To 24 février 2022, Russie de awhànfọ biọ Ukraine, ehe zọ́n bọ ogbẹ̀ gbẹtọ livi susu tọn to owù mẹ bọ yé to tintẹnpọn nado tọ́n sọn otò lọ mẹ to niyaniya mẹ. a

 “Yè to bọmbu lẹ yìn gbọn kámẹ-gòmẹ. E dobu sọmọ bọ n’ma tlẹ gán jlẹ lee nulẹ yì do taun. Whenue mí sè dọ pinpán to mẹlẹ bẹ sọn lẹdo owùnọ lẹ mẹ, mí bayi dide nado do pinpán lọ. Mí dona jo nulẹpo do, na saki pẹvi de janwẹ mẹdopodopo dona hẹn. Nue mí gán bẹ lẹ ma hugan, owe vivẹ́ lẹ, amasin, osin po onú kleun he mí na dù po. Mí jo nulẹpo do bo dedo fie mí na do pinpán te lọ bọ bọmbu lẹ to núdọ lẹdo mí.”—Nataliia he wá sọn Kharkiv to Ukraine.

 “Kakajẹ whenue awhàn lọ bẹ, mí ma yọnẹn dọ awhàn na jọ nugbo. N’jẹ bọmbu lẹ sin ’gbè sè ji sọn tòdaho lọ mẹ bọ fleṣe lẹ to whinwhàn. N’bayi dide nado họ̀n bo bẹ nuhe sin hudo n’na do lẹ kẹdẹ. Ogàn 8 mẹ afọnnu wẹ n’tlọ́n whégbè bo do pinpán yì Lviv, enẹgodo n’wá do mọto dedo Pologne.”—Nadija he wá sọn Kharkiv to Ukraine.

To hosọ ehe mẹ

•  Naegbọn mẹlẹ do họ̀njẹgbé nado yì dín fie yé na bẹta do?

•  Etẹwẹ gán na todido mẹhe to fibẹtado dín lẹ?

•  Be Biblu gán gọalọna fibẹtado-dintọ lẹ ya?

 Naegbọn mẹlẹ do họ̀njẹgbé nado yì dín fie yé na bẹta do?

 Awhàn he Russie tọ́n Ukraine wẹ zọ́n bọ mẹlẹ họ̀njẹgbé sọn otò lọ mẹ nado yì dín fie yé na bẹta do. Amọ́, Biblu sọ dọ nudevo he nọ zọ́n taun bọ gbẹtọ lẹ do nọ lẹzun fibẹtado-dintọ:

•   Lẹdo aihọn pé, gandudu gbẹtọvi lẹ tọn ko gboawupo nado na gbẹtọ lẹ nuhe sin hudo yé do. Aṣẹpatọ lẹ nọ saba yí aṣẹpipa yetọn zan do gbidikọna gbẹtọ lẹ.—Yẹwhehodọtọ 4:1; 8:9.

•   Satani Lẹgba, he yin “ogán aihọn tọn lọ” nọ hẹn gbẹtọ lẹ nado wà nuylankan, abajọ Biblu do dọ dọ “Aihọn lọ pete tin to huhlọn mẹylankan lọ tọn glọ.”—Johanu 14:30; 1 Johanu 5:19.

•   Gbọnvona adán he to gbẹtọ lẹ gbò na owhe kanweko susu lẹ, mí sọ to gbẹnọ to ojlẹ de he Biblu dọ dọdai etọn mẹ: “To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin.” (2 Timoti 3:1) To ojlẹ ehelẹ mẹ, awhàn, nugbajẹmẹji jọwamọ tọn, núdùdù whèdomẹ po azọ̀nylankan lẹ po na nọ wá aimẹ—nujijọ ehelẹ nọ zọ́n bọ mẹlẹ nọ họ̀njẹgbé.—Luku 21:10, 11.

 Etẹwẹ gán na todido mẹhe to fibẹtado dín lẹ?

 Biblu dohia dọ Mẹdatọ mítọn, Jehovah b Jiwheyẹwhe tindo owanyi bosọ nọ hò mẹhe to fibẹtado dín lẹ po mẹhe nuhahun zọ́n bọ yé họ̀njẹgbé lẹ tọn po pọ́n. (Deutelonomi 10:18) E dopà nado zan gandudu olọn mẹ tọn etọn he nọ yin Ahọluduta Jiwheyẹwhe tọn nado didẹ nuhahun fibẹtado-dintọ lẹ tọn, podọ Ahọluduta enẹ wẹ na diọtẹnna gandudu gbẹtọvi lẹ tọn. (Daniẹli 2:44; Matiu 6:10) Jehovah na yí Ahọluduta etọn zan do de Satani Lẹgba sẹ̀ sọn aimẹ. (Lomunu lẹ 16:20) Ahọluduta lọ na dugán lẹdo aihọn pé bo na de kinklan he dogbó otò dopodopo tọn nọ hẹnwa sẹ̀. Gbẹtọvi lẹpo na nọ wanu dopọ di whẹndo dopo lẹdo aihọn pé. Mẹdepope ma nasọ họ̀njẹgbé ba, na Biblu dopà dọ: “Mẹdopodopo na nọ sinai to vẹntin etọn glọ podọ to ovòtin etọn glọ, bọ mẹde ma na nọ dobuna yé, na onù Jehovah awhànpa lẹ tọn wẹ ko dọ ẹ.”—Mika 4:4.

 Ahọluduta Jiwheyẹwhe tọn kẹdẹ wẹ gán hẹn pọngbọ tẹgbẹ tọn wá na nuhahun he fibẹtado-dintọ lẹ to pipehẹ to egbehe lẹ. Jehovah na yí Ahọluduta etọn zan do de nuhahun he nọ zọ́n bọ gbẹtọ lẹ nọ lẹzun fibẹtado-dintọ lẹ sẹ̀. Pọ́n delẹ to nuhe e na desẹ lẹ mẹ:

•   Awhàn. “[Jehovah] to awhàn hẹnwa opodo.” (Salmu lẹ 46:9) Eyin a jlo na yọ́n lehe Jiwheyẹwhe na doalọtena hunyanhunyan lẹ do, hia hosọ lọ “Jijọho to Aigba Ji—Nawẹ E Na Wá Gbọn?”

•   Kọgbidinamẹ po danuwiwa po. “[Jehovah] na nọ whlẹn yé sọn kọgbidinamẹ po danuwiwa po mẹ.” (Salmu lẹ 72:14) Hia hosọ debọdo-dego lọ lẹ “A Gán Gbawhàn Wangbẹna Tọn” nado yọ́n lehe gbẹtọ lẹ gán jo jijọ ylankan yetọn lẹ do dó.

•   Ohẹ́n. “[Jehovah] na nọ whlẹn wamọnọ he to awhádo na alọgọ” lẹ. (Salmu lẹ 72:12) Eyin a jlo na yọ́n lehe Jiwheyẹwhe na de adọ̀ ohẹ́n tọn sẹ̀ do, hia hosọ lọ “Be Nuhahun Akuẹ Ma Mọ Zan Tọn Na Wá Pọnte Ya?”

•   Núdùdù whèdomẹ. “Jinukun susugege na tin to aigba ji.” (Salmu lẹ 72:16) Eyin a jlo na yọ́n lehe Jiwheyẹwhe na hẹn ẹn diun dọ mẹde ma na ba núdùdù pò do, hia hosọ lọ “Plus jamais la faim dans le monde?”

 Be Biblu gán gọalọna fibẹtado-dintọ lẹ ya?

 Gbau. Gbọnvona todido dejidego he Biblu na fibẹtado-dintọ lẹ, e gán sọ gọalọna yé nado pehẹ nuhahun lẹ todin.

 Ayinamẹ Biblu tọn: “Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn po nugopipe apọ̀nmẹ tọn mìtọn po.”—Filipinu lẹ 4:6, 7.

 Zẹẹmẹ: Biọ Jiwheyẹwhe dọ ni na we jijọho ahun mẹ tọn to ninọmẹ depope he mẹ a te. Hia hosọ lọ “Filipinu lẹ 4:6, 7—‘Mì Jẹtukla Nudepope Tọn Blo.’”