Pahn Febiweri 24, 2022, di Russian aami invayd Ukraine. Dis da wahn veri seeryos sichuwayshan weh put lata peepl eena daynja, soh dehn hori chrai lef di konchri. a

 “Lata bom mi-di ekspload. Ah noh ga di werdz fi seh how fraitnin ih mi fraitnin. Wen wi fain owt dat dehn mi ga sohn chrayn weh mi-di kehr peepl owta di konchri, wi mek op wi main fi lef. Eech persn kuda kehr onli wan lee bakpak, soh wi mi haftu lef evriting els bihain. Wi onli kuda mi kehr wi paypaz, medisn, waata, ahn snaks. Wi lef evriting els ahn gaahn da di chrayn stayshan wail di bom dehn mi-di jrap.”—Nataliia, fahn Kharkiv, Ukraine.

 “Eevn op tu di laas minit, wi neva bileev di waar mi wahn hapm. Ah mi hyaa eksploazhan fahn difrent paats a di siti, ahn di windo dehn mi-di shayk. Ah mi disaid fi lef, an Ah onli kehr impoatant tingz. Ah lef hoam 8:00 da maanin ahn kech wahn chrayn weh kehr mi da Lviv, ahn fahn deh Ah kech wahn bos fi goh da Poland.”—Nadija, fahn Kharkiv, Ukraine.

Eena dis aatikl

•  Weh reeli kaaz dis seeryos sichuwayshan?

•  Wehpaat di refyujee dehn ku fain hoap?

•  Di Baibl ku help refyujeez tudeh?

 Weh reeli kaaz dis seeryos sichuwayshan?

 Di sichuwayshan weh di refyujee dehn di goh chroo da Ukraine mi staat bikaaz Russia mi invayd Ukraine. Bot di Baibl tel wi di reel reezn bihain dehnya kaina sichuwayshan:

•   Di hyooman govament dehn kyaahn gi peepl weh dehn need. Peepl eena di govament yoozhwali yooz dehn atariti fi kanchroal peepl ahn chreet dehn bad.—Ecclesiastes 4:1; 8:9.

•   Saytan di Devl, hoo da “di roola a di werl,” ga soh moch kanchroal oava peepl an ih mek dehn du loan bad tingz. Di Baibl seh: “Di hoal werl deh anda di powa a di wikid wan.”—Jan 14:30; 1 Jan 5:19.

•   Peepl di sofa wid aal kaina prablemz fi honjridz a yaaz, bot now wi di liv eena wahn taim weh di Baibl prafesai bowt. Ih seh: “Di laas dayz wahn bee daynjaros ahn laif wahn bee haad.” (2 Timoti 3:1) Di Baibl tel wi dat wi wahn noa wi di liv eena di laas dayz bikaaz dehn wahn ga lata waar, nachral dizaasta, food shaatij, an aal kaina dizeez. Lata peepl wahn haftu lef dehn hoam sayka dehndeh tingz.—Look 21:10, 11.

 Wehpaat di refyujee dehn ku fain hoap?

 Di Baibl shoa wi dat wi Kriyayta, Jehoava, b da wahn Gaad weh ga lov ahn kompashan fi refyujeez ahn fi peepl weh haftu lef dehn hoam. (Deuteronomy 10:18) Hihn pramis fi yooz fi hihn govament, er Kingdom, da hevn fi geh rid a aala di prablemz weh refyujeez di goh chroo. Gaad Kingdom wahn dischrai aal hyooman govament, an ih wahn bee di onli govament weh wahn rool oava di ert. (Daniel 2:44; Machyu 6:10) Jehoava wahn yooz fi hihn Kingdom fi geh rid a Saytan di Devl. (Roamanz 16:20) Da Kingdom wahn rool oava di hoal werl an ih wahn geh rid a aala di boada dehn, soh notn wahn deh fi divaid wi. Evribadi wahn bee wan big yoonaitid famili. Nobadi wahn haftu ron weh fahn dehn hoam eva agen, kaaz di Baibl pramis wi: “Eech wan a dehn wahn sidong anda ih oan vain ahn anda ih oan fig chree, ahn nobadi wahn mek dehn frayd, bikaaz Jehoava, di Komanda a di hevnli aami, don seh it.”—Micah 4:4.

 Onli Gaad Kingdom ku put wahn en tu di seeryos sichuwayshan weh refyujeez di goh chroo eena fi wee taim. Jehoava wahn yooz fi hihn Kingdom fi geh rid a di prablemz weh foas peepl fi bee refyujee. Mek wi luk pahn sohn egzampl:

•   Waar. “[Jehoava] di bring wahn en tu waar.” (Psalm 46:9) Fi laan moa bowt how Gaad wahn en waar fareva, reed di aatikl weh naym “Peace on Earth—How Will It Come?”

•   Injostis ahn vailens. “[Jehoava] wahn reskyu dehn fahn injostis ahn vailens.” (Psalm 72:14) Fi andastan how peepl ku chaynj eni bad atichood weh dehn ga fi wahn lang taim, reed di aatikl dehn eena di magazeen weh naym “Wee Ku Geh Rid a Haychrid.”

•   Poa peepl. “[Jehoava] wahn sayv poa peepl weh krai fi help.” (Psalm 72:12) Fi si how Gaad wahn fiks di prablemz weh mek peepl geh poa, reed di aatikl weh naym “Is a Fair Economic System Possible?”

•   Food shaatij. “Plenti a grayn wahn deh pahn di ert.” (Psalm 72:16) Fi laan bowt how Gaad wahn mek shoar evribadi ga inof food fi eet, reed di aatikl weh naym “A World Without Hunger?”

 Di Baibl ku help refyujeez tudeh?

 Af koars. Di Baibl noh onli gi refyujeez wahn wandaful hoap fi di fyoocha weh dehn ku chros, bot ih aalso help dehn wid di chroblz weh dehn ga now.

 Baibl prinsipl: “Unu noh fi wori bowt notn, bot eena evriting unu mos pray an aks Gaad fi help; bayg ahn wid aala unu haat, ahn giv ahn tanks tu. Den Gaad wahn giv unu wahn kaina pees weh peepl kyaahn andastan. Eena da way, hihn wahn di protek unu haat ahn main chroo Krais Jeezas.”—Filipiyanz 4:6, 7.

 Weh ih meen: Aks Gaad fi help yu ga pees ahn stay kaam eena eni sichuwayshan weh kom op. Si di aatikl weh naym “Philippians 4:6, 7—‘Do Not Be Anxious About Anything.’”