2022, February 24 ah Russia nih Ukraine kha a doh. Mah nih ṭih a nung tukmi thil sining a chuahter, mi nuai tampi cu harnak an tong i an ram in chuah colh awkah an i zuam. a

 “Bomb hna a puak. Ṭih a nun tuk caah a chim zia hmanh kan thiam lo. Zamnak tlanglawng a um ti kan theih tikah zam dingin bia kan khiah. Mi pakhat nih bag fate pakhat lawng i put khawh a si caah kan ngeihmi thilri vialte cu kan kaltak dih. A biapimi catlap, sii, ti le changreu tlawmte lawng kan i ken khawh. A dang thil vialte kha cu kan kaltak, kan pawng i bomb a puah cuahmah lioah tlanglawng dinhnak hmun ah kan kal.”—Nataliia, Ukraine, Kharkiv khua.

 “Raltuknak aa thawk hlan tiang cu an i do taktak lai lo tiah kan ruah. Khua chung i hmun cheukhat in bomb puah thawng hna ka theih i thlalangawng hna cu aa hnin dih. Cucaah a herh taktakmi thil lawng kha lak in zam awkah bia ka khiah. Inn in zinglei suimilam 8:00 in ka chuak i Lviv ah tlanglawng in ka kal, cun Poland ah mawṭaw in ka kal ṭhan.”—Nadija, Ukraine, Kharkiv khua.

Hi capar ah

•  Ralzam dirhmun an phanhnak a ruang taktak cu zeidah a si?

•  Ralzam pawl nih khoika in dah ruahchannak an hmuh khawh?

•  Tuchan i ralzam pawl kha Baibal nih a bawm kho hna maw?

 Ralzam dirhmun an phanhnak a ruang taktak cu zeidah a si?

 Ukraine in an zamnak a ruang cu Russia nih a doh hna caah a si. Asinain ralzam dirhmun an phanhnak a dang a ruang kha Baibal nih thuk deuh in a langhter:

•   Minung cozah hna nih vawleicung pumpi i mi pawl herhmi kha an pe kho hna lo. Nawlngeitu pawl nih an nawlngeihnak kha mi pawl uk awk le a ding loin pehtlaih awkah an hman tawn.—Phungchimtu 4:1; 8:9.

•   Satan Khuachia, “vawlei uktupa” cu minung cungah a ṭhatlonaklei in huham a ngeih caah Baibal nih hitin a ti: “Vawlei hi a pumpi in mi ṭhalopa kut tangah a um.”—Johan 14:30; 1 Johan 5:19.

•   Kumzabu tampi chung minung nih kan tonmi buaibainak lengah kannih cu Baibal nih a chimchungmi mah caan ah kan nung cang: “Ni hmanung bik kha an phak tikah harnak caan a si lai ti kha philhhlah.” (2 Timote 3:1) Mah lawng si loin raltuknak, leiser ral, mangṭam, pulrai le mi nih an inn an zamtakmi thil sining hna nih ni hmanung bik ah kan nung ti kha a langhter.—Luka 21:10, 11.

 Ralzam pawl nih khoika in dah ruahchannak an hmuh khawh?

 Baibal nih a kan Sertu, Jehovah b cu ralzam le an inn a zamtakmi hna cungah dawtnak le zaangfahnak a ngeimi Pathian a si tiah a ti. (Deuteronomi 10:18) Minung cozah a airawl dingmi, Pathian Pennak tiah auhmi vancung a cozah hmangin ralzam pawl tonmi buaibainak vialte kha ka tawnghtham dih lai tiah bia a kan kamh. (Daniel 2:44; Matthai 6:10) Jehovah nih a Pennak kha Satan Khuachia hrawhnak caah a hman lai. (Rom 16:20) Mah Pennak nih vawleicung pumpi kha a uk lai i ramri ruangah i ṭhencheunak hna kha a hrawh dih lai. Mi vialte cu a lung aa rualmi chungkhar pakhat in dirh an si lai. Baibal nih hitin bia a kan kamh caah ahohmanh nih an inn kha an zamtak ti lai lo: “Pakhat le pakhat ahohmanh hnahnawhnak i pe lo tein anmahle an mitsur ruang toi cio le an theipi kung toi cio ah khua an sa hna lai; Zeicahtiah hi bia cu ralkapbu BAWIPA hrimhrim nih a chimmi a si.”—Mikah 4:4.

 Tuchan ah ralzam pawl nih an tonmi harnak kha Pathian Pennak lawng nih zungzal in a tawnghtham khawh. Jehovah nih a Pennak kha ralzam harnak a tontermi buaibainak hna hrawhnak caah a hman lai. Tahchunhnak cheukhat in zohhmanh u sih:

•   Raltuknak. “[Jehovah nih] ral cu a daihter dih ko hna.” (Salm 46:9) Pathian nih i dohnak hna zeitindah a donghter lai timi kong hngalh awkah “Vawlei Daihnak Zeitindah Hmuh Khawh A Si?” timi capar kha rel.

•   Hremnak le zaangennak. “Hremnak chung le serhsatnak chungin [Jehovah nih] a khamh hna.” (Salm 72:14) Caan saupi an rak ngeihmi a ṭhalomi ruahnak an thlen ning kong hngalh awkah “Huatnak Donghter Khawh Ning” timi aa pehmi capar kha rel.

•   Sifahnak. “[Jehovah nih ] amah a autu sifakmi hna le retheimi hna . . . kha a chanh hna.” (Salm 72:12) Pathian nih sifahnak hrampi zeitindah a tawnghtham lai timi kong hngalh awkah “A Dingmi Chawlehnak Cu A Um Khote Hnga Maw?” timi capar kha rel.

•   Mangṭam. “Ram chungah rawl tampi in um ko seh.” (Salm 72:16) Pathian nih zeitindah pawṭamnak a tawnghtham lai timi kong hngalh awkah “Pawṭamnak A Um Lomi Vawlei” timi capar kha rel.

 Tuchan i ralzam pawl kha Baibal nih a bawm kho hna maw?

 A bawmh khawh hna. Baibal nih ralzam pawl kha a fiangmi hmailei ruahchannak a pek hna lengah atu ah an tonmi zuamcawhnak hna tei awk zongah a bawmh khawh hna.

 Baibal phunglam: “Zeithil kong hmanhah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. Cun Pathian daihnak, minung hngalhnak a lonhtu nih cun . . . nan lungthin le nan ruahnak cu him tein a chiah lai.”—Filipi 4:6, 7.

 A sullam: Zei bantuk thil sining na ton hmanhah Pathian sinah chunglei daihnak pek awkah thlacam. “Filipi 4:6, 7—‘Zeithil Kong Hmanhah Lungrethei In Um Hlah U’” timi capar kha zoh.