Omu Siku 24, Mwezi gwa 2, 2022 e Russie yarhera e Ukraine, charhuma akalamo ka bantu kamama kaba omu buhanya omu kuntu byabahema balibirhe juba-juba. a

 “Amabombe maliri mabasha. Byalikomere omu kuntu ntenji gurhe nakabiderha. Rhwayunvirhe oku hali e train z’okulibisya abantu, rhwabona oku nerhu rhugende. Byalihemere rhuleke byoshi. Kasakoshi k’oku mugongo konyine k’omuntu aliri alibirhana. Rhwarhola amadokima, amafumu, amenji, n’empamba ngeke hoshaho. Rhwaleka byoshi n’okulibirhira ahe train enasika eyi banali bashurha amabombe.”—Nataliia, we Kharkiv, Ukraine.

 “Kugera ahabyahwanzizaga, rhurhaliri rhwawaza oku kweri haba evita. Naliri nayunva amabombe yi makungula omu zindi ngambo z’evile, n’amadirisha manachishaganya. Nabona oku nani ngende. Nalibirhana orhuntu rhutyuli rhw’akamaro rhonyine. Narhengaga ah’ambuga zaliri s’ebiri z’esezi, narhola e train y’okuja e Lviv, naho naja omu bisi ye Poland.”—Nadija, we Kharkiv, Ukraine.

Ebili mu gunola mwazi

•  Kanuni bichi bilerhere ebila bibazo byoshi by’okubunga?

•  Ngahe barefijiye (empunzi) bakakula obunihire?

•  Ebibliya yakarhabala barefijiye zene si?

 Kanuni bichi bilerhere ebila bibazo byoshi by’okubunga?

 Ebibazo by’okubunga omu Ukraine byarhonderaga emango e Russie erherabo. Aliko, Ebiblia eyerekene ebindi byago bikulu bilerhere ebila bibazo byoshi by’okubunga:

•   Oburhegesi bw’abantu b’omu gulu lyoshi bwagambirwe kulerhera abantu ebi bakenere omu kalamo. Abali barhegeka bazigana kukolesa oburhwali bwabo omu kubabaza abandi.—Muhubiri 4:1; 8:9.

•   Shetani Ibilisi, “omurhegesi w’egulu,” ali ahira abantu mw’ amashumi mabi omu kuntu Ebiblia ederhere mpu: “Egulu lyoshi lili omu buhashe bw’olala mubi.”—Yohana 14:30; 1 Yohana 5:19.

•   Olekere ebibazo byoshi byamashurha abantu omu magana m’emyaka mamagera, rhumenyere oku rhulamire omu chihe Ebiblia yabaga yaderaha mpu: “Omu siku zizinda nji haba ebihe bidarhi bikomere okubilembera.” (2 Timoteo 3:1) Oku bwindi, echakayerekene ezola siku zizinda; makabere mavita, ebinjira, echibula ch’ebilyo, amalwala m’okuyahukira; n’ebyola byoshi byanarhuma abantu babunga banaleka enju zabo.—Luka 21:10, 11.

 Ngahe barefijiye bakakula obunihire?

 Ebiblia eyerekene oku Omulemi werhu Yehova, b ali Mungu ojira obuzigire n’akasisi ku barefijiye n’abantu balibirhire n’okuleka enju zabo. (Kumbukumbu la Torati 10:18) Alaganyize oku amala ebibazo bya barefijiye kugerera oburhegesi bw’embingu, buyirikirwe Bwami bwa Mungu. Nji bwagombola oburhegesi bw’abantu. (Danieli 2:44; Matayo 6:10) Yehova nj’akolesa Obwami bwage omu kushahula Shetani Ibilisi. (Waroma 16:20) Obola Bwami nji bwarhegeka egulu lyoshi, bwanamala akavulindi kalerherwe n’emipaka y’ebihugo abantu bahirireho. Abantu boshi nji baba mu mulala muguma g’omu gulu lyoshi. Ntaye nji wachilibirha akaleka ahamwage, bulala Ebiblia elaganyize: “Buli muntu nji ayikala omu shi w’omurhi gwage g’omuzabibu n’og’omutini, na ntaye nji wabarhinga, bulala obunu bwa Yehova w’oburungu bwabiderhere.”—Mika 4:4.

 Obwami bwa Mungu bonyine bwakamamala loshi-loshi ebibazo by’okubunga rhuli rhwabona zene. Yehova nj’akolesa Obwami bwage omu kumala ebyago byoshi bili byarhuma abantu bababunga banahinduka barefijiye. Rhurhole mifano migeke:

•   Evita. “[Yehova] amalire amavita moshi.” (Zaburi 46:9) Y’obona gurhe Mungu nji amala entambala oku gulu, osome omwazi “Amani Duniani—Itapatikanaje?” (Omurhula oku Gulu—Gurhe Nji Gwabonekana?)

•   Okulibuzwa n’okurhindibuzwa. “Yehova nj’abachungula oku bali babarhindibuza n’okubalibuza.” (Zaburi 72:14) Y’oyunva gurhe abantu bakagala kuhindamula engeso zibi zali zabasharhangenemo, osome emyazi y’enkulikirane ederhere “Mambo ya Kufanya Juu ya Kuachana na Chuki.” (Okuntu wakaleka Olushombo)

•   Obukene. “[Yehova] nj’ayokola omukene oli walaka bamurhabale.” (Zaburi 72:12) Y’obona gurhe Mungu nj’amala ebibazo bikulu binalerha obukene, osome omwazi “Ka Byakashoboka Obukungu bwe Gulu Bugabanwe Kangana-ngana?”

•   Echibula ch’ebilyo. “Nji haba embeke zinene oku gulu.” (Zaburi 72:16) Y’obona ebi Mungu nji ajira omu kuntu ntaye ochibage nzara, osome omwazi “Ulimwengu Usio na Njaa” (Egulu Lirhali mu Nzara Lyakabaho si?)

 Ebiblia yakarhabala barefijiye zene si?

 Nechi. Olekere okuha ba refijiye obunihire bwinja bw’amango mayinjire, kandi Ebiblia yakabarhabala bagale kulwisa ebibazo bali bahurana na mu mano mango.

 Akanuni ke Biblia: “Ntacho chishibage chabalaza, s’omu bintu byoshi, kugerera esala n’okusengerera haguma n’okuderha koko, mumenyese Mungu ebimuhunire; n’omurhula gwa Mungu guchubukire byoshi omuntu akagala kuyunva gwalanga emirhima yenyu n’enkengero zenyu.”—Wafilipi 4:6, 7.

 K’okuderha: Oheme Mungu akuhe omurhula omu bwenge n’omu murhima chiro wahurana ebibazo bili gurhe. Olole omwazi “Wafilipi 4:6, 7—‘Msihangaike Kuhusiana na Jambo Lolote.’” (Wafilipi 4:6, 7—Ntacho Chishibage Chabalaza)