MENGKANG BEJAGA!

Bejuta Iku Orang Ngerarika Diri ari Ukraine

TEBAH

Kena 24 Februari 2022, Rusia nyerang Ukraine. Tu ngujungka penyarut ba Ukraine lalu bejuta iku orang dalam bahaya. Ketegal tu, mayuh orang mutuska deka ngerarika diri ari Ukraine. a

“Aku ulih ninga bom meletup. Penakut ke diasaika aku tusah disebut. Lebuh kami nemu bisi kerita api ke deka mai bala pelari, kami mutuska deka ninggalka endur nya. Kami semina ulih mai siti beg aja. Kami mai dokumen, ubat, ai irup enggau pemakai aja. Kelimpah ari nya, semua barang kami ditinggalka. Lebuh kami mansang ngagai stesen kerita api, bisi bom meletup semak kami.”—Nataliia, ari Kharkiv, Ukraine.

“Kami enda nyangka perang amat-amat deka nyadi. Aku ulih ninga bunyi letupan ba bandar kami, lalu cheremin ba rumah kami begetar. Aku mutuska deka mupuk, lalu semina mai utai ke amat diguna aku. Aku nurun ari rumah pukul 8 pagi lalu nepan kerita api ngagai Lviv, udah nya nepan bas ngagai Poland.”—Nadija, ari Kharkiv, Ukraine.

Dalam artikel tu

Nama kebuah mayuh amat pelari?

Mayuh orang lari ari Ukraine ketegal diserang Rusia. Tang ukai ba Ukraine aja. Bup Kudus nerangka kebuah bisi situasi ke ngasuh orang deka ngerarika diri:

Perintah dunya enda ulih mutarka penanggul mensia. Kesuah iya, bala pemerintah salah guna kuasa sida, lalu tu ngujungka rayat merinsa.—Pengajar 4:1; 8:9.
Sitan nya “pemerintah dunya.” Iya amat bekuasa atas mensia, nyentukka Bup Kudus madah: “Semua dunya di baruh kuasa Sitan.”—John 14:30; 1 John 5:19.
Kemayaharitu, kitai ukai semina napi penanggul ke biasa aja, ti udah ditapi mensia pengelama beratus taun. Bup Kudus madahka pasal jeman kitai: “Ba hari ti penudi mayuh macham penusah deka nyadi.” (2 Timoti 3:1) Kelimpah ari nya, Bup Kudus pan madahka, ba hari ti penudi deka bisi perang, bencana alam, lapar pungkang enggau penyakit berampit. Semua penusah tu ngasuh orang deka rari ari endur sida.—Luke 21:10, 11.

Nama harapan ngagai bala pelari?

Bup Kudus nerangka, Jehovah b nya Petara ti rinduka sereta siru ke bala pelari enggau orang ke dipejal ninggalka rumah sida. (Ulang Adat 10:18) Iya udah besemaya semua penanggul ke ditapi bala pelari deka diputarka nengah Perintah Iya. Perintah Petara deka nganti semua perintah mensia. (Daniel 2:44; Matthew 6:10) Nengah Perintah Iya, Jehovah deka ngemunaska Sitan. (Rome 16:20) Perintah nya pan deka merintah atas semua dunya. Nyadi, mensia nadai agi bepechah-belah ketegal bansa tauka menua. Semua mensia deka nyadi baka siti ruang bilik ti beserakup. Semua orang deka likun lalu enda ibuh ngerarika diri ari rumah sida, laban Bup Kudus besemaya: ‘Semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida. Jehovah ti Pemadu Bekuasa udah besemayaka utai tu.’—Mikah 4:4.

Semina Perintah Petara aja ulih mutarka penanggul bala pelari kemayaharitu. Peratika sekeda penusah ke deka diputarka Jehovah nengah Perintah Iya:

Perang. “[Jehovah] ngasuh perang badu agi nyadi di serata dunya.” (Masmur 46:9) Kena nemu baka ni Petara deka ngasuh perang badu agi nyadi, bacha artikel “Bumi yang Aman—Bagaimanakah Hal Ini Akan Terjadi” dalam jaku Melayu.
Penganas enggau ulah ti nekanka pengidup orang. “[Jehovah] ngelepaska sida ari orang ke nekanka pengidup sida, enggau ari orang ke mangah.” (Masmur 72:14) Kena nemu baka ni orang ulih ngubah runding enggau ulah ti negatif, bacha siri artikel ke betajuk “Buai Ati ti Begedi.”
Penyeranta. ‘Jehovah ngelepaska orang ke seranta, ke ngangauka Iya’ (Masmur 72:12) Kena nemu baka ni Petara deka mutarka penanggul orang ke seranta, bacha “Dapatkah Sistem Ekonomi yang Adil Wujud?” dalam jaku Melayu.
Lapar Pungkang. “Awakka gandum seruran mayuh di menua.” (Masmur 72:16) Kena nemu baka ni Petara deka nentuka semua orang chukup pemakai, bacha artikel “Dunia tanpa Kelaparan?” dalam jaku Indonesia.

Ulih Bup Kudus nulung bala pelari?

Au. Kelimpah ari madahka sida semaya Petara ke jemah ila, Bup Kudus ulih nulung bala pelari napi penanggul sida diatu.

Prinsip Bup Kudus: “Orang ke beli deka arapka sebarang utai, tang orang ke pintar deka nyingkang enggau bejimat.”—Jaku-Dalam 14:15.

Reti iya: Perundingka nama situasi ti bahaya ke engka deka ditapi nuan sereta baka ni nuan deka nyaga diri. Bejimat enggau orang ke jai ti deka ngambi ulih ari bala pelari laban sida nemu, kesuah iya bala pelari enda teleba ba endur nya sereta senang ditipu.

Prinsip Bup Kudus: “Enti kitai bisi pemakai enggau gari, kitai patut nemu puas ati ke nya.”—1 Timoti 6:8.

Reti iya: Anang fokus enggau reta tengkira. Enti nuan puas ati enggau utai ke amat diguna nuan, nuan deka gaga agi ati.

Prinsip Bup Kudus: “Kereja ngagai orang baka ke dikedekaka kita kereja orang ngagai kita.”—Matthew 7:12.

Reti iya: Sabar sereta manah ati enggau orang bukai. Enti nuan ngayanka kualiti tu, nuan deka dipebasa sereta diterima orang ba endur nuan diau.

Prinsip Bup Kudus: “Anang malas penyai ngena penyai.”—Rome 12:17.

Reti iya: Anang nejuka pengeringat ngasuh nuan malas penyai ke digaga orang. Tu semina deka ngenusahka nuan.

Prinsip Bup Kudus: “Aku ulih ngereja semua utai ulih Iya ke meri aku pengering.”—Pilipi 4:13.

Reti iya: Kemeratka meh kaul nuan enggau Petara ba pengidup nuan lalu seruran besampi. Iya ulih ngeringka nuan ngambika nuan ulih napi sebarang penanggul.

Prinsip Bup Kudus: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.’—Pilipi 4:6, 7.

Reti iya: Pinta ngagai Petara awakka Iya meri nuan pengelantang ati, enda ngira nama utai ke ditapi nuan. Peda Artikel “Filipi 4:6, 7—“Janganlah Khuatir akan Apa Pun” dalam jaku Melayu.

a Sehari pengudah Rusia nyerang Ukraine, United Nations High Commissioner for Refugees (UNHCR) madahka situasi ba Ukraine balat bahaya. Dalam 12 hari aja, lebih ari 2 juta iku pelari udah ngerarika diri ari Ukraine ngagai menua ke semak. Lalu bisi sejuta iku da agi ngerarika diri ari rumah sida empu ngagai endur bukai di Ukraine.

b Jehovah nya nama Petara. (Masmur 83:18, NWT) Peda artikel “Sapa Jehovah?”