Een woer hofnung fer een peser futuer
Mënst tuu tas ti situatsyoon in te welt sich ferpesere tuut? Fiile layt fersuuche wayter positiiw plaype, opwool ti xweyere propleeme woo mer hayt mit mache. Awer khene mer wërklich klaape tas ti tinge peser wëre? Yawool! Ti Piipel kept uns een woere hofnung fer een peser futuer.
Was fer hofnung kept ti Piipel?
Ti Piipel erkhënt tas ti mënxe tuun fiile propleeme mit mache. Awer tii ferxprecht tas ti propleeme tuun uns net fer imer petrefe. Kuk mool etliche payxpiile:
Propleem: Khee plats fer se woone hon
Ti Piipel saat: “Tii tuun hayser paue un in tëne woone.” (Isayas 65:21)
Was im futuer pasiire tuut: Ale tuun sayn aychne haus hon.
Propleem: Khee aarwayt hon un aarmheet
Ti Piipel saat: “Mayn raus kesuuchtner tuun ti aarwayt fon sayn aychne hënt kans aus nutse.” (Isayas 65:22)
Was im futuer pasiire tuut: Al ti mënxe tuun een aarwayt hon woo se kërn hon un woo se tsufriite lost.
Propleem: Unkerechtichkheet
Ti Piipel saat: “Prinse tuun mit kerechtichkheet rechiire.” (Isayas 32:1)
Was im futuer pasiire tuut: Ale wëre mit kerechtichkheet pehantelt. Nimant wërt aarm un nimant wërt unkerecht pehantelt weeche sayn ras orer sotsyaale xtel.
Propleem: Net kenuuch kesunte ese hon un hungernoot
Ti Piipel saat: “Es tuut tan aarich fiil sereaal uf te eyert kepe, soo kaar uf te kiple fon te përiche wërt es iwer fiil kepe.” (Psalm 72:16)
Was im futuer pasiire tuut: Es wërt fiile kesunte ese fer ale kaar kepe. Nimant tuut mit hungernoot xloofe keen.
Propleem: Kriim un wyolënts
Ti Piipel saat: “Tii tuun sich uner sayn traupe kriste un sayn fayche paam setse un nimant tuut tëne angst mache.” (Mikeyas 4:4)
Was im futuer pasiire tuut: Al ti layt tuun sich in sicherheet xpiire, wayl ti xlechte layt net mee eksistiire tuun un “ti kerechte tuun ti eyert kriin”. (Psalm 37:10, 29)
Propleem: Kriich
Ti Piipel saat: “Ti natsyoone tuun net mee tas xwaart eene keeche te anere uf heepe, un tii tuun aach net mee te kriich lërne.” (Isayas 2:4)
Was im futuer pasiire tuut: Es wërt friit uf te kans eyert kepe. (Psalm 72:7) Nimant tuut ti traurichkheet xpiire woo khomt wën een keliipte im kriich xtërpt. Un es wërt net neetich tas yemant fon sayn lant aus rayst weeche een kriich.
Propleem: Krankheete
Ti Piipel saat: “Khee pewooner tuut saan: ‘Ich sin krank.’” (Isayas 33:24)
Was im futuer pasiire tuut: Ti layt sayn khërper un ferxtant tuun kans kesunt sin. (Isayas 35:5, 6) Ti Piipel tuut soo kaar ferxpreche tas “es kept kheen toot mee”. (Apokalipsis 21:4)
Propleem: Xaate keeche ti natuer
Ti Piipel saat: “Te tesërt un tas trokne lant fraye sich, un ti fertrokent epnung wërt froo sin un pliie wii te asafran.” (Isayas 35:1)
Was im futuer pasiire tuut: Ti kans eyert wërt een xeen paratiis, woo al ti mënxe woone tuun, soo wii Kot imer wolt. (Xeenesis 2:15; Isayas 45:18)
Is ti hofnung woo ti Piipel uns kept tsu kuut fer woer sin?
Es is normaal soo se tenke. Awer mer muute tich uf noo kuke was ti Piipel iwer te futuer saat. Warom? Ti Piipel sayn ferxpreche sin anerste wii ti mënxe sayn ferxpreche orer was se iwer te futuer saan. Ti Piipel sayn ferxpreche khome fon Kot heyer. Kuk mool 2 uersache warom tas een kroos unerxiit macht:
Meyer khene uf Kot traue. Ti Piipel saat tas Kot “net liie khan”. (Titus 1:2) Un noch: ploos Kot khan te futuer foer raus saan. (Isayas 46:10) Ti Piipel hot fiile payxpiile woo tsayche tas was Kot foer raus saat, tuut sich imer erfiile. Fer mee informatsyoone fine, kuk te wiiteo Khëne mëyer sicher sin tas ti Piipel woer is?
Kot hot ti kraft fer unser propleeme resolwiire. Ti Piipel saat tas Kot ti kraft hot fer se mache “ales was eyer wil”. (Psalm 135:5, 6) In anere wërter: niks khan Kot um hale sayn ferxpreche erfiile. Un Kot wil uns helfe, wayl eyer uns liipt. (Yoohan 3:16)
Fiilaycht, froost tuu tich: ‘Wën Kot uns helfe wil un ti kraft hot fer tas mache, warom layte mer soo fiile propleeme?’ Fer tiise frooch antworte, kuk te wiiteo Warom lost Kot ti traurichkheet pasiire?
Wii tuut tiise hofnung sich erfiile?
Kot tuut sayn Raych — een rechiirung im himel — penutse fer sayn ferxpreche erfiile. Kot hot Yeesus Kristus wii Kheenich fon tiise Raych in kesetst un hot tëm autoriteet kep fer ti eyert un ti mënxe too truf uf phase. Wii Yeesus uf te eyert waar, hot eyer ti kranke keheelt, ese kep fer tii woo hunger hate, tas weter kontroliirt, un soo kaar ti toote uf keruuft. (Mar. 4:39; 6:41-44; Luk. 4:40; Yoo. 11:43, 44) Soo hot eyer ketsaycht was eyer wii Kheenich fon Kot sayn Raych mache tuut.
Wilst tuu wise was noch Kot sayn Raych fer tich mache tuut? Soo, kuk te wiiteo Was is Kot sayn Raych?
Wanee wërt tiise hofnung erfiilt?
Klaych! Warom khene mer uns too tefun sicher sin? Wayl ti Piipel hot etliche ewënte foer raus kesaat woo tsayche teete tas Kot sayn Raych klaych aan fangt uf te kans eyert rechiire; un hayt siin mer tiise ewënte am pasiire. (Luk. 21:10, 11)
Fer mee lërne, lees ti lisyoon 32 fom puuch Los tich kuut keen im leepe fer imer!
Wii khan ti hofnung woo ti Piipel uns kept, tich hayt helfe?
Een Piipel xrayper hot kexrip tas ti hofnung woo ti Piipel uns kept, “is wii een anker fer unser seel”. (Hepreeyer 6:19) Een anker halt een xif fest torich een xtorm; kraat soo, ti fest hofnung woo ti Piipel uns kept khan uns helfe ti propleeme woo mer hayt mit mache, aus hale. Unser hofnung khan uns helfe in ruu plaype, frooheet hon, taytlich tenke un soo kaar kesunt sin. (1te Thesalooniker 5:8)
