VANGARARENU!
Mamiliyona ghavantu kwatjwayuka mo muUkraine
Mu 24 Kudumo , 2022, vakavita vaRussia kwa homokilire Ukraine, evi kwa kwa tura liparu lyavantu mushiponga nakuvaditopera kutjwayuka mo mushirongo. *
“Boma kwa cukire nakuhanuka. Ovyo vya shorokiro kutjilita shili kuvitimwitira. Opo twa yuvire ashi pana kara train dina kutwaro vantu, natwe mpo twa tokwilire kutjwayuka. Twa hepire kushuva navintje nakushimba tupu ndjato yimwe. Kwa shimbilire mo tupu dokumente detu, dimutondo, mema ntani tundya twa ngandi. Atwe kwa shuvire navintje tu ka ronde train dado boma kuna hanuka.”—Nataliia, wamuKharkiv, muUkraine.
“Kapi twa vi ghayalire ashi ngaku kara vita. Ame kwa yuvire vininke vina kuhanuko nakucuka kuruha rwapeke rwashirongo ntani makende ghakundjugho kwa kunyungangire. Mpo na tokwire kutjwayuka, ani shimbi tupu tuninke twangandi. Kwa shapukire pa 8:00 ngurangura ani rondo train ni yende kuLviv ntani ani ka ronda besa ni yende kuPoland.”—Nadija, wamuKharkiv, muUkraine.
Mushirongwa shino kutukakenga ashi:
Nke nawa-nawa vya yitito po utjwayuki uno?
Vantu kwa tjwayukire mo muUkraine mbyovyoshi vakavita vaRussia kwa homokilire shirongo osho. Enengoli, Bibeli ya shorora konda dimwe odo da renkitango dogoro vantu va ka tjwayuke:
Mapangero ghavantu kapi gha tikitanga mo vihepwa vyavantu. Mapangero kurughanita unankondo wavo mukuhepekera mo vantu.—Muuditi 4:1; 8:9.
Satana Mudjonaghuli, “mupangeli waudjuni,” kupukita nakushongaura vantu mbyo ngoli Bibeli ya ghambera ashi: “Udjuni nauntje kwa kara mulipangero lyamudona.”—Johannes 14:30; 1 Johannes 5:19.
Kughupako tupu maudito ogho va pita vantu mwaka dadingi, atwe kuna kuparuka paruvede oro ya pumbire Bibeli ashi: “Pamayuva ghapauhura ngapa kara viruwo vyavidito.” (2 Timotheus 3:1) Ntani nka ngapa kara vita, mahudi, lirumbu nalihamba, vipimpo ovyo vya rekintango vantu va tjwayuke.—Lukas 21:10, 11.
Kuni vatjwayuki va wana lihuguvaro?
Bibeli kwa shorora ashi Jehova, * Mushiti wetu ghuye Karunga washihoro ntani kufera nkenda va tjwayuki navantu ovyo va hepo kushuva mandi ghavo. (Deuteronomium 10:18) Ghuye a twenyidira kughupapo udito wavatjwayuki kupitira mulipangero lyendi lyamuliwiru, Uhompa waKarunga, ogho ngau ya pinganeno po pamapangero ghavantu. (Ndaniyera 2:44; Mattheus 6:10) Jehova nga rughanita Uhompa wendi mukughupa po Satana Mudjonaghuli. (Roma 16:20) Uhompa ogho ngau pangera udjuni nauntje, ngau ghupapo dimururani odo dagaununo vantu. Vantu naventje ngava kara lipata nalimwe udjuni nauntje. Kundere ko nka uwe ogho nga tjwayuka mumundi wendi, morwa Bibeli ya twenyidira ashi: “Keheghuno nga shungira mushitondo shendi shashindjembere ntani shaghukuyu ntani kwato ogho ngava tjilito, ngoli ana kughamba Jehova wavakavita.”—Miga 4:4.
Uhompa waKarunga tupu ngo ngau koshonono po udito wavatjwayuki tuna kumona mayuva ghano. Jehova nga rughanita Uhompa wendi mukughupapo maudito ogho a renkitango vantu va tjwayuke. Kengenu vihonenito:
Vita. “[Jehova] nga shayikita po vita.” (Pisalme 46:9) Mukuyiva omo Karunga nga shayikita po vita, varura shirongwa “Weni mbili ngayi ya po palivhu?”
Lihepeko nanyanya. “[Jehova] ngatu yovora mo mulihepeko nanyanya.” (Pisalme 72:14) Mukukwata lighano omu vantu va vhuranga kutjindja nkalito dadidona, varura virongwa vya shiparatjangwa ashi: “Kushayikita po nkalito yanyengo.”
Ruhepo. “[Jehova] nga yovorora vanaruhepo ovo va kughango mbatero.” (Pisalme 72:12) Mukuyiva omo Karunga nga ka ghupapo ntundiliro yaruhepo, varura shirongwa ashi: “Ruhepo shili ngaru shayapo ndi?”
Lirumbu. “Livhu ngali tapa muyangu wawungi.” (Pisalme 72:16) Mukuyiva omo Karunga nga ka kutika vantu navantje, varura shirongwa ashi “Undjuni wakupira ndjara.”
Kuvhura Bibeli yi vatere vatjwayuki namuntji ndi?
Nhi. Kughupa ko tupu kutapa lihuguvaro kuvatjwayuki, Bibeli kuvhura kuvavatera mumaudito vana kupita weno.
Mpango yaBibeli: “Ligova kupura kehe nkango lina yuvhu, ngoli munandunge kughayadara ko ngudu.”—Vishegho 14:15.
Litanto: Ghayadara ko maukaro ghamadona ogho gha vhuro kukushorokera ntani ovyo ngau rughana u kupopere. Takamita vakorokotji ovyo va shano kuhepeka vatjwayuki morwa va yiva ashi vavo vayeni mushirongo.
Mpango yaBibeli: “Ntjene tuna kara nandya novidwata ndi vitugwanene po.”—1 Timotheus 6:8.
Litanto: Wa sha kutura mo ngudu mulimona. Nangeshi u kare vina kugwanene po, ngau hafa ngudu.
Mpango yaBibeli: “Kehe vino ovyo mwa shanena vantu ashi va vi mu renkere, nanwe mu vi va renkerange.”—Mattheus 7:12.
Litanto: Kudidimike ntani kara nankedi dadiwa. Evi ngavi kuvatera va kufe likuto nakukutambura mumukunda.
Mpango yaBibeli: “Mwa sha kuvyutira-vyutira ruvoko.”—Roma 12:17.
Litanto: Wa sha pulitira ugara u kurenkite u vyute ruvoko ntjene vana kutekura mwamudona. Nkoko kuwederera tupu kuudito.
Mpango yaBibeli: “Ame kuvhura navintje munkondo doghu a mpamekango.”—Filipi 4:13.
Litanto: Tura Jehova muhovo muliparu lyoye nakuraperera kwendi. Ghuye nga ku pa nkondo ghukudidimike.
Mpango yaBibeli: “Mwa sha kupakera shinka shakehe vino, ngoli tapenu vinka vyenu navintje kwaKarunga, rarepererenu namuntjima nauntje nakushungida kwendi nakutapa mpandu. Makura Karunga nga mu pa mbili oyo va piranga kukwata lighano vantu, ghuye nga takamita dimushima namaghayaro ghenu kupitira mwaJesus Kristus.—Filipi 4:6, 7.
Litanto: Shungida Karunga a ku pe mbili yamumushima mwakehe ukaro una kupita. Kenga shirongwa “Filipi 4:6, 7—‘Mwa sha kupakera shinka shakehe vino.’”
^ Liyuva lyakukwama ko kutunda opo Ukraine va yi homokilire, mbunga ya karero po vatjayuki [the United Nations High Commissioner for Refugees (UNHCR)] kwa ghambire ashi ou kuna kara udito waunene po ngudu wankwangu. Mumayuva tupu 12, vantu vakupitakana pamamiliyona maviri kwa tjwayukire mo muUkraine va yende kuvirongo vyapeke, ano ngoli vantu limiliyona kwa kuhanine mwayenda shirongo.
^ Jehova kuna kara lidina lyaKarunga. (Pisalme 83:18) Kenga shirongwa “Are Jehova?”
You May Also Like
Russia kwa homokera Ukraine—Uporofete waBibeli kuna kutika mo ndi?
Nangeshi kuna kutikamo, Bibeli yanegheda omo ngavi shaghapo ndi?
