Ani osusuɔ akɛ nibii baahi wɔsɛɛ? Eyɛ mli akɛ wɔkɛ naagbai ni yɔɔ hiɛdɔɔ waa miikpe ŋmɛnɛ moŋ, shi mɛi babaoo yɛ hiɛnɔkamɔ akɛ nibii baahi. Shi ani wɔbaanyɛ wɔkpa gba akɛ nibii baahi wɔsɛɛ? Hɛɛ! Biblia lɛ hãa wɔnáa hiɛnɔkamɔ diɛŋtsɛ akɛ nibii baahi wɔsɛɛ.

•  Mɛɛ hiɛnɔkamɔ Biblia lɛ kɛhãa?

•  Ani esa akɛ ewa kɛhã wɔ akɛ wɔbaahe wɔye akɛ Biblia shiwoi lɛ baaba mli?

•  Mɛɛ gbɛ nɔ nibii kpakpai ni Biblia lɛ ewo he shi lɛ baatsɔ aba mli?

•  Mɛɛ be hiɛnɔkamɔ nɛɛ baaba mli?

•  Mɛɛ gbɛ nɔ hiɛnɔkamɔ ni Biblia lɛ kɛhãa lɛ baaye abua bo ŋmɛnɛ?

 Biblia lɛ wieɔ akɛ, adesai kɛ naagbai wuji miikpe. Kɛ̃lɛ, ewoɔ shi akɛ naagbai nɛɛ asɛɛ baafo gbi ko kɛ̃. Susumɔ enɛ he nɔkwɛmɔnii fioo komɛi okwɛ.

•   Naagba: Wɔɔhe ni anáaa

   Nɔ ni Biblia lɛ kɛɔ: “Amɛbaamamɔ tsũi ni amɛbaahi mli.”​—Yesaia 65:21.

   Nɔ ni enɛ tsɔɔ kɛhã wɔsɛɛ: Mɛi baaná amɛ diɛŋtsɛ amɛshĩai.

•   Naagba: Nitsumɔ ni anáaa kɛ ohia

   Nɔ ni Biblia lɛ kɛɔ: “Mɛi ni mihala lɛ baaye amɛninenaa nitsumɔ lɛ mli nii jogbaŋŋ.”​—Yesaia 65:22.

   Nɔ ni enɛ tsɔɔ kɛhã wɔsɛɛ: Adesai fɛɛ baaná nitsumɔi ni hãa mɔ tsui nyɔɔ emli, ni hãa mɔ náa miishɛɛ, ni sɛɛnamɔ yɛ he amɛtsu.

•   Naagba: Jalɛsane ni ayeee

   Nɔ ni Biblia lɛ kɛɔ: ‘Lumɛi baaye nɔ yɛ jalɛsaneyeli naa.’​—Yesaia 32:1.

   Nɔ ni enɛ tsɔɔ kɛhã wɔsɛɛ: Ayeŋ mɛi sane fɔŋ yɛ amɛhewolo nɔ su, kɛ mɛi ni amɛji lɛ hewɔ dɔŋŋ, ni mɔ ko hu yeŋ ohia dɔŋŋ. Akɛ mɔ fɛɛ mɔ baaye jogbaŋŋ.

•   Naagba: Niyenii kpakpa ni anáaa kɛ hɔmɔ

   Nɔ ni Biblia lɛ kɛɔ: “Shikpɔŋ lɛ nɔ baayi kɛ ŋmaa; Ebaafa babaoo kɛteke nɔ yɛ gɔji lɛ ayiteŋ.”​—Lala 72:16.

   Nɔ ni enɛ tsɔɔ kɛhã wɔsɛɛ: Mɔ fɛɛ mɔ baaná niyenii kpakpa babaoo ni hewalɛ yɔɔ mli eye. Mɔ ko mɔ ko eyawɔŋ kɛ hɔmɔ, ni mɔ ko yeŋ nii ni hewalɛ bɛ mli.

•   Naagba: Mlatɔmɔ kɛ yiwalɛ nifeemɔ

   Nɔ ni Biblia lɛ kɛɔ: “Mɔ fɛɛ mɔ aaatá eweintso kɛ egbamitso shishi, ni mɔ ko woŋ amɛhe gbeyei.”​—Mika 4:4.

   Nɔ ni enɛ tsɔɔ kɛhã wɔsɛɛ: Mɔ fɛɛ mɔ baaná shweshweeshwe shihilɛ, ejaakɛ efɔŋfeelɔ ko ehiŋ shi dɔŋŋ, ni “jalɔi lɛ, shikpɔŋ lɛ baatsɔ amɛnɔ.”​—Lala 37:10, 29.

•   Naagba: Ta

   Nɔ ni Biblia lɛ kɛɔ: “Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”​—Yesaia 2:4.

   Nɔ ni enɛ tsɔɔ kɛhã wɔsɛɛ: Toiŋjɔlɛ baahi shikpɔŋ lɛ nɔ he fɛɛ he. (Lala 72:7) Mɔ ko woŋ yara akɛni agbe esuɔlɔ yɛ ta mli hewɔ, ni ehe ebahiaŋ ni mɔ ko ayaba abo yɛ he ko yɛ ta hewɔ.

•   Naagba: Hela

   Nɔ ni Biblia lɛ kɛɔ: “Mɛi ni yɔɔ mli lɛ ateŋ mɔ ko ekɛŋ akɛ: ‘Mibɛ hewalɛ.’”​—Yesaia 33:24.

   Nɔ ni enɛ tsɔɔ kɛhã wɔsɛɛ: Mɛi ejeŋ kpa dɔŋŋ, ni hela mɔŋ mɔ ko dɔŋŋ. (Yesaia 35:5, 6) Biblia lɛ woɔ shi po akɛ ‘gbele ehiŋ shi dɔŋŋ.’—Kpojiemɔ 21:4.

•   Naagba: Aafite shikpɔŋ lɛ kɛ kɔɔyɔɔ lɛ mli

   Nɔ ni Biblia lɛ kɛɔ: “Ŋa kɛ shikpɔŋ gbiŋ baanya, ni ŋa kpataa mii baashɛ ehe, ni ebaagba afoforo tamɔ safron fɔfɔi.”​—Yesaia 35:1.

   Nɔ ni enɛ tsɔɔ kɛhã wɔsɛɛ: Shikpɔŋ lɛ nɔ fɛɛ baatsɔ paradeiso koni adesai ahi nɔ, taakɛ Nyɔŋmɔ yiŋtoo ji kɛjɛ shishijee lɛ.​—1 Mose 2:15; Yesaia 45:18.

 Shishinumɔ yɛ he akɛ obaanu he nakai. Kɛ̃lɛ, wɔmiiwo bo hewalɛ koni oya nɔ opɛi nɔ ni Biblia lɛ kɛɔ yɛ wɔsɛɛ lɛ he. Mɛni hewɔ? Shiwoi ni yɔɔ Biblia lɛ mli lɛ yɛ srɔto yɛ shi ni gbɔmɛi woɔ kɛ nibii ni amɛkɛɔ akɛ ebaaba lɛ he. Shiwoi ni yɔɔ Biblia lɛ mli lɛ, Nyɔŋmɔ ŋɔɔ ejɛ. Naa nɔ hewɔ ni no bafeɔ srɔto kwraa lɛ:

•   Nyɔŋmɔ lɛ anɔkwafo ni. Biblia lɛ kɛɛ Nyɔŋmɔ “nyɛŋ emale.” (Tito 1:2) Agbɛnɛ hu, Nyɔŋmɔ pɛ nyɛɔ egbaa nɔ ni baaba wɔsɛɛ. (Yesaia 46:10) Nɔkwɛmɔnii babaoo yɛ Biblia lɛ mli ni maa nɔ mi akɛ, nɔ fɛɛ nɔ ni Nyɔŋmɔ gbaa lɛ baa mli be fɛɛ be. Kɛhã enɛ he saji krokomɛi lɛ, kwɛmɔ vidio ni ji Te Wɔbaafee Tɛŋŋ Wɔle akɛ Biblia lɛ Ja? lɛ.

•   Nyɔŋmɔ yɛ nyɛmɔ ni ekɛbaatsu wɔnaagbai lɛ ahe nii. Biblia lɛ kɛɔ akɛ Nyɔŋmɔ yɛ hewalɛ ni ekɛfeɔ “nɔ fɛɛ nɔ ni esumɔɔ.” (Lala 135:5, 6) Kɛ́ wɔɔkɛɛ lɛ, nɔ ko bɛ ni baatsĩ Nyɔŋmɔ naa ni ekaye eshiwoi lɛ anɔ. Agbɛnɛ hu, Nyɔŋmɔ miisumɔ ni eye ebua wɔ ejaakɛ, esumɔɔ wɔ.​—Yohane 3:16.

 Ekolɛ obaabi ohe akɛ, ‘Kɛ́ Nyɔŋmɔ miitao eye ebua wɔ, ni ebaanyɛ eye ebua wɔ lɛ, mɛni hewɔ wɔkɛ naagbai babaoo kpeɔ lolo lɛ?’ Kɛhã sane nɛɛ hetoo lɛ, kwɛmɔ vidio ni ji Mɛni Hewɔ Nyɔŋmɔ Ŋmɛɔ Piŋmɔ Gbɛ? lɛ.

 Nyɔŋmɔ baatsɔ e-Maŋtsɛyeli lɛ, ni ji nɔyeli ni yɔɔ ŋwɛi lɛ nɔ eye eshiwoi lɛ anɔ. Ehala Yesu Kristo akɛ nakai Maŋtsɛyeli lɛ Nɔyelɔ, ni ehã lɛ hegbɛ ni ekwɛ shikpɔŋ lɛ nɔ, ni ekwɛ mɛi ni yɔɔ nɔ lɛ anɔ. Be ni Yesu yɔɔ shikpɔŋ lɛ nɔ lɛ, etsa helatsɛmɛi, ehã mɛi ni hɔmɔ yeɔ amɛ lɛ niyenii, etsɔɔ akɛ eyɛ hewalɛ yɛ kɔɔyɔɔ nɔ, ni etee gbohii ashi hu. (Marko 4:39; 6:41-44; Luka 4:40; Yohane 11:43, 44) Ekɛ enɛ tsɔɔ nɔ ni ebaafee akɛ Nyɔŋmɔ Maŋtsɛyeli lɛ nɔ Maŋtsɛ.

 Kwɛmɔ vidio ni ji Mɛni Ji Nyɔŋmɔ Maŋtsɛyeli Lɛ? koni ole bɔ ni obaaná Nyɔŋmɔ Maŋtsɛyeli lɛ he sɛɛ lɛ he saji krokomɛi.

 Etsɛŋ kwraa! Te wɔfeɔ tɛŋŋ wɔleɔ lɛ? Biblia lɛ gba nibii komɛi ni baaya nɔ ni baatsɔɔ akɛ Nyɔŋmɔ Maŋtsɛyeli lɛ miiba ebabɔi shikpɔŋ lɛ fɛɛ nɔyeli. (Luka 21:10, 11) Nibii ni yaa nɔ ŋmɛnɛ lɛ ji nɔ ni Biblia lɛ gba efɔ̃ shi lɛ.

 Kɛ́ ootao ole enɛ he saji krokomɛi lɛ, kanemɔ sane ni ji “Mɛɛ Be Nyɔŋmɔ Maŋtsɛyeli Lɛ Baabɔi Shikpɔŋ Lɛ Nɔ Yeli?” lɛ.

 Biblia ŋmalɔ ko wie hiɛnɔkamɔ ni Biblia lɛ kɛhãa lɛ he akɛ, etamɔ ‘sɛ́kɛ kɛhã susuma lɛ.’ (Hebribii 6:19) Bɔ ni sɛ́kɛ mɔɔ meele edamɔɔ shi koni ahum akatswa lɛ kɛtee lɛ, nakai nɔŋŋ ni hiɛnɔkamɔ ni yɔɔ shiŋŋ ni Biblia lɛ kɛhãa lɛ, baanyɛ aye abua wɔ ni wɔkpee naagbai ni wɔkɛkpeɔ ŋmɛnɛ lɛ anaa. Wɔhiɛnɔkamɔ lɛ baanyɛ aye abua wɔ ni wɔkahao, wɔmii ashɛ wɔhe, wɔjwɛŋ jogbaŋŋ, ni wɔná gbɔmɔtsoŋ hewalɛ po.​—1 Tesalonikabii 5:8.