Batho ba e ka ba dingaka, baoki le bašomi ba bangwe ba tša maphelo ba nago le mangwalo.

 Seo Beibele e se bolelago: “Jehofa b o kgauswi le ba dipelo tše di robegilego. O phološa ba meoya e nyamilego o šoro.”—Psalme 34:18.

 Gopola: Modimo o tshepiša go go thuša.

 Jehofa o tshwenyega kudu ka wena. (1 Petro 5:7) O go kwešiša go fihla bogaregareng bja pelo ya gago le mogopolo. A ka go homotša ka Lentšu la gagwe, e lego Beibele. Gomme, o go bitša gore o tle go yena ka thapelo. Ge o rapela, o ka mo kgopela gore a go fe bohlale le maatla a go lebeletšana le boemo bja gago.—Jesaya 41:10.

 Seo Beibele e se bolelago: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago.”—Mika 4:4.

 Gopola: Beibele e holofetša gore go se go ye kae, yo mongwe le yo mongwe o tla ba le khutšo ka lapeng.

 Tharollo e nnoši ya go ya go ile le yeo e lego ya sa ruri ya mathata a rena ka moka e tšwa go Jehofa Modimo. Beibele e holofetša gore: “O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kutollo 21:4) Nakong yeo gaešita le dilo tše mpe tše di kilego tša re diragalela di ka se sa gopolega gomme di tla tšeelwa legato ke tše dibotse. (Jesaya 65:17) Bjo ke bokamoso bja khutšo bjo Beibele e go holofetšago bjona.