I nindo 24, dwi mir 2, 2022, juaskari mi Russie umondo i ng’om mir Ukraine ku lwiny. Lembuno unyayu peko ma lee uketho dhanu milioni dupa giringo pio mandha giweko ng’ombe. a

 “Jucaku bolo bomb, man piny ucaku moc. Ebino lembe ma nyayu ndiri ma koro lembene utie tek. Kinde ma wawinjo nia garimosi utie m’ubelabu dhanu, wan de wang’iyo nia waai pio. Waweko piny ceke kum gin ma ng’atini copo ting’o utie ndhu sakoc ma nok mir ularng’adi kende. Gin ma wating’o ubino karathasi mwa ma pigi tek, yath, pii, man cam ma thindho thindho. Waweko piny mange ceke man wacidho kaka ma garimosi cungo i iye, bomb ke ubino podho ceng’ini i ng’etwa.”​—Nataliia, i adhura mi Kharkiv, i Ukraine.

 “Nitundo saa maeca, wagam wang’eyo ngo nia nwang’u lwiny copo tuk. Awinjo bomb ucaku moc i adhura mwa, man madhirisa ucaku yengere. Aai, ating’o kende kende piny ma pigi tek. Aweko pacu i saa 2 mi kugweno, amaku garimosi m’ucidho i Lviv, man i ng’eye ke amaku mutukari m’ucidho i Pologne.”​—Nadija, i adhura mi Kharkiv, i Ukraine.

I thiwiwec maeni, wabineno:

•  Lembang’o m’unyolo peko mi ng’wec maeni?

•  Uring ng’wec copo nwang’u genogen kani?

•  Nyo Biblia romo konyo uring ng’wec tini?

 Lembang’o m’unyolo peko mi ng’wec maeni?

 Ng’wec mir Ukraine ucaku kinde ma juaskari mi Russie gimondo ku lwiny i ng’ombe. Ento Biblia unyutho thelembe ma dit m’uketho dhanu giberingo kit ng’wec ma kumeno:

•   Lembe udaru uvoyo Bimobim mi dhanu i wang’ ng’om nimiyo gin ma dhanu gitie ku yenyne. Wang’ ma pol ju ma gitie ku dito, gitiyo ku gavmenti pi nisendo lwak dhanu.​—Eklizia 4:1; 8:9.

•   Sitani Wonabali, ma tie “jabim mi ng’om maeni” ubetiyo ku kit lembe maeno ma rac, uketho Biblia uwacu nia “ng’om zoo uvuto i tego pa ng’atu ma rac.”​—Yohana 14:30; 1 Yohana 5:19.

•   M’uweko can ma kodhidhanu ucaku neno niai con, tin wabekwo i nindo ma Biblia ular uwacu nia, “i kajik ceng’ nindo mi can ma ciro tek bibedo nuti.” (2 Timoteo 3:1) M’usagu zoo, ewacu nia i nindo eno lwiny bibedo nuti, peko ma wok rek, ndru man thong’om, ma gitie lembe m’ubeketho dhanu uberingo.​—Luka 21:10, 11.

 Uring ng’wec copo nwang’u genogen kani?

 Biblia unyutho nia Yehova b ma Jacwic mwa utie Mungu ma jamer, ma kisa nege i kum uring ng’wec man i kum dhanu ma giweko pacu migi. (Poi mi Cik 10:18) Eng’olo nia ebidaru peko mir uring ng’wec i the bimobim pare ma julwong’o nia Ker pa Mungu; etie Ker ma bikabu ker ceke mi dhanu. (Daniel 2:44; Matayo 6:10) Yehova bitiyo ku Ker pare eno pi ninyotho Sitani Wonabali. (Jurumi 16:20) Ker eno bibimo wi ng’om zoo, ebidaru pokiri ma mupaka mi ng’om unyolo. I ng’om zoo dhanu bibedo ni juruot acel. Ng’atu moko mbe ma biringo pacu pare, kum Biblia ung’olo nia “gibibedo kubang’gi kubang’gi ng’atuman the yendulok pare man the yendubolo pare; e ng’atu moko mbe ma binyayu lworo i igi: kum dhu Yehova mir udul uyero maeni.”​—Mika 4:4.

 Ker pa Mungu kende re ma copo daru peko ma tin uketho juberingo. Yehova bitiyo ku Ker maeno pi nikabu peko ceke m’ubeketho dhanu gibedoko uring ng’wec. Wakewec iwi lembene moko:

•   Lwiny. “[Yehova] kwio lwiny cil i kajik mi ng’om.” (Zaburi 46:9) Pi ning’eyo kite ma Mungu bidaru ko lwiny, som thiwiwec “La paix dans le monde : comment sera-t-elle établie ?”

•   Masendi ku rop. “[Yehova] biwaru ng’eyong’ec migi ni dim ku rop.” (Zaburi 72:14) Pi ninyang’ i kite ma dhanu romo wilo ko paru ma cuu ngo ma gicaku bedo ko niai con, som thiwiwec “Briser le cercle de la haine.”

•   Can. “[Yehova] bibodho jacanpiny kinde m’eywak.” (Zaburi 72:12) Pi ning’eyo ayi ma Mungu bidaru ko ulag lembe ceke m’ubenyanyu can, som thiwiwec “Peut-on espérer un système économique plus juste ?”

•   Ndru. “Cam bibedo dit i ng’om wi gudi.” (Zaburi 72:16) Pi ning’eyo ayi ma Mungu biketho ko dhanu ceke ubed ku cam, som thiwiwec “Plus jamais la faim dans le monde ?”

 Nyo Biblia romo konyo uring ng’wec tini?

 Eyo. M’uweko genogen mandha ma Biblia umiyo ni uring ng’wec, ecopo konyogi bende i peko ma gibenwang’iri ko tin.

 Cik mir ukungu mi Biblia: “Cwinywu kud ung’abere pi gin moko ki, ento i lembe ceke ku rwo man kwayukwac karacelo ku dwoko foyofoc, wuketh Mungu ung’ey pi kwac mwu; e kwiyocwiny pa Mungu m’ukadhu gin ceke ma jucopo nyang’ i iye bigwoko adundewu man pidoiwu.”​—Jufilipi 4:6, 7.

 Thelembene: Kway Mungu umii iri kwiyocwiny mir adunde i lembe ceke m’inweng’iri ko. Nen thiwiwec “Philippiens 4:6, 7 : « Ne vous inquiétez de rien ».”