I hilo 24 hi sôñ Matjel hi nwii 2022, ntôñ gwét u Ruslan u bi bôdôl jôs loñ Ukren gwét. Ibôdôl ha, ngandak bôt i bi bôdôl so bahoma gwét bi bé nayak. a

 “Bakindim ba bé kwo, bomb i lôhôk homa nyensô. Jam li li bé kônha woñi ngandak. Ngéda di bi nok le mashin ma nlo inyu bet ba nyéñ so gwét, me bi yoñ i makidik ma. Hiki mut a bé lama ndik pamna man bot wada ba mbegee i mbus. Di bi la ndik yoñ mapep més, bee, malép ni ndék yom i je. Di bi yék mana mam mape momasôna, di ke ngwéé i gare i mashin, bakindim ba kwok.”​—Nataliia, i tison i Kharkiv, loñ Ukren.

 “Ikepam linut li nsôk, di bi hoñol le gwét bi ga ba ha bé. I mbus, me nok bakindim ba nlôs i ngim bahoma ba tison, biwinda bi nyeñgek. Ha nyen me bi kit le m’a yén ha bé ha; me yoñ ndik ndék mam i bé toi nseñ. Me bi nyodi i ndap i ngeñ juem i kegla, me yoñ mashin ma bé ke i tison i Lviv, i mbus me yoñ matôwa inyu loñ Pôlan.”​—Nadija, i tison i Kharkiv, loñ Ukren.

Nkwel unu w’a timbhe ngim mamdadga:

•  Kii toi i ntinde i bôt bana i ke toñ lisolbene i mbok ipe?

•  Hee batoñ lisolbene ba nla nléba hogbe?

•  Baa Bibel i nla hôla batoñ lisolbene i len ini?

 Kii toi i ntinde i bôt bana i ke toñ lisolbene i mbok ipe?

 Ini ndutu i bi bôdôl i ngéda loñ Ruslan i bi leñ loñ Ukren gwét. Ndi Bibel yo i nyelel manjom ma tôbôtôbô ma ma nlona i nya mam ini, le mut a ba nyégsaga i yék mbai yé, i ke toñ lisoblene homa numpe:

•   Biane bi nkoñ ’isi bi nla bé yônôs ngôn i bôt ba binam. Maselna ni hala, i bet ba gwé énél, ba mbéna gwélél tel yap inyu bémbe ni tét bôt bape.​—Ñañal 4:1; 8:9.

•   Satan Nsohop, “ñane nkoñ ’isi,” a ntinde bôt i bana ñem mbe ni i boñ béba. Jon Bibel i nkal le: “Nkoñ ’isi wonsôna u yé isi ane i mut mbe.”​—Yôhanes 14:30; 1 Yôhanes 5:19.

•   U héya mandutu bôt ba binam ba mboma ibôdôl kôba, di niñil i len ini i ngéda tôbôtôbô Bibel i mpôdôl, i ngeñ i nkal le: “I dilo di nsôk, mangéda m’a ba mabe, ma bak ki nledek kiyaga.” (2 Timôtéô 3:1) Biyimbne bipe bi ngéda i, bi ga ba: gwét, bikuu kiki bo béba mbuk mbebi tole malép ma ma nhôl ni nyeñk disi, njal, ni dimala​—i nya mam i ntinde bôt i nyodi i mambai map.​—Lukas 21:10, 11.

 Hee batoñ lisolbene ba nla nléba hogbe?

 Bibel i nkal le Yéhôva, b Nhek wés, a ngwés bakén ba bôt, hala wee i bet ba ntoñ lisolbene i mbok ipe, mu loñ yap tole i biloñ bipe, a ñuñda yak bo ñem ngôô. (Ndiimba Mbén 10:18) A mbôn le a ga mélés mandutu map ni njel ane yé, i i yé nyo ngii, i i nsébla ki le Ane Djob; yon i ga héñha énél i bôt ba binam. (Daniel 2:44; Matéô 6:10) Yéhôva a ga gwélél Ane yé inyu tjé Satan Nsohop. (Rôma 16:20) I Ane i, i ga ane i nkoñ ’isi wonsôna, i mélés ki mbagla i biloñ, i i nlôl i jam lini le, hiki loñ i gwé nwé minwaa. Bôt bobasôna hana ’isi, b’a ba ba édi ndik kiki lihaa jada. Mut nye ki nye a’ ba ha bé ki nyégsaga i so ndap yé, inyule Bibel i mbôn le: “Ba ga yén, hiki mut isi nkôô wé u wai ni e yé faigé, mut nye ki nye a ga kônha bé bo woñi, inyule nyo u Yéhôva nu mintôñ mi gwét u mpot hala.”​—Mika 4:4.

 Ndik Ane Djob yotama yon i nla mélés i jam libe lini, le ngandak bôt, i len ini, i kee i yéñ lisolbene i mbok ipe. Yéhôva a ga gwélél Ane yé inyu mélés mandutu ma ma nyégsa bôt i yék mambai map inyu ke solop i mbok ipe. Di wan ngim dihéga:

•   Gwét. “[Yéhôva] a mélés gwét.” (Tjémbi 46:9, MN) Inyu yi lelaa Djob a ga mélés gwét, béñge nkwel unu ni hop Pulasi le, “La paix dans le monde : comment sera-t-elle établie ?”

•   Bôt ba ntét bape, ba boñok bo béba. “[Yéhôva] a’ sôñ bo i moo ma bôt ba ntét bo, ba boñok bo béba.” (Tjémbi 72:14) Inyu nok lelaa bôt ba nla pam i nup mahoñol mabe ma ma bi mal ôm minkañ mu miñem nwap, béñge minkwel mini mi noñna, ni hop Pulasi, le: “Briser le cercle de la haine.”

•   Liyep. “[Yéhôva] a ga sôñ hiyeyeba hi hi mbat mahôla.” (Tjémbi 72:12) Inyu yi lelaa Djob a ga mélés liyep, béñge nkwel unu ni hop Pulasi le, “Peut-on espérer un système économique plus juste ?”

•   Njal. “Bijek bi ga ba ni hisi hiosôna.” (Tjémbi 72:16) Inyu yi lelaa Djob a ga mélés njal ni hisi hiosôna, béñge nkwel unu ni hop Pulasi le, “Plus jamais la faim dans le monde ?”

 Baa Bibel i nla hôla batoñ lisolbene i len ini?

 Ñ. Bibel i nti i bôt ba ntoñ lisolbene i mbok ipe botñem i dilo dilam; i ñunda ki bo lelaa ba nla yémbél mandutu ba boma nano.

 Litiñ li Bibel: “Ni tôñ bañ inyu jam jo ki jo, ndi inyu mam momasôna, ni njel masoohe, ni minyemhe lôñni mayéga, boña le Nyambe a yi mayagal manan; ha nyen nsañ Nyambe, u u nloo mam momasôna mut binam a nla nok, w’a tééda miñem minan ni mahoñol manan.”​—Filipi 4:6, 7.

 Ndoñi: To imbe ndutu u gwé, soohe Djob le a ti we ñem nwee, a mômôs mahoñol moñ. Béñge nkwel unu ni hop Pulasi le: “Philippiens 4:6, 7 : ‘Ne vous inquiétez de rien.’”