Ukalengekanaya uti ebiro ebikasa binemwendisyuwana? Abandu bangyi banemuyikasa eritendibunika mutima nomo tunemulaba omo maligho awakalire munabwire. Nomo bine bitya, twanganayiketera kwenene-kwenene ngoko emyatsi yikendibya ndeke omo biro ebikasa? Ingaa! EBiblia ikatuha eriyiketera eriwatire ely’ebiro ebikasa ebyuwene.

•  EBiblia ikatuha eriyiketera lyahi?

•  Eriyiketera eryo eBiblia ikatuha linemwendisyabererera kwehi?

•  Eriyiketera eri lyasyabererera liti?

•  Eriyiketera eri lyasyabererera mughulu wahi?

•  Eriyiketera eryo eBiblia ikatuha lyangakuwatikya liti munabwire?

 EBiblia inalighire ngoko abandu banemulaba omo maligho awakalire. Aliwe, ikalagha ngoko amaligho ayo syendisyatughalirania kera na kera. Tulebaye eby’erileberyako bilebe.

•   Obuligho: Eribula obwikalo

   Ebyo eBiblia ikabugha: “Basyahimba amanyuma n’eriikala mugo.”​—Isaya 65:21.

   Ekyo ni bughambu omo biro ebikasa, abandu basyabya n’amanyumba wabo-wabo.

•   Obuligho: Obwera n’eribula omubírí

   Ebyo eBiblia ikabugha: “Abayisogawa bage basyatsemera omubírí w’ebyala byabo emigulu miri.”​—Isaya 65:22.

   Ekyo ni bughambu omo biro ebikasa, obuli mundu asyabya n’omubírí owuwene, owakatsemesaya, n’owakaletera endundi.

•   Obuligho: Eritatunganene

   Ebyo eBiblia ikabugha: “Omwami asyatabala omo litunganene.”​—Isaya 32:1.

   Ekyo ni bughambu omo biro ebikasa, erikolera omundu omo nzira eyitatunganene busana n’erangi y’engobi yiwe kutse ekihanda kiwe, n’eribula eritunganene omo myatsi y’esyofranga byasyalusibwaho kera na kera. Obuli mundu asyakolerwa omo bulingirirania.

•   Obuligho: Eribula akalyo n’enzala

   Ebyo eBiblia ikabugha: “Engano ibyeho nene omo kihugo; n’ehitwa hyusule mw’ebyalya.”​—Esyonyimbo 72:16.

   Ekyo ni bughambu omo biro ebikasa, obuli mundu asyabya n’akalyo kanene akuwene. Sihali mundu oyo wasyaghotsera butalya kutse oyo wasyalwala busana n’eribula akalyo.

•   Obuligho: Obwiti n’obutsururu

   Ebyo eBiblia ikabugha: “Obuli mundu asyikala oko ndina y’omuliki wuwe w’ebinyu, n’omo ndina y’omutini wuwe, kandi sihali oyo wasyubahyabo.”​—Mika 4:4.

   Ekyo ni bughambu omo biro ebikasa, obuli mundu asyayowa mbolere n’omo butekane kundi ababi basyabya isibakiriho n’“abatunganene basyikala omo kihugo.”​—Esyonyimbo 37:10, 29.

•   Obuligho: Amalwa

   Ebyo eBiblia ikabugha: “Ekihanda sikyendisyasumbira ekindi kihanda ky’omuyali, kutse sibendisyaswayigisya amalwa.”​—Isaya 2:4.

   Ekyo ni bughambu omo biro ebikasa, obuholo bwasyabya omo kihugho kyosi. (Esyonyimbo 72:7) Sihali omundu oyo wasyalira busana n’eriherya omwanze wiwe omo malwa kutse sihali oyo wasyasonda ah’erisaghira amalwa.

•   Obuligho: Endwala n’amakoni

   Ebyo eBiblia ikabugha: “Sihali endulani eyikandisyabuga iti, ‘Nyilwere.’”​—Isaya 33:24.

   Ekyo ni bughambu omo biro ebikasa, abandu sibendisyasyaghalibwa n’amakoni. (Isaya 35:5, 6) Nibya eBiblia yikalagha yiti “oluholo silwendisyaswabyaho.”​—Eribisulirwa 21:4.

•   Obuligho: Eritsandibwa ly’amaghetse, emisitu n’ebindi

   Ebyo eBiblia ikabugha: “Embwarara n’olukurutsu byasyatsema, n’embwarara yasyatsanga n’erihulukya omusanga ng’erikanga.”​—Isaya 35:1.

   Ekyo ni bughambu omo biro ebikasa, ekihugho kyosi kikendisyabya paradiso eyo bandu basyikalamo, erikwamana n’erisonda ly’oMungu ery’erimbere.​—Enzuko 2:15; Isaya 45:18.

 Wangalengekania ghuti silyendisyabererera; aliwe tukakusaba eriyiteghererya eyindi myatsi eyo eBiblia ibughire oko biro ebikasa. Busanaki? Ebyo eBiblia ikalagha bisighene n’ebyo abandu bakalagha. Esyondaghane esiri omo Biblia sikalua oko Mungu. Hano hane emyatsi eyikakanganaya ekikaleka esyondaghane sy’eBiblia isyabya sy’embaghane:

•   OMungu ni mutaleghula. EBiblia ikabugha yiti oMungu ‘syalibiha.’ (Tito 1:2) Kandi, oMungu musa yuwite obutoki bw’eriminyerera ebikendisyabya omo biro ebikasa. (Isaya 46:10) EBiblia irimo eby’erilebyeryako bingyi ebikakanganaya ngoko ebyosi ebyo oMungu akabugha bikabya kwenene. Eriminya bingyi, lebaya evideo Namna Gani Tunaweza Kuwa Hakika Kama Biblia Inasema Kweli?

•   OMungu anawite obutoki bw’eribughaho amaligho wetu. EBiblia ikabugha yiti oMungu awite obutoki bw’erikola “ebyo anzire.” (Esyonyimbo 135:5, 6) Omo bindi binywa, sihali ekyangakakirya oMungu eriberererya esyondaghane siwe. Ekikulu oko byosi, oMungu akanza erituwatikya kundi atwanzire.​—Yoane 3:16.

 Wanganayibulya ghuti, ‘OMungu amabya inyanzire erituwatikya kandi inyawite obutoki bw’erituwatikya, busanaki tukinahikirawa n’amaligho mangyi?’ Eribana ekisubiryo lebaya evideo Sababu Gani Mungu Anaacha Mateso?

 OMungu asyakolesya oBwami bwiwe, obutabali obuli omo lubula, eriberererya esyondaghane siwe. Abirisombola Yesu Kristo mo Mwami w’oBwami obo, kandi abirimuha ehamuli y’eriteya ekihugho n’abandu abali kukyo. Omughulu Yesu abya oko kihugho, mwalamya abakoni, mwalisya abakwire enzala, inyawite obutoki bw’erikunga ekihunga nʼengetse ibyamukenga, kandi nibya mwalubukya n’abaholi. (Mariko 4:39; 6:41-44; Luka 4:40; Yoane 11:43, 44) Aho mwakangania ebyo asyakola omughulu asyabya Mwami w’oBwami bw’oMungu.

 Lebaya evideo Ufalme wa Mungu Ni Nini? utoke eriminya bingyi oko Bwami bw’oMungu nga bwasyakuletera endundi yo buti.

 Hakisiya hake! Ekikaleka itwaligha ekyo niki? EBiblia muyakania oko myatsi eyangakanganirye ngoko oBwami bw’oMungu bukisiya ibwatsuka eritabala ekihugho. (Luka 21:10, 11) Ebikalaba omo kihugho mo lino bikakanganaya ebyo eBiblia yabugha embere.

 Eriminya bingyi, soma omwatsi “Ufalme wa Mungu Utatawala Dunia Wakati Gani?”

 Omuhandiki mughuma w’eBiblia mwasosekania eriyiketera “nge kindu kisikirye omutima ndeke.” (Abaebrania 6:19, NTN62) Ngoko engomo y’obwato ikasikayabo omughulu w’ekihunga, eriyiketera eriwatire ry’ebiro ebikasa erikabanika omo Biblia lyanganatuwatikya eriyiyinia oko maligho awo tukahindana munabwire. Eriyiketera ryetu lyanganatuwatikya eritekana ndeke omo mutima n’omo bulengekania, nibya n’eribya n’emibiri eyikalire.​—1 Abanya Tesalonika 5:8.