Ginsugdan sang Russia ang pag-atake sa Ukraine sang Pebrero 24, 2022. Bangod sini minilyon ka mga sibilyan ang nabutang sa katalagman kag nagtinguha sila nga magsaylo sa iban pungsod. a

 “May mga bomba kag mga paglinupok. Indi ko mapaathag kon daw ano gid ini ka makahaladlok. Sang nabal-an namon nga may mga tren nga nagapasakay sa mga nagabakwit, nagdesisyon kami nga maghalin man. Dapat namon biyaan ang tanan kag isa lang ka gamay nga backpack ang madala sang kada isa sa amon. Mga dokumento na lang ang amon madala, bulong, tubig, kag snacks. Ginbiyaan namon ang tanan kag nagkadto kami sa estasyon sang tren samtang nagalinupok ang mga bomba.”—Nataliia, nga taga-Kharkiv, Ukraine.

 “Wala gid kami magpensar nga may matabo nga giyera. May mabatian ako nga mga linupok sa iban nga bahin sang siudad, kag nagatay-ug ang mga bintana. Nagdesisyon ako nga maghalin, kag ang mga kinahanglanon ko gid lang ang akon gindala. Mga alas 8:00 sang aga ako naghalin sa balay kag nagsakay ako sa tren pakadto sa Lviv, kag dayon nagsakay ako sa bus pakadto sa Poland.”—Nadija, nga taga-Kharkiv, Ukraine.

Sa sini nga artikulo

•  Ano ang matuod nga mga rason sining grabe kadamo nga refugee?

•  Diin makakita sang paglaum ang mga refugee?

•  Makabulig bala ang Biblia sa mga refugee subong?

 Ano ang matuod nga mga rason sining grabe kadamo nga refugee?

 Ang grabe kadamo nga refugee halin sa Ukraine nagsugod sang nag-atake ang mga militar sang Russia. Pero may mas madalom pa nga rason suno sa Biblia, kon ngaa grabe kadamo ang mga refugee:

•   Ang mga gobierno sang tawo sa bilog nga kalibutan napaslawan sa paghatag sang mga kinahanglanon sang pareho nila nga mga tawo. Masami nga ginagamit sang mga gobierno ang ila awtoridad para kontrolon kag maltratuhon ang mga tawo.—Manugwali 4:1; 8:9.

•   Si Satanas nga Yawa, “ang manuggahom sang kalibutan,” amo ang nagaimpluwensia sa mga tawo nga maghimo sing malain. Gani ang Biblia nagasiling: “Ang bug-os nga kalibutan yara sa gahom sang isa nga malauton.”—Juan 14:30; 1 Juan 5:19.

•   Dugang pa sa mga problema nga naeksperiensiahan sang mga tawo sa sulod sang ginatos ka tuig, nagakabuhi na kita sa tion nga gintagna sang Biblia: “Sa katapusan nga mga adlaw magaabot ang makahalanguyos nga mga tion nga mabudlay atubangon.” (2 Timoteo 3:1) Mabal-an man nga katapusan nga mga adlaw na bangod may mga inaway, kalamidad, kakulang sa pagkaon, kag mga balatian—mga hitabo nga amo ang rason kon ngaa nagapalagyo ang mga tawo.—Lucas 21:10, 11.

 Diin makakita sang paglaum ang mga refugee?

 Ginasugid sang Biblia nga ang aton Manunuga, si Jehova, b isa ka Dios nga may gugma kag may kaluoy sa mga refugee kag sa mga tawo nga nagbakwit sa ila mga balay. (Deuteronomio 10:18) Nagapromisa sia nga solbaron ang mga problema sang mga refugee paagi sa iya gobierno sa langit, nga ginatawag Ginharian sang Dios, nga amo ang magabulos sa mga gobierno sang tawo. (Daniel 2:44; Mateo 6:10) Ini nga Ginharian ang gamiton ni Jehova sa pagdula kay Satanas nga Yawa. (Roma 16:20) Isa ini ka gobierno sa bilog nga kalibutan, amo nga dulaon man sini ang mga border nga nagatunga sa mga pungsod subong. Sa bilog nga kalibutan, ang mga tawo mahiusa na bilang isa ka pamilya. Wala na sing magapalagyo halin sa iya balay, kay ang Biblia nagapromisa: “Magapungko ang kada isa sa ila sa idalom sang ila puno sang ubas kag sa idalom sang ila kahoy nga higuera, kag wala sing magapahadlok sa ila, kay si Jehova sang mga kasuldadusan ang nagsiling sini.”—Miqueas 4:4.

 Ang Ginharian sang Dios lang ang makahatag sang permanente nga solusyon sa problema sang grabe kadamo nga refugee subong. Gamiton ni Jehova ang iya Ginharian para dulaon ang mga problema nga amo ang rason kon ngaa nangin refugee ang mga tawo. Binagbinaga ang pila ka halimbawa:

•   Inaway. “Ginapauntat [ni Jehova] ang mga inaway.” (Salmo 46:9) Para mabal-an mo kon paano dulaon sang Dios ang mga inaway, basaha ang artikulo nga “Paghidait sa Duta—Paano?”

•   Pagmaltrato kag kapintas. ‘Luwason sila ni Jehova sa pagpamigos kag sa pagpamintas.’ (Salmo 72:14) Para mahangpan mo kon paano mabag-o sang mga tawo ang malain nga mga batasan, basaha ang mga artikulo nga natig-uluhan “Pagtapos sa Wala Untat nga Pagdumtanay.”

•   Kapigaduhon. “Luwason [ni Jehova] ang imol nga nagapangayo sing bulig.” (Salmo 72:12) Para mabal-an mo kon paano solbaron sang Dios ang panguna nga mga rason sang kapigaduhon, basaha ang artikulo nga “Posible Bala ang Patas nga Sistema sa Ekonomiya?”

•   Kakulang sa pagkaon. “Mangin bugana ang mga uyas sa duta.” (Salmo 72:16) Para mabal-an mo kon ano ang himuon sang Dios para sigurado nga wala sing magutman, basaha ang artikulo nga “Isa ka Kalibutan nga Wala na sing Gutom?”

 Makabulig bala ang Biblia sa mga refugee subong?

 Huo. Ang Biblia nagahatag sing sigurado nga paglaum sa palaabuton para sa mga refugee. Makabulig man ang Biblia nga maatubang nila ang mga problema subong.

 Prinsipio sa Biblia: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna.”—Filipos 4:6, 7.

 Buot silingon: Mangabay sa Dios sang malinong nga hunahuna kag tagipusuon bisan ano man ang imo sitwasyon. Tan-awa ang artikulo nga “Filipos 4:6, 7—‘Indi Kamo Magpalibog sang Bisan Ano.’”