Ka meitaki atu ainei te oraanga a te tuatau ki mua? E maata te tangata te noo papu ua nei noatu te au manamanata kino. Inara ka meitaki atu ainei te oraanga? Ae! Te akakite maira te Pipiria i te manakonakoanga papu no te tuatau ki mua.

•  Eaa te manakonakoanga i roto i te Pipiria?

•  E manakonakoanga papu ainei to te Pipiria?

•  Akapeea teia manakonakoanga e tupu ei?

•  Aea teia manakonakoanga e tupu ei?

•  Akapeea teia manakonakoanga me tauturu ia tatou i teia tuatau?

 Te akakite ra te Pipiria e e maata te manamanata o te tangata. Inara, te taputou maira te Pipiria kare reira e takino ua atu ia tatou. Akamanako ana i teia au akaraanga.

•   Manamanata: Kare e ngutuare

   Akakite te Pipiria: “E patu ratou i te au are, e na ratou uaorai e noo.”—Isaia 65:21.

   Ka tupu a te tuatau ki mua: Mataora te tangata i to ratou uaorai are.

•   Manamanata: Kare e ngai angaanga e te putaua

   Akakite te Pipiria: “E rekareka tei ikiia e au ra, i te angaanga a to ratou uaorai rima.”—Isaia 65:22.

   Ka tupu a te tuatau ki mua: E angaanga memeitaki ta te tangata e te rekareka.

•   Manamanata: Tu tika kore

   Akakite te Pipiria: “E tutara oki te ui ariki ra ma te tuatua-tau.”—Isaia 32:1.

   Ka tupu a te tuatau ki mua: Ka kore takiri te tu iriiri tangata, papakitai, e ka puapingaia te katoatoa.

•   Manamanata: Matepongi e te Onge

   Akakite te Pipiria: “E manga sitona okotai rima i ki i te enua nei, i runga i te take o te au maunga ra.”—Salamo 72:16.

   Ka tupu a te tuatau ki mua: E maata te kai memeitaki na te katoatoa. Kare e onge e kare okotai e matepongi.

•   Manamanata: Te kino e te ta ua

   Akakite te Pipiria: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai.”—Mika 4:4.

   Ka tupu a te tuatau ki mua: Ka noo tinamou ua te tangata no te mea kua takoreia te aronga kino, e “ka riro te enua no te aronga tuatua-tika.”—Salamo 37:10, 29.

•   Manamanata: Tamaki

   Akakite te Pipiria: “Kare tetai enua e tamaki mai ki tetai enua i te koke, kare oki ratou e apii akaou i te tamaki.”—Isaia 2:4.

   Ka tupu a te tuatau ki mua: Ka tupu te ‘au i te ao katoa. (Salamo 72:7) Kare e tangata e mii akaou i tetai akaperepere tei mate i roto i te tamaki e tei kimi i tetai ngai akapuanga mei te tamaki.

•   Manamanata: Maki kino e te maki totoa

   Akakite te Pipiria: “Kare oki to reira e karanga e, Kua maki au.”—Isaia 33:24.

   Ka tupu a te tuatau ki mua: Kare te kopapa o te tangata e kinokino akaou e maki atura. (Isaia 35:5, 6) Kua taputou rai te Pipiria “e kore rava te mate.”—Apokalupo 21:4.

•   Manamanata: Kino te mareva

   Akakite te Pipiria: “Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.”—Isaia 35:1.

   Ka tupu a te tuatau ki mua: Ka noo te tangata ki runga i te enua parataito i te ao katoa, mei ta te Atua i akakite mei te akamata anga.—Genese 2:15; Isaia 45:18.

 Ae, ka manako akapera rai koe. Inara, te akamaroiroi nei matou ia koe kia akara i ta te Pipiria e akakite ra no te tuatau ki mua. Te tumu? E tuke ta te Pipiria au taputou mei te au taputou e te au tamanako anga a te tangata. No ko mai i te Atua te au taputou a te Pipiria. Teia te tumu i tuke ei te reira:

•   Ka irinakiia te Atua. Karanga te Pipiria no te Atua “ta te kore e tika kia pikikaa.” (Tito 1:2) Ko te Atua anake te ka rauka i te akakite mai i te tuatau ki mua. (Isaia 46:10) Kua ki te Pipiria i te au akaraanga i tana i akakite e kua tika te reira. Kia kite maata atu, akara i te vitio Akapeea Tatou e Papu ei e te Tika ra te Pipiria?

•   E mana to te Atua te rapakau i to tatou manamanata. Karanga te Pipiria e mana to te Atua ‘te rave i tana katoa i anoano ra.’ (Salamo 135:5, 6) Tera te aiteanga, kare e apinga e tapu i te Atua kia akatupu i tana au taputou. Inangaro tikai te Atua te tauturu ia tatou no te mea akaperepere aia ia tatou.—Ioane 3:16.

 Penei ka manako koe, ‘Me te inangaro ra te Atua te tauturu ia tatou ma tona mana ririnui, eaa i reira i maata ai te manamanata?’ Ei pauanga, akara i te vitio Eaa ra te Atua i Akatika ai i te Mamae Kia Tupu?

 Ka taangaanga te Atua i tona Patireia, ei kavamani i te rangi, ei akatupu i tana au taputou. Kua iki aia ia Iesu Karaiti ei Tutara no te Patireia, e te mana kia akono i te enua e te tangata i reira. Ia Iesu i te enua nei, kua rapakau aia i te maki, angai i tei matepongi, akatere i te reva kua akatuakaou i tei mate. (Mareko 4:39; 6:41-44; Luka 4:40; Ioane 11:43, 44) Kua akaari mai aia i tana ka rave ei Ariki no te Patireia o te Atua.

 Akara i te vitio Eaa te Patireia o te Atua? kia kite akapeea koe e puapinga ai mei te Patireia o te Atua.

 Te vaitata maira! Akapeea tatou e papu ei? Kua totou te Pipiria i te au mea ka tupu ei akairo kare e roa ka tutara te Patireia o te Atua ki rungao i te enua. (Luka 21:10, 11) Aiteite te turanga o teianei ao ki tei totouia e te Pipiria.

 Kia kite maata atu, tatau i te atikara “Aea te Patireia o te Atua e Tutara ai te Enua?”

 Kua akaaite tetai tata Pipiria i te manakonakoanga o te Pipiria ki te “tutau no te vaerua.” (Ebera 6:19) Mei te tutau o tetai paʼi i te tuatau uriia, ka riro te manakonakoanga papu o te Pipiria no te tuatau ki mua ei tauturu ia tatou kia akakoromaki i te au manamanata i teia tuatau. Ka paruru to tatou manakonakoanga i to tatou manako e te ngakau, e te pae kopapa.—1 Tesalonia 5:8.