Khawchin nasa taka inthlâk danglam tuartu mi maktaduai tam takte zîngah i tel ve em? Khawchin nasa taka inthlâk danglamna leh chumiin a thlen chhiatnate chu kawng hrang hrangin a thleng a. Hurricane te, typhoon te, cyclone te, leh ṭhâwngaleivir te chuan chhiatna thlen thei tui lian leh thlipui a awmtîr fo va. Ruah sûr nasa tak chuan leimin a thlen thei a, thlipui chuan ṭêk a tlâktîr a, chu chuan ram nasa takin a tikâng a ni. Khawkhêng te, khaw lum lutuk te, leh thlasik thli vâwt takte chuan harsatna nasa tak a thlen thei bawk.

 Khawvêl hmun tam takah khawchin nasa taka inthlâk danglamna chu a thleng zingin, tûn hma zawng aiin chhiatna a thlen nasa lehzual a. International Federation of Red Cross and Red Crescent Societies chuan: “Tui lian te, thlipui te, leh khawkhêng te a thlen zin telh telh avângin tûn hma zawng aia nasain leilung chhiatna tuarte chu an pung chho zêl a. Chuvângin, kum tin mi tam tak an thi a, tam tak ei tûr nei lovin an awm a, mi maktaduai tam takin an chênna hmun an chân a ni,” tiin a sawi.

 Hêng thilte a thlen hian a tuartute chuan taksa lam chauh ni lovin, rilru lamah pawh harsatna an tâwk a. Chutianga an tawrh chhan chu an thil neih te, an in leh lo te, leh an hmangaih takte hial pawh thihnaa an chân vâng a ni.

 Khawchin nasa taka inthlâk danglamna tuartu i nih chuan, chumi hmachhawn thei tûrin Bible-in a ṭanpui thei che a. Chu bâkah, Bible chuan khawchin nêna inkûngkaiha leilung chhiatna tuartu mi tam takte a lo ṭanpui tawh ṭhin angin thlamuanna, beiseina, leh thurâwn ṭangkai takte a pe bawk. (Rom 15:4) Mi tam takte’n mahni an inzawh ṭhin zawhna pawimawh tak: Engvângin nge Pathianin hêng thilte hi thlen a phal? Min hremna a ni em? tihte hi a chhâng bawk a ni.

 Bible chuan Pathian chu mite hrehawm tawrhnaa mawhphurtu a ni lo tih a zirtîr a. “Pathian chu sual thlêm rual a ni lo, amah pawhin tu mah a thlêm ngai lo,” tiin min hrilh a ni. (Jakoba 1:13) Chumi awmzia chu tûn laia mite tawh khawchin nasa taka inthlâk danglamna hi a thlentîr a ni lo tihna a ni.

 Bible chuan mi sualte hrem nân Pathianin leilung pianken chakna hman châng a nei tih a sawi a. Mahse, chûng thilthlengte chu tûn laia vaukhânna tel lo leh mi ṭha leh mi sualte’n an tawrh vek khawchin nasa taka inthlâk danglamna ang hi a ni lo. Chumi nêna inkalh takin, Bible-a thilthlengte chuan Pathianin pawi sawi lote a vênghim ṭhîn a, chhiatna thlen hmain vaukhânna a pe lâwk a, a thiltih chhante a hrilhfiah bawk ṭhîn tih a târ lang a ni. Entîr nân, Pathianin Nova hun laia khawvêl puma Tuilêt a thlentîr chhan a hrilhfiah a, chutianga a tih hmain vaukhânna a pe lâwk a, Nova leh a chhûngte a chhanhim bawk a ni.—Genesis 6:13; 2 Petera 2:5.

 Tûn laia leilung chhiatna thlengte hi Pathian hremna a ni lo tih kan hriat theih chhan hriat belh nân, “Leilung Chhiatna Chungchângah Bible-in Eng Nge A Sawi?” tih thuziak chu en rawh.

 Bible-in Pathian Jehova a chu ngaihsakna leh khawngaihna nei tak a ni tih a târ lang a. A hnuaia Bible châng thlamuanthlâk takte hi ngaihtuah rawh.

•   Isaia 63:9: “An manganna zawng zawngah chuan ani chu a mangang ve ṭhîn.”

   A awmzia: Jehova’n hrehawm tuarte a hmuh hian a rilru a na.

•   Petera thawn khat 5:7: “Anin a ngaihsak . . . che.”

   A awmzia: Jehova chuan i ṭhatna tûr a ngaihtuah.

 A ngaihsakna leh khawngaihna chuan Jehova chu thilti tûrin a chêttîr a. Ani chuan Bible-a thurâwn ṭangkai takte hmangin thlamuanna min pe a, sik leh sa avânga chhiatna awm tawh lohna nakin hun beiseina rin tlâk tak min pe bawk a ni.—2 Korinth 1:3, 4.

 Bible chuan Jehova’n ‘i hun hnuhnûng tâwpah beiseina pêk che’ a tiam tih a târ lang a. (Jeremia 29:11) Mihringte tâna a thiltum chu khawchin avânga hlauhna nei lova lei paradis-a chêntîr a ni.—Genesis 1:28; 2:15; Isaia 32:18.

 Chu chu Isua rorêlna hnuaia awm a Lalram hmangin Pathianin a rawn thlentîr ang. (Matthaia 6:10) Isua chuan khawchin avânga chhiatna thlengte dang tûrin finna leh thiltihtheihna a nei a. Leia a awm lai khân khawchin thunun tûra thitihtheihna a neih chu a lantîr a ni. (Marka 4:37-41) Ani chuan hriat theihna leh finnain ro a rêl ang a, mihringte chu an chhehvêl boruak enkawl dân leh leilung tichhe lo zâwnga nun dân a zirtîr ang. (Isaia 11:2) Isua kaihhruaina hnuaiah mite chuan khawchin nasa taka inthlâk danglamna avânga hrehawm an tawrh leh a ngai tawh lo vang.

 Heti hian i ngaihtuah mai thei, ‘Isua’n khawchin thunun tûrin a thiltihtheihna chu engtikah nge a hman ang?’ tiin. He zawhna chhâng tûr hian, “Eng Tikah Nge Pathian Ramin Leiah Ro A Rêl Ang?” tih thuziak en rawh.

 Bible thurâwn chuan khawchin nasa taka inthlâk danglamna a thlen hma, a thlen lai, leh a thlen hnuah pawh a ṭanpui thei che.

•   A thlen hma: Hma la nghâl vat tûrin inbuatsaih rawh.

   Bible sawi dân: “Mi hmanghria chuan thil ṭha lo chu a hmuhin a biru ṭhîn a; mi mâwl erawh chuan a tâwn mai ṭhîn a, a tuar phah ṭhîn.”—Thufingte 22:3.

   A awmzia: Rang taka hma i lâk theih nân leh i chhûngkua i vênhim theih nân i chhehvêlah eng chhiatna nge thleng thei tih hriat tum rawh.

   Thiltawn: “Ram kâng kan tlân chhiatsan hma aṭangin kan lo inbuatsaih lâwk tawh a. Rîkrum thila tlân chhuahpui nghâl theih tûr thil pawimawh zualte dahna bag-te kan nei a ni. Damdawite leh thawmhnawte kan dahsa a. Kan chhehvêla mite chu an chiaiin engmah an ngaihtuah ṭha hlei thei lo va. Mahse, kan mamawh engkim kan neih avângin ka lâwm hle!”—Tamara-i, California, U.S.A.

•   A thlen lai: Thil pawimawh ber chu ngaihtuah tlat rawh.

   Bible sawi dân: “Sum ngah hi mihring dam chhan a ni lo ve.”—Luka 12:15.

   A awmzia: Sum leh pai aiin nunna a pawimawh zâwk.

   Thiltawn: “Thlipui Typhoon Lawin-in b kan in a nuai chhiat khân, tih tûr ber pawh ka ngaihtuah thei lo va. Mahse, ka thiltih pakhat chu tih tak zeta Pathian Jehova hnêna ṭawngṭai a ni. Kan nunna ni lovin, kan thil neihte chauh a ni kan chân tih ka hre chhuak ta a.”—Leslie-i, Philippines.

•   A hnuah: Vawiin atân chauh ngaihtuah rawh.

   Bible sawi dân: “Atûk atân lungkham suh u, atûk chuan ama tân a lungkham chawp dâwn si a.”—Matthaia 6:34.

   A awmzia: Nakina harsatna awm theite avângin lungngai lutuk suh.

   Thiltawn: “Hurricane Irma avânga tui lianin kan in a tihchhiat hnuah, thu tlûkna tam lehzual ka siam a ngai a, ka rilru a hah tak zet a ni. Ni khat atân chauh ngaihtuah tûra Bible thurâwn pêk chu zawm ka tum a. Jehova ṭanpuina zârah ka beisei ai daihin ka tuar chhuak thei.”—Sally-i, Florida, U.S.A.

 Thurâwn ṭangkai dangte hriat belh nân, “Leilung Chhiatna A Thlen Huna Nunna Chhanhim Thei Rahbite,” tih thuziak chu en rawh.