¡TREPELUUCÜLENGE!
Fentren che lefmauquei Ucrania mapu mu
Conlu 24 febrero cüyen 2022, puque ruso huilucontufi Ucrania mapu. Tüfa rume cutrancafi fentren che. Cuñihun dungu mu rupamequeingün, feimu lefmahuingün tañi mapu mu. a
Natalia mülelu Járkov, Ucrania mapu mu feipi: “Ütrüfnagpai bomba ca trofi inafül iñchiñ, feimu rume llican. Quimlu iñchiñ ñi entumequengen che tren mu, raquiduamiyiñ taiñ ca tripayal. Com elcünufiyiñ taiñ fillem. Quiñe cutama müten feipingeiñ taiñ yeal. Tucufiyiñ tati cutama meu quiñeque documento, lahuen, co ca pichin iyael, fei müten. Com elcünuiñ, fei lefmahuiyiñ”.
Nadia mülelu Járkov feipi: “Raquiduamlafuiñ rume ñi müleal tüfachi hueichan. Fei allcün ñi tropümmequen tati bomba ca tati fentana traleutraleutui. Feimu amutuan pin. Yefiñ chem ñi doi duamnieel müten. Pulihuentu tripan, fei püran quiñe tren mu amual Lviv huaria mu. Puulu iñche, quiñe bus mu amun Polonia mapu mu”.
Tüfachi troquiñ mu peaiñ cüla ramtun:
¿Chumngelu rupamequei tüfachi cutrancahun?
Mülerpui tüfachi cutrancahun Rusia huilucontufilu ta Ucrania, huelu ti Biblia feipi chumngelu mülei fentren cutrancahun Mapu mu.
Puque gobierno Mapu mu mülelu pepi eluquelafingün pu che chem tañi duamnieel. Mülefui ñi quelluafiel pu che, huelu doi mai cutrancauquefingün (Eclesiastés 4:1; 8:9).
Huecüfü ngünencaquefi pütrün che Mapu mu, feimu Biblia feipi “com tüfachi chüf mapu ñi ngünenieteu tati huecüfü” (1 Juan 5:19; Juan 14:30).
Biblia ca feipi taiñ mülen afaelchi antü mu, feimu doi huesaque dungu mülei (2 Timoteo 3:1). Feipi ñi müleal hueichan, cürüftucu mahun, fütraque nüyün, ngüñün ca huesaque cutran. Rupan mu tüfachi huesaque dungu, fentren che lefmahuai tañi mapu mu (Lucas 21:10, 11).
Puque lefmaulu ñi mapu mu, ¿cheu peafuingün maneluhun?
Biblia pengeli Chau Ngünechen Jehová b piuqueyeniefi pu che lefmaulu tañi mapu mu (Deuteronomio 10:18). Chau Dios cüpalai tañi Gobierno, fei apümcayafi tati Huecüfü ca tati puque gobierno mülelu Mapu mu, femngechi cüme mongen elutuafi pu che lefmaulu tañi mapu mu (Daniel 2:44; Mateo 6:10; Romanos 16:20). Chau Dios tañi Gobierno ngünenieafi com Mapu, femngechi com che quiñeucületuai quiñe fütra familia reque. Inei no rume lefmauhuelayai tañi ruca mu. Chumngechi feipi ta Biblia, “anücünuhuaingün miñche quisuque ñi anüm ofad meu, ca miñche ñi higuera engün, ca inei no rume llicalcalayaeyu engün, Jehová, Ñidolcülelu pu hueichafe mu, feipicünulu am quisu ñi hun meu” (Miqueas 4:4).
Puule Dios tañi Gobierno müten, lefmauhuelayai ta che tañi mapu mu. Feula lefmauquei che rupamequelu huesaque dungu tañi mapu mu, huelu Chau Dios tañi Gobierno mu femhuelayai. ¿Chem huesaque dungu ngehuelayai? Peafiyiñ.
Ngehuelayai hueichan. Biblia feipi Jehová ‘apümcayafi ti hueichan itrocom Mapu mu’ (Salmo 46:9). Tami quimal chumngechi apümcayafi ti hueichan, peafimi ti troquiñ feipilelu “¿Cómo llegará a haber paz en la Tierra?”.
Ngehuelayai quehuatun dungu. Biblia feipi Chau Dios montulafi pu che “tañi cutrancangequen ca tañi quehuatungequen mu” (Salmo 72:14). Quiñeque che huimtulei tati üdehun ca quehuatun mu, huelu fentecünuafuingün. ¿Chem quelluafeyu? Tami quimal, peafimi ti revista feipilelu “¡Huehuafuiñ ti üdehun!”.
Ngehuelayai filla. Biblia feipi Jehová montulafi “tati fillalelu llellipumequelu ñi quellungeal” (Salmo 72:12). Tami quimal chumngechi apümcangeai tati filla, peafimi ti troquiñ feipilelu “¿Es realista esperar un sistema económico justo?”.
Ngehuelayai ngüñün. Biblia feipi: “Fentren iyael müleai tüfachi Mapu meu” (Salmo 72:16). Tami quimal chumngechi ñi apümcangeal ti ngüñün, peafimi ti troquiñ feipilelu “¿Un mundo sin hambre?”.
Ti Biblia, ¿chumngechi quelluafui feula tati pu lefmauquelu?
Biblia eluquefi maneluhun, ca feula eluquefi ngülam ca quelluquefi. Peafiyiñ quiñeque ngülam.
Biblia ñi feipin: “Ti quimchengenolu feyentuquei com ñi feipingeel, huelu ti adümuhun-ngelu cüme raquiduamquei tañi chem chumal” (Proverbios 14:15).
¿Chem quimeltuqueiñmu? Raquiduamaimi chem cuñihun dungu mu rupayafuimi ca chumngechi cuñiutucuhuafuimi. Rupan mu tüfachi dungu, ca mülequei hueñefe, feimu cuñiutucuhuaimi.
Biblia ñi feipin: “Nieliyiñ taiñ iyael ca nieliyiñ ta tacuhun taiñ tucutuucüleal, feimeu felei taiñ cüme duamcüleal” (1 Timoteo 6:8).
¿Chem quimeltuqueiñmu? Doyümnielayafimi tami fillem, doi mai ayüucüleaimi tami nieel mu müten.
Biblia ñi feipin: “Ca femngechi ta femaimün ta eimün ta caquelu pu che meu chumngechi ta ayüqueimün tamün cüme troquituaeteu caquelu pu che” (Mateo 7:12).
¿Chem quimeltuqueiñmu? Cüme chengeaimi ca ñom chengeaimi. Femngechi chengelmi, respetangeaimi ca cüme lloungeaimi cheu tami mülepun.
Biblia ñi feipin: “Huesa femngelmün, huesa femün huiñoleltuquelayafimün” (Romanos 12:17).
¿Chem quimeltuqueiñmu? Huesa femngelmi, huesa pitulayaimi. Femfulmi, doyelcülerpuai ti dungu.
Biblia ñi feipin: “Chem rupale rume, tañi eluqueteu nehuen quelluqueneu ñi yafüluucüleal” (Filipenses 4:13, TNM).
¿Chem quimeltuqueiñmu? Fill antü acordanieafimi ta Chau Ngünechen ca ngillatuafimi. Quelluen piafimi tami nehuencüleal. Quisu quelluaimu llemai.
Biblia ñi feipin: “Chem meu no rume ta huelulequilpe tamün raquiduam itrofill meu com eimün tamün nieelchi dungu, nütramelqueafimün ta Ngünechen. Ngillatufimün, quelluen piafimün ca femngechi mañumtuqueafimün. Fei ta famngechi ta Ngünechen eluaimünmeu quisu tañi cüme tüngün, fei tüfachi fütra cüme tüngün ta doi cümei che ta pepil-layafui ñi nieal ta cüme tüngün, fei Ngünechen tamün elueteuchi cüme tüngün yafülnieñmayaimünmeu tamün piuque ca tamün raquiduam” (Filipenses 4:6, 7).
¿Chem quimeltuqueiñmu? Chem dungu mu rume rupamequelmi, ngillatufinge ta Chau Dios tami tüngduamelaeteu. Peafimi ti troquiñ feipilelu “Filipenses 4:6, 7 | ‘No se inquieten por nada’”.
a Quiñe antü rupalu ñi huilucontungen Ucrania, quiñe huentru nielu falin cüdau tati Naciones Unidas mu feipi ñi rume huesalcalen ti dungu Ucrania mapu mu, müte pengequelai femngechi huesa dungu famülque meu pi. Mari epu antü mu müten doi epu millon che lefmahuingün Ucrania mapu mu. Quiñe millon che elcünuingün ñi ruca mülecalu rume Ucrania mapu mu.
b Chau Dios tañi üi Jehová pingei (Salmo 83:18). Peafimi ti troquiñ feipilelu “¿Inei am ta Jehová?”.
Eimi ca ayüafuimi
¡TREPELUUCÜLENGE!
Rusia huilucontufi Ucrania: ¿Femtripalerpui ñi feipin tati profecia Biblia mu mülelu?
Quimürpuaimi chumngelu falin-ngei ñi rupamequen Ucrania mu.
FALINQUE QUIMELTUN BIBLIA MU TRIPALU
¿Chem am ta Chau Dios ñi Reino?
Amuldungumequelu, Jesús doi quimeltui Chau Dios ñi Reino. Fentren tripantu mu, pu che llellipuquei ñi cüpayal tüfachi Reino.
FILLQUE RAMTUN BIBLIA MU
Com pu che ñi tüngcüleal, ¿chumngelu fente cüdaungei?
Com che ayüniei ñi tüngcüleal, huelu felelaingün, ¿chumngelu? Fau peaimi ti huiñoldungun.
