24 lidan bián-hati, irumu 2022, aba hábürühan lisudaranigu Rusia luagun Ukrania. Barüti lira bandi lénrengunga houn saragu míñunu gürigia ani saragu hádangiñe anurahatiña luéi wuribu. a

 “Aba téiguahan bonba, aduuha burí tuguya. Wéiriti meha nanufude darí lun siñá lan nafuranguagüdüni. Dan le wíchugunbei fe hanaahóuña lan gürigia lidoun aban fulasu chóuruti tidan íngiini, aba giñe woudin. Mosu meha wígiruni sun katei wárigiñegua lugundun kada aban wádangiñe ábanrügüboun meha mochila gayara lan anüga. Wánirügüboun meha dugumedu gayara wamá anüga, árani, duna luma somu katei lun weigin. Lidan téiguahaña lan bonba, aba wígiruni sun katei wárigiñegua, ábati woudin le ñein lubéi tarügüdǘwa íngiini” (Natalia, lídangiñe Járkov, Ukrania).

 “Le linarün katei, masaminaruntina yebe luagu laduuchuba lan wuribu. Gumesetina aganba aduuchuni lidan fiu fulasu uburugu ani hingiti burí giñe funedera. Aba lubeiti nidin láurügü le nemegeirubei númagua. Aba náfuridun múnadagiñe ladáün widü binaafin lun nárügüdün aban íngiini to anügübalina darí Lviv, lárigiñe aba nárügüdün aban busu to anügübalina Polonioun” (Nadia, lídangiñe Járkov).

Lidan ariñahani le layanuhóuba luagu:

•  Ka burí lébunabei hanurahan saragu gürigia hageiragiñe?

•  Halía gayara lan hadarirun gürigia ha anurahabaña hageiragiñe emenigini?

•  Gayaraati san tíderaguniña Lererun Bungiu gürigia ha anurahabaña hageiragiñe uguñe weyu?

 Ka burí lébunabei hanurahan saragu gürigia hageiragiñe?

 Íbini gumese lan hanurahan gürigia Ukraniagiñe ladüga hábürühan lisudaranigu Rusia luagun, afuranguagüdatu Lererun Bungiu anihein lan ámuya resun súdinitimati le uágubei lasusereda sun katei le.

•   Mabafutiña gumadimatiña lun híchuguni le hemegeirubei gürigia houn. Lubaragiñe hamuga híderaguniña gürigia, yúsurügü hamuti habafu lun hasufuriragüdüniña (Apurichihati 4:1; 8:9).

•   Satanási, le Mafia, ligía “agumadihabei lidan ubóu le”, yusu lumuti lubafu wuriba ubouagu, darí lun tariñagun Lererun Bungiu: “Lábugiñeñanu […] lubafu Mafia sun ha lánigubaña ubóu” (Huan 14:30; 1 Huan 5:19).

•   Lanwoun turobuli burí le aniheinbei ubouagu lúmagiñe saragu sígulu, wawinwanduña giñe lidan aban dan le uágubei tariñaga Lererun Bungiu: “Liábinburiba […] weyu hénrenguti lídounme lagumuhóun dan” (2 Timotéu 3:1). Le linarün katei, arufuda lumuti burí wuribu, hárabaganali, herigini o katei líbeina lira, ilamaü luma sandi, wawinwanduña lan lidan lagumuhóun dan. Ladügüba meha katei le lun hanurahan gürigia hábiñegiñe (Lúkasi 21:10, 11).

 Halía gayara lan hadarirun gürigia ha anurahabaña hageiragiñe emenigini?

 Ayanuhatu Lererun Bungiu luagu Heowá b, le Adügübaliwa, aban lan Bungiu le hínsiñehabubei houn terencha luma houn gürigia ha anurahabaña hageiragiñe ani gudemehabu lan giñe houn (2 Lúrudu 10:18). Füramasehaali laransehabei lan turobuli le hasufurirubei ha anurahabaña hageiragiñe. Ida? Layusurubei Larúeihan, aban arúeihani le aniheinbei sielu, ani ligíaba heweñegua sun urúeigu ha ubouagubaña (Danieli 2:44; Matéu 6:10). Layusurubei Heowá Larúeihan lun lagumuchun lau Satanási, le Mafia (Rómana 16:20). Lagumuchuba arúeihani le lau sun fánreinguaü le aniheinbei ubouagu. Lídanbaña aban sun gürigia ha ubouagubaña keisi iduheñu. Mámaalime mosu hanurahan gürigia hábiñegiñe, lugundun füramasetu Lererun Bungiu: “Haganóuba súngubei manufudeuga, gayaraabei hemeraagun lábugiñe tamuñadiri hanadürigu. Lererun Wabureme Suntigabafu le!” (Mikeasi 4:4).

 Larúeihanrügübei Bungiu gayara laransehani sun turobuli le adügübei lun hanurahan gürigia hageiragiñe, kei lasuseredun uguñe weyu. Ani ligíaba ladüga. Ariha wamá fiu lídangiñe:

•   Wuribu. “Gumuguagüdalá [Heowá] wuribu chülǘ lumoun lagumuhóun larigeirugu ubóu” (Sálumu 46:9). Lun hasubudiruni ida luba lan lagumuchun Bungiu lau wuribu, aliiha huméi ariñahani “¿Cómo llegará a haber paz en la Tierra?”.

•   Anarimeni luma óuserawaguni. “Lesefurubaña [Heowá] hawéi ha óuseragubaliña” (Sálumu 72:14). Lun harihini gayara lan hasansiruni gürigia luriban hagaburi, aliiha huméi ariñahani le gíribei “Ígira waméi iyereehabúni”.

•   Gudemei. “Lesefurubaña [Heowá] gudemetiña ha ayumuragubaña” (Sálumu 72:12). Lun harihini ida luba lan lagidaruni Bungiu sun le adügübei lun ñein lan gudemei, aliiha huméi ariñahani “¿Es realista esperar un sistema económico justo?”.

•   Ilamaü. “Ñeinlá saragu türigu fulasurugu” (Sálumu 72:16). Lun harihini kaba lan ladüga Bungiu lun ua hamá asufurirutiña ilamaü, aliiha huméi ariñahani “¿Un mundo sin hambre?”.

 Gayaraati san tíderaguniña Lererun Bungiu gürigia ha anurahabaña hageiragiñe uguñe weyu?

 Anha. Mámarügüñein emenigini lubá ámuñegü tíchiga Lererun Bungiu houn ha anurahabaña hageiragiñe, rutu giñe adundehani houn le íderagubaliña agagibudagua luma lénrengunga le uguñebei.

 Bérusu tídangiñeti Lererun Bungiu: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Filipuna 4:6, 7).

 Le mini lubéi: Meberesenga sügǘ le úmati hagagibudagua, amuriaha humá luma Bungiu lun líchugun darangilaü lun hisaminan luma tun hanigi. Aliiha huméi ariñahani le gíribei “Filipenses 4:6, 7 | ‘No se inquieten por nada’”.