¿Te gi to̱ꞌmi dä thogi xudi ndämäni? Mäske mäpaya di thogihu̱ ndunthi yä xuñha, ndunthi yä jäꞌi to̱ꞌmi dä me̱ꞌtsi nꞌa rä mꞌu̱i temäꞌentho. Pe, ¿xa mäjuäni dä za gä to̱ꞌmihu̱ nꞌa rä mꞌu̱i temäꞌentho? Hää, rä Biblia enä ge Äjuä ma dä hä nꞌa rä mꞌu̱i temäꞌentho pa xudi ndämäni.

•  ¿Te di promete rä Biblia?

•  ¿Xa mäjuäni näꞌä mängä rä Biblia ge ma dä thogi?

•  ¿Hanja ma dä kumpli nuꞌu̱ yä promesa mängä rä Biblia?

•  ¿Hämꞌu̱ ma dä kumpli nuꞌu̱ yä promesa mängä rä Biblia?

•  ¿Hanja dä za dä maxꞌäꞌi mäpaya nuꞌu̱ yä promesa mängä rä Biblia?

 Rä Biblia enä ge mäpaya yä mexiꞌmhai thogi yä dängä xuñha, pe ꞌnehe promete ge ma dä zo̱ho̱ rä pa habu̱ ma dä uadi gatꞌho nuꞌu̱ yä xuñhaꞌu̱. Ma gä handihu̱ rꞌa de geꞌu̱.

•   Rä xuñha: Yä jäꞌi otho yä nguu

   Näꞌä udi rä Noya Äjuä: «Nuꞌu̱ ma dä hyoki yä nguu pa go dä mꞌu̱hniꞌu̱» (Isaías 65:21).

   Näꞌä ma dä thogi: Gatꞌho yä jäꞌi ma dä me̱ꞌtsäse̱ yä nguu.

•   Rä xuñha: Otho rä ꞌme̱fi ꞌne ja rä ñhoya

   Näꞌä udi rä Noya Äjuä: «Nuꞌu̱ mä ꞌme̱go xtä huahni xa ma dä johya po gatꞌho näꞌä ma dä me̱fi» (Isaías 65:22).

   Näꞌä ma dä thogi: Gatꞌho yä jäꞌi ma dä me̱ꞌtsi nꞌa rä ꞌme̱fi näꞌä xa dä ho ꞌne xa ma dä japi dä johya.

•   Rä xuñha: Yä injustisia

   Näꞌä udi rä Noya Äjuä: «Yä prinsipe ma dä ndä pa dä yꞌo̱tꞌe rä justisia» (Isaías 32:1).

   Näꞌä ma dä thogi: Ma dä tꞌo̱tꞌe rä justisia pa gatꞌho yä jäꞌi. Hinto ma dä thogi rä ñhoya ꞌne ya hinto ma dä tꞌo̱tꞌpäbi rä injustisia po yä kolo o po yä rasa ja ngu thogi mäpaya.

•   Rä xuñha: Yä jäꞌi thogi rä thuhu

   Näꞌä udi rä Noya Äjuä: «Ma dä nja ndunthi yä ꞌmotꞌi ha rä xiꞌmhai; asta ha yä ndehe yä tꞌo̱ho̱ xa ma dä nja yä sofo» (Salmo 72:16).

   Näꞌä ma dä thogi: Ma dä nja xa ndunthi yä ñhuni po gatꞌho rä Xiꞌmhai. Ya hinto ma dä ñꞌähä ko rä thuhu ꞌne ya hinto ma dä hñeni ngeꞌä mꞌe̱päbi rä hñuni.

•   Rä xuñha: Yä delito ꞌne yä ntsꞌomꞌu̱i

   Näꞌä udi rä Noya Äjuä: «Kada nꞌa rä jäꞌi ma dä hñudi ha nuꞌu̱ yä xudi ma dä uni yä huähi de gä obxi ꞌne yä huähi de gä igo, ꞌne ya hinto ma dä mꞌu̱i toꞌo dä pidi; ngeꞌä rä Zi Dada Jeoba de yä ejército go xä promete njabu̱» (Miqueas 4:4).

   Näꞌä ma dä thogi: Gatꞌho yä jäꞌi ma dä mꞌu̱i xä ñho ngeꞌä ya ma dä njoꞌo yä tsꞌomꞌu̱i jäꞌi. Ha rä Xiꞌmhai, ya ho̱nse̱ ma dä mꞌu̱i «nuꞌu̱ yä jäꞌi o̱tꞌe rä justisia» (Salmo 37:10, 29).

•   Rä xuñha: Yä gerra

   Näꞌä udi rä Noya Äjuä: «Ya hingä ma dä gu̱tsꞌi yä däjuai yä dähni kontra märꞌa yä dähni, ngeꞌä nuꞌu̱ ya hingä ma dä bädi yä tuhni» (Isaías 2:4).

   Näꞌä ma dä thogi: Ma dä nja rä paz ha gatꞌho rä Xiꞌmhai (Salmo 72:7). Ya hinto ma dä du, nixi ma dä sufri o dä bo̱ni de yä nguu po ränge yä gerra.

•   Rä xuñha: Yä ñheni

   Näꞌä udi rä Noya Äjuä: «Ninꞌa rä jäꞌi ma dä ꞌñenä: “Di hñeni”» (Isaías 33:24).

   Näꞌä ma dä thogi: Ya hingä ma dä nja yä tsꞌonäte ꞌne yä jäꞌi ya hingä ma dä hñeni (Isaías 35:5, 6). ꞌNehe rä Biblia di promete ge asta rä du ma dä ꞌme̱di (Apocalipsis 21:4).

•   Rä xuñha: Rä Xiꞌmhai yꞌo ri tsꞌoki

   Näꞌä udi rä Noya Äjuä: «Yä yꞌotꞌä hai xa ma dä ndo̱ni ko rä johya, ꞌne yä däta yꞌotꞌä ꞌmatha xa ma dä johya ꞌne ma dä ndo̱ni ngu rä azafrán» (Isaías 35:1).

   Näꞌä ma dä thogi: Gatꞌho rä Xiꞌmhai ma dä zo̱ho̱ dä uädri pa dä mꞌu̱i yä jäꞌi ja ngu mi ne Äjuä dende ri mu̱di (Génesis 2:15; Isaías 45:18).

 Rꞌabu̱ di jakägihu̱ xä ñhei gä kamfrihu̱. Pe, ¿por hanja hingi nxadi mä nꞌa tu̱i näꞌä mängä rä Biblia? Nuꞌu̱ yä promesa no̱ni hingä mähye̱gi ko näꞌä mängä yä jäꞌi, ngeꞌä nuꞌu̱ yä promesa hutsꞌi ha rä Biblia go xä yꞌo̱tꞌe Äjuä. Pe, ¿gi pädi por hanja di nꞌañꞌo? Ma gä handihu̱ yoho yä raso:

•   Dä za gä pe̱ꞌspäbihu̱ rä komfiansa Äjuä. Rä Biblia enä ge «Äjuä hiñhaꞌmu̱ hate» (Tito 1:2). Hänge se̱he̱ Äjuä dä za dä xikägihu̱ te ma dä thogi xudi ndämäni (Isaías 46:10). Ha rä Biblia di tsu̱dihu̱ ndunthi yä ejemplo nuꞌu̱ udi ge näꞌä mängä Äjuä nzäntho di kumpli. Mu̱ gi ne gi pädi mä nꞌa tu̱i, hyandi näꞌä rä bideo ¿Por hanja dä za gä kamfrihu̱ ge mäjuäni näꞌä hutsꞌi ha rä Mäkä Tꞌofo?

•   Äjuä dä za dä hñäki nuꞌu̱ yä xuñha di thogihu̱. Rä Biblia enä ge Äjuä pe̱ꞌtsi rä tsꞌe̱di pa dä me̱fi gatꞌho näꞌä go dä ne (Salmo 135:5, 6). Hää, dä za gä mäñhu̱ ge hinto dä za dä hñäkuäbi de dä kumpli nuꞌu̱ yä promesa. ꞌNe ¿gi pädi? Äjuä desea dä maxkägihu̱ ngeꞌä xa di mäkägihu̱ (Juan 3:16).

 Pe nubye̱ zäi ge gi ñꞌanise̱: «Mu̱ Äjuä ne dä maxkägihu̱ ꞌne dä za dä me̱fi njabu̱, ¿por hanja tobe di thogihu̱ yä xuñha?». Mu̱ gi ne gi pädi rä mpengi nunä ntꞌani, hyandi rä bideo ¿Por hanja hopi Äjuä dä nja yä sufrimiento?

 Äjuä ma dä kumpli yä promesa po mäde de rä Tsꞌu̱tꞌhui. Nunä nꞌa rä gobiernu näꞌä xpä hutsꞌi ha mähetsꞌi. Xä hñutsꞌi Ñhesukristo ngu rä Rey de näꞌä rä Gobiernu, ꞌne xä umbäbi rä autorida pa dä su rä Xiꞌmhai ꞌne gatꞌho nuꞌu̱ ma dä mꞌu̱kua. Nuꞌmu̱ rä Hesu bi mꞌu̱kua ha rä Xiꞌmhai bi yꞌo̱the nuꞌu̱ yä jäꞌi mi hñeni, bi ꞌuini nuꞌu̱ mi thogi rä thuhu, bi japi bi tsaya yä bu̱nthi ꞌne asta bi gu̱tsꞌi rꞌa yä jäꞌi de rä du (Marcos 4:39; 6:41-44; Lucas 4:40; Juan 11:43, 44). Njabu̱ bi ꞌñudi gatꞌho näꞌä ma dä me̱fi nuꞌmu̱ xti mända ngu rä Rey de rä Tsꞌu̱tꞌhui Äjuä.

 Mu̱ gi ne gi pädi mä nꞌa tu̱i de näꞌä ma dä me̱fi rä Gobiernu Äjuä po geꞌi, hyandi rä bideo ¿Te me̱ꞌä rä Tsꞌu̱tꞌhui Äjuä?

 Mänꞌitꞌho. Pe, ¿hanja di pädihu̱? Ngeꞌä rä Biblia bi no̱ni rꞌa yä seña nuꞌu̱ ma xä nheki änte de dä mu̱di dä mända rä Tsꞌu̱tꞌhui Äjuä nuua ha rä Xiꞌmhai (Lucas 21:10, 11). ꞌNe mäpaya di handihu̱ hanja di kumpli gatꞌho näꞌä bi mängä rä Biblia.

 Mu̱ gi ne gi pädi mä nꞌa tu̱i, hñeti rä artikulo «¿Cuándo gobernará la Tierra el Reino de Dios?».

 Nꞌa rä yꞌofo de rä Biblia bi ꞌñenä ge näꞌä rä humu̱i uni rä Noya Äjuä ja ngu «nꞌa rä ancla» (Hebreo 6:19). Nꞌa rä anlca sirbe pa dä zämi nꞌa rä barko ꞌne hindä yꞌentꞌi yä bu̱nthi. Njabu̱ ꞌnehe, näꞌä rä humu̱i rꞌakägihu̱ rä Noya Äjuä faxkägihu̱ pa gä ze̱tihu̱ nuꞌu̱ yä xuñha di ñhanduihu̱ hyaxtho. ꞌNehe näꞌä rä humu̱i rꞌakägihu̱ rä Biblia faxkägihu̱ pa gä ꞌmu̱hu̱ ko rä johya, pa dä ꞌmu̱tho mä mfenihu̱ ꞌne asta pa gä pe̱ꞌtsihu̱ nꞌa rä hogä nzaki (1 Tesalonicenses 5:8).