Russia asogyafo too hyɛɛ Ukraine man no do wɔ February 24, 2022, na iyi ama nyimpa pii rihyia ɔhaw ahorow na woruguan fi ɔman no mu osian ɔko no ntsi. a

 “Wɔtotoow topaa. Nna ɔyɛ hu papa, munnhu asɛm mpo a menka mfa nkyerɛkyerɛ dza osii no mu. Aber a yɛtsee dɛ train bi aba, na obiara a ɔpɛ otu fi hɔ no botum akɔfow bi no, yɛyɛɛ hɛn adwen dɛ yebotu efi hɔ. Nna ɔwɔ dɛ yegya biribiara wɔ hɔ, osiandɛ nna ndzɛmba kakraabi pɛ na obiara botum afa dze akɔ. Ndzɛmba a yetum dze kɔree araa nye hɛn documents, ndur, nsu, nye edziban kakra. Biribiara a wɔaka biara yegyaa no hɔ kɔr train stehyɛn hɔ. Yɛrokɔ no nyinara, nna wogu do rototow topaa.”​—Nataliia, ofi Kharkiv, Ukraine.

 “Nna menngye nndzi dɛ ɔko bi botum esi wɔ ha kesi dɛ metsee dɛ ntokura rowosowosow na topaa repaapaa wɔ kurow no n’afa bi. Ntsi mefaa ndzɛmba kakrabi a no ho hia paa no na mubuu me kɛtɛ mu. Mifii fie anapa ndɔnwɔtwe, na mekɛfaa train kɔr Lviv. Afei mefaa bɔɔs wɔ hɔ dze kɔr Poland.”​—Nadija, ofi Kharkiv, Ukraine.

Ibenya dɛm nsɛmbisa yi ho mbuae wɔ asɛm yi mu:

•  Ebɛnadze na wɔakɛfa dɛm ɔhaw yi nyina aba ma nyimpa pii ruguan fi hɔn man mu yi?

•  Hɔn a woeguan efi hɔn man mu no, henfa na wobotum enya enyidado?

•  Ana Bible no botum aboa hɔn a woeguan efi hɔn man mu ndɛ no?

 Ebɛnadze na wɔakɛfa dɛm ɔhaw yi nyina aba ma nyimpa pii ruguan fi hɔn man mu yi?

 Dza wɔama nyimpa pii ruguan fi Ukraine no nye dɛ Russia asogyafo akɔto ahyɛ hɔn do. Naaso, Bible no ma yehu pii fa siantsir a nyimpa pii guan fi hɔn man mu no ho; na no mu bi na odzidzi do yi:

•   Sɛ ekɔ wiadze yi mu beebiara a, nyimpa aban ama ne hɔn amamfo nsa esi famu. Mpɛn pii no, aban mu mpanyimfo dze tum a wɔwɔ no hyɛ hɔn mamfo do.​—Ɔsɛnkafo 4:1; 8:9.

•   Satan Abɔnsam a ɔyɛ “wiadze hen” no robɔ mbɔdzen biara dɛ ɔbɛma nyimpa ada no suban bɔn no bi edzi. Bible no ka dɛ: “Wiadze nyina da ɔbɔn no mu.”​—John 14:30; 1 John 5:19.

•   Ɔhaw atseetsee nyimpa fi tsetseetse dze ebesi ndɛ. Na nnyɛ ɔno nko, Bible no ka dɛ: ‘Nda a odzi ekyir no mu no mber a no yɛ dzen bɛba.’ (2 Timothy 3:1) Na dɛm mber no mu na yɛwɔ yi. Afei so, ɔka ndzɛmba a obesisi a ɔbɛma yehu dɛ yɛtse nda a odzi ekyir no mu no ho asɛm. Bi nye akodzi, atoyerɛnkyɛm, edzibankɔm, nye ɔyardɔm​—iyi nyina yɛ ndzɛmba a ɔma obi guan fi ne man mu.​—Luke 21:10, 11.

 Hɔn a woeguan efi hɔn man mu no, henfa na wobotum enya enyidado?

 Bible no ma yehu dɛ Jehovah b Nyankopɔn a ɔyɛ hɛn Bɔfo no wɔ ɔdɔ na ayamuhyehye ma hɔn a biribi ntsi woeguan efi hɔn man mu anaa biribi ntsi woefi hɔn fie no. (Deuteronomy 10:18) Ɔahyɛ bɔ dɛ, ɔhaw a nyimpa a wɔtse dɛm no rihyia nyina, obeyi efi hɔ. Na ɔnam n’aban a ɔwɔ sor a wɔfrɛ Nyankopɔn n’Ahendzi no do na ɔbɛyɛ iyi. Obeyi nyimpa aban nyina efi hɔ. (Daniel 2:44; Matthew 6:10) Jehovah nam n’Ahendzi no do beyi Satan Abɔnsam efi hɔ. (Romefo 16:20) Dɛm Ahendzi no bedzi asaase yi nyina do tum; adasamba nyina bɛyɛ kor na mpaapaamu biara remmba hɛn mu. Dɛm aber no, no ho rinnhia dɛ obi guan fi ne fie osiandɛ Bible no ahyɛ bɔ dɛ: “Wɔbɛtsenatsena nyimpa biara wɔ no wenyindua na n’adɔmbadua ase; na obi rinnyi hɔn hu: na dɔm Ewuradze n’ano na ɔaka.”​—Micah 4:4.

 Nyimpa pii rihyia nsɛndzendzen ahorow wɔ hɔn man mu; dɛm ntsi wɔama woetu efi hɔ. Nyankopɔn n’Ahendzi no nkotsee na obotum eyi dɛm ɔhaw yi efi hɔ. Ndzɛmba a ɔma nkorɔfo guan fi hɔn man mu no nyina, Jehovah nam n’Ahendzi no do beyi efi hɔ. Iyinom bi nye:

•   Akodzi. ‘Jehovah bɛma akodzi abɔ adze.’ (Ndwom 46:9) Sɛ epɛ ihu mbrɛ Nyankopɔn bɛyɛ iyi a, kenkan asɛm a wɔato dzin “Peace on Earth​—How Will It Come?”

•   Nhyɛdo na emumuyɛsɛm. Jehovah bɛgye nyimpa efi nhyɛdo na emumuyɛsɛm mu. (Ndwom 72:14) Sɛ suban bɔn bi agye ndwow wɔ obi no mu a, ɔbɛyɛ dɛn etu ase? Kenkan asɛm a wɔato dzin “Breaking the Cycle of Hatred.”

•   Ohia. Jehovah bɛgye ohianyi a osu frɛ no no. (Ndwom 72:12) Sɛ epɛ dɛ ihu mbrɛ Nyankopɔn bedzi ndzɛmba ahorow a ɔdze ohia ba no ho dwuma a, kenkan asɛm a wɔato dzin “Is a Fair Economic System Possible?”

•   Edzibankɔm. “Wɔmma eburow piigyan mbra asaase no do.” (Ndwom 72:16) Nyankopɔn bɔhwɛ ehu dɛ ɔkɔm renndze obiara. Sɛ epɛ dɛ ihu kwan a ɔbɛfa ayɛ dɛm a, kenkan asɛm a wɔato dzin “A World Without Hunger?”

 Ana Bible no botum aboa hɔn a woeguan efi hɔn man mu ndɛ no?

 Nyew. Bible no ma hɔn a woeguan efi hɔn man mu no enyidado dɛ daakye ndzɛmba bɛyɛ yie. Na ɔsan so ma afotusɛm a obotum aboa hɔn a wɔwɔ dɛm tsebea yi mu yi ma woeegyina nsɛndzendzen ahorow a worihyia no ano.

 Bible mu afotusɛm: “Mma hom nnyɛ dadwen wɔ biribiara ho, na adze nyina mu hom mfa asɔr nye nkotoserɛ nye ndaase mma hom ebisadze ndu Nyame asomu. Na Nyankopɔn asomdwee a ɔtra ntseasee nyina no, ɔbɔweɔn hom akoma nye hom adwen.”​—Philippifo 4:6, 7.

 Dza ɔkyerɛ: Ɔhaw biara ibehyia no, serɛ Nyankopɔn dɛ ɔmma wo asomdwee na ɔnka w’akoma nto wo yamu. Hwɛ asɛm a wɔato dzin “Philippians 4:6, 7​—‘Do Not Be Anxious About Anything.’”