Kọ who roro nọ eware i ti woma evaọ obaro? Ahwo buobu a bi rẹro nọ eware i ti woma ghelọ ebẹbẹ nọ e da oria kpobi fia nẹnẹ na. Kọ ma sai gine rẹro nọ eware i ti woma? Ee! Ma wo ẹruore nọ eware i ti woma evaọ obaro wọhọ epanọ Ọghẹnẹ ọ ya eyaa evaọ Ebaibol na.

•  Eware vẹ Ọghẹnẹ ọ ya eyaa rai evaọ Ebaibol na?

•  Kọ eware nọ Ọghẹnẹ ọ ya eyaa rai evaọ Ebaibol na i ti gine rugba?

•  Ẹvẹ eware nọ Ọghẹnẹ ọ ya eyaa rai i ti ro rugba?

•  Oke vẹ eware nọ Ọghẹnẹ ọ ya eyaa rai i ti ro rugba?

•  Ẹvẹ eware nọ Ọghẹnẹ ọ ya eyaa rai e sai ro fiobọhọ kẹ owhẹ enẹna?

 Ebaibol na o dhesẹ vevẹ nọ ahwo-akpọ a be rẹriẹ ovao dhe ebẹbẹ buobu. Rekọ Ọghẹnẹ ọ ya eyaa evaọ Ebaibol na nọ ebẹbẹ nana i ti kuhọ kẹle. Joma ta kpahe eware jọ nọ Ọghẹnẹ ọ ya eyaa rai.

•   Ẹbẹbẹ: Ahwo nọ a wo uwou hu

   Oware nọ Ebaibol na ọ ta: “A te bọ iwou, a vẹ te rria eva rai.”​—Aizaya 65:21.

   Epanọ eware e te jọ evaọ obaro: Ahwo kpobi a te bọ uwou obọrai.

•   Ẹbẹbẹ: Uvuhu gbe iruo nọ a be ruẹ ru hu

   Oware nọ Ebaibol na ọ ta: “Ahwo mẹ nọ mẹ salọ a te reawere iruo abọ rai vọvọ.”​—Aizaya 65:22.

   Epanọ eware e te jọ evaọ obaro: Ahwo-akpọ kpobi a ti ru iruo nọ e rẹ lẹliẹ eva were ae yọ a ti wo erere no iruo rai ze.

•   Ẹbẹbẹ: Okienyẹ

   Oware nọ Ebaibol na ọ ta: “Isu i ti su re uvioziẹ o jariẹ.”​—Aizaya 32:1.

   Epanọ eware e te jọ evaọ obaro: Omagbẹre fiki ovioma, epanọ ohwo o wo ugho te, gbe epanọ ohwo ọ viodẹ te, o te jọ họ. A ti bru uvioziẹ kẹ ohwo kpobi.

•   Ẹbẹbẹ: Ohọo gbe emamọ emu nọ a be ruẹ re he

   Oware nọ Ebaibol na ọ ta: “Emu ọ te dafia evaọ otọakpọ na; obọ ehru igbehru na o te vọ kpọhọhwẹ.”​—Olezi 72:16.

   Epanọ eware e te jọ evaọ obaro: Emamọ emu ọ te da oria kpobi fia nọ ahwo a te ruẹ re. Ohwo ọvo o ti kiẹzẹ eveva ha.

•   Ẹbẹbẹ: Emuemu gbe ozighi

   Oware nọ Ebaibol na ọ ta: “Omomọvo rai ọ te keria ọvuọ otọ ure evaene gbe otọ ure ifigi riẹ, ohwo ọvo o ti ru ozọ mu ai hi.”​—Maeka 4:4.

   Epanọ eware e te jọ evaọ obaro: Ozọ u ti gbe mu ahwo ho keme ahwo oyoma a te gbẹ jariẹ hẹ. “Ahwo okiẹrẹe na a te rọ otọakpọ na reuku.”​—Olezi 37:10, 29.

•   Ẹbẹbẹ: Ẹmo

   Oware nọ Ebaibol na ọ ta: “Orẹwho o gbẹ te kpare ọgbọdọ rọsuọ orẹwho ho, yọ a ti gbe wuhrẹ ẹmo-ofio ofa ha.”​—Aizaya 2:4.

   Epanọ eware e te jọ evaọ obaro: Udhedhẹ o te da oria kpobi fia. (Olezi 72:7) Ohwo ọvo ọ te gbẹ viẹ fiki ohwo riẹ nọ a kpe evaọ ẹmo ho, yọ ohwo ọvo ọ te gbẹ dhẹ dhere fiki ẹmo ho.

•   Ẹbẹbẹ: Ẹyao

   Oware nọ Ebaibol na ọ ta: “Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.”​—Aizaya 33:24.

   Epanọ eware e te jọ evaọ obaro: Ahwo a te gbẹ mọ họ yọ a te gbẹ ko ho. (Aizaya 35:5, 6) Ebaibol na ọ tubẹ ta nọ “uwhu o gbẹ te jọ ofa ha.”​—Eviavia 21:4.

•   Ẹbẹbẹ: Otọakpọ na nọ a be raha no

   Oware nọ Ebaibol na ọ ta: “Udhude na avọ otọ oyaya na e te wereva, yọ udhude opraprara na o te ghọghọ jẹ whẹ idodo họ wọhọ ododo safrọn.”​—Aizaya 35:1.

   Epanọ eware e te jọ evaọ obaro: Wọhọ epanọ Ọghẹnẹ ọ gwọlọ no emuhọ ze, otọakpọ na soso o ti zihe ruọ aparadase nọ ahwo a te rria.​—Emuhọ 2:15; Aizaya 45:18.

 Ohwo ọ sai roro nọ eware nọ Ọghẹnẹ ọ ya eyaa rai evaọ Ebaibol na i ti rugba ha. Rekọ ma gwọlọ nọ whọ romatotọ kiẹ kpahe eware nọ Ebaibol na ọ ta kpahe obaro na. Fikieme? Keme eyaa Ọghẹnẹ i wo ohẹriẹ no eware nọ ahwo-akpọ gheghe a rẹ ta kpahe obaro. Ọghẹnẹ họ ọnọ ọ ya eyaa nọ e rrọ Ebaibol na. Joma ta kpahe oware nọ eyaa Ọghẹnẹ i ro wo ohẹriẹ:

•   Ma rẹ sai fievahọ Ọghẹnẹ. Ebaibol na ọ ta nọ Ọghẹnẹ “ọ rẹ sae ta ọrue he.” (Taitọs 1:2) Ofariẹ, Ọghẹnẹ ọvo họ ọnọ ọ rẹ sae ta oware nọ o te via evaọ obaro. (Aizaya 46:10) Ma rẹ jọ Ebaibol na ruẹ iriruo eware buobu nọ Ọghẹnẹ ọ ruẹaro rai, yọ eware nana i gine rugba. Whọ tẹ gwọlọ gbẹ riẹ eware efa, rri ividio na Ẹvẹ Ma rọ Riẹ nọ Eme Ebaibol na Uzẹme?

•   Ọghẹnẹ o wo ogaga nọ o re ro ku ebẹbẹ mai họ. Ebaibol na ọ ta nọ Ọghẹnẹ o wo ogaga nọ o re ro ru “oware kpobi nọ o were riẹ.” (Olezi 135:5, 6) Onana u dhesẹ nọ Ọghẹnẹ o re ru eyaa riẹ gba, keme oware ovo o sae whaha iẹe he. U te no ere no, Ọghẹnẹ ọ gwọlọ fiobọhọ kẹ omai keme o you omai.​—Jọn 3:16.

 Rekọ ohwo ọ sae nọ inọ, ‘Otẹrọnọ Ọghẹnẹ ọ gwọlọ fiobọhọ kẹ omai yọ o wo ogaga na, kọ fikieme ebẹbẹ e rọ da akpọ na fia?’ Re whọ sae ruẹ uyo onọ yena, rri ividio na Fikieme Ọghẹnẹ Ọ jẹ Kuvẹ Kẹ Uye-Oruẹ?

 Ọghẹnẹ ọ te rọ Uvie riẹ ro ru eyaa riẹ gba. Uvie Ọghẹnẹ yọ egọmeti nọ Ọghẹnẹ o ro mu evaọ obọ odhiwu. Ọghẹnẹ ọ rọ Jesu Kristi mu ovie Uvie na, yọ ọ kẹ riẹ ogaga no re ọ rẹrote otọakpọ na gbe ahwo nọ a rrọ eva riẹ. Nọ Jesu ọ jọ otọakpọ, o siwi enọ e jẹ mọ, ọ ko enọ ohọo u je kpe, o ru nọ ẹkporo avọ ofou ọgaga o ro serihọ, yọ ọ tubẹ kpare enọ i whu no zihe ziọ uzuazọ. (Mak 4:39; 6:41-44; Luk 4:40; Jọn 11:43, 44) Ọ rọ eware nana ro dhesẹ eware nọ o ti ru evaọ obaro, nọ orọnọ ọye họ ovie Uvie Ọghẹnẹ na.

 Rri ividio na Eme họ Uvie Ọghẹnẹ? re who wuhrẹ kpahe eware efa nọ Uvie Ọghẹnẹ u ti ru nọ e te wha erere se owhẹ.

 Kẹle na! Ẹvẹ ma rọ riẹ? Ebaibol na ọ ruẹaro kpahe eware sa-sa nọ e te via, nọ i ti dhesẹ nọ oke nọ Uvie Ọghẹnẹ u ti ro su otọakpọ na o be kẹle no. (Luk 21:10, 11) Eware buobu nọ e be via nẹnẹ na yọ eware nọ Ebaibol na ọ ta nọ e te via.

 Re who gbe wuhrẹ kpahe ẹme nana, se uzoẹme na “Oke Vẹ Uvie Ọghẹnẹ U ti ro Su Akpọ Na?”

 Ohwo jọ evaọ usu ahwo nọ a kere Ebaibol na, ọ rehọ eware nọ ma bi rẹro rai na ro dhesẹ “umuokọ rọkẹ uzuazọ mai.” (Ahwo Hibru 6:19) Wọhọ epanọ umuokọ u re kru okọ dikihẹ nọ ẹkporo o te bi fi na, ere eware nọ Ọghẹnẹ ọ ya eyaa rai evaọ Ebaibol na i re fiobọhọ kẹ omai thihakọ nọ ebẹbẹ i te bi te omai. Ẹruore mai ọ rẹ thọ iroro mai, lẹliẹ udu te omai otọ, fiobọhọ kẹ omai roro oware te ziezi, wereva je wo omokpokpọ.​—1 Ahwo Tẹsalonika 5:8.