Turi ta Pebrero 24, 2022, inatake na militar na Russia i Ukraine. Megafu tatun, minillion nga totolay i nappeligro anna kayà da i manaw insigida ta nasiodda. a

 “Egga ira i pabbomba anna passabug. Talaga kananassing. Awan tu makagì. Turi ta nammuammi nga egga ira i tren nga mangipanaw ta refugee ira, naddesisiokkami nga manaw. Mawag nga ibattammi i ngamin megafu ta tadday nga baddi laman nga bag i mevulu na kada tolay. Dokumento, medisina, danum, anna snacks laman i mevulu mi. Nibattang mi ngana i ngamin anna minay kami ta istasion na tren maski nu egga ira i bomba nga massabug ta pallevu mi.”—Nataliia, taga-Kharkiv, Ukraine.

 “Ariammi vuluvuga ninono nga talaga egga i mesimmu nga gerra. Egga ira i maginnà nga passabug ta karuan nga parte na siudad anna maggungguyag i benta ira. Nanaw ngà insigida. Ina ku laman i importante ira nga gamit ku. Nanaw ngà ta alas 8:00 na umma anna nattakay ngà ta tren mappange ta Lviv tapus nab-bus ngà mappange ta Poland.”​—Nadija, taga-Kharkiv, Ukraine.

Taw nga artikulo

•  Anni i kurug nga makagafu ta pazziga-riga na refugee ira?

•  Sitaw i pakalegan na refugee ira tu iddanama?

•  Makoffun kari i Biblia ta refugee ira sangawe?

 Anni i kurug nga makagafu ta pazziga-riga na refugee ira?

 Namegafu i pazziga-riga na refugee ira ta Ukraine megafu ta pangatake na militar na Russia. Ngem kagian na Biblia i pinakarason ta pazziga-riga na ngamin nga refugee ta interu mundo:

•   Ari nga meyawa na gobiernu na totolay ta interu mundo i kawagan na totolay. Maruddu nga usan na gobiernu ira i autoridadda tapenu abusowan i totolay.​—Eclesiastes 4:1; 8:9.

•   Si Satanas nga Diablo nga “mammaguray toye ta utun na davvun,” iinfluwensian na i totolay nga magangngua tu marake. Kagian na BIblia: “I mundo ay egga ta pammaguray na Demonio.”​—Juan 14:30; 1 Juan 5:19.

•   Fuera paga ta problema ira nga mamarriga ta totolay ta ginatu nga dagun, mattolay tam ngana ta tiempo nga niprofesiya na Biblia: “Duttal noka i ziga-riga ta pangurianan ira nga aggaw.” (2 Timoteo 3:1) Ta pangurianan ira nga aggaw, egga ira i gerra, natural nga kalamidad, pakkurang tu makan, anna taka-taki. Danatun i rason nu ngatta panawan na totolay i lugar da.​—Lucas 21:10, 11.

 Sitaw i pakalegan na refugee ira tu iddanama?

 Kagian na Biblia nga i Namaratu nga si Jehova b nga Dios, ayatan anna ikallo na i refugee ira anna i totolay nga napilitan nga nanaw ta babaleda. (Deuteronomio 10:18) Nipromesa na nga solban na i problema ira na refugee ira gukaban na nelangitan nga gobiernu nga magalan tu Pappatulan na Dios. Yatun i manali ta gobiernu ira na totolay. (Daniel 2:44; Mateo 6:10) Usan noka ni Jehova i Pappatulan na tapenu daralan si Satanas nga Diablo. (Roma 16:20) Mammaguray ta interu mundo yatun nga Pappatulan, anna alsan na i passirina megafu ta national border. Mabbalin tu mattaradday nga familia ta interu mundo i ngamin nga totolay. Awan ngana noka tu mawag nga manaw ta babalay da megafu ta nipromesa na Biblia: “Magitubang i kada tadday nira ta lirum na fun na ubas na anna ta lirum na fun na igos na, anna awan tu sinni laman nga mangananassing nira, megafu ta yatun i kinagi ni Jehova na armada.”—Mikias 4:4.

 I Pappatulan na Dios laman i makeyawa tu permanente nga solusion ta pazziga-riga na refugee ira sangawe. Usan noka ni Jehova i Pappatulan na tapenu alsan i problema ira nga rason nu ngatta egga ira i refugee. Ikonsidera i karuan nga angngarigan:

•   Gerra. Si Jehova, “pagimmangan na i gerra ta tanga-ravvunan.” (Salmo 46:9) Tapenu mammuan nu kunnasi nga pangultimuan na Dios i gerra, bibbigan i artikulo nga “Kapayapaan sa Lupa—Paano?”

•   Kadara-darum anna panattazzi. “Ta kadara-darum anna katazza-tazzi ay kuragan na ira” ni Jehova. (Salmo 72:14) Tapenu mammuan nu kunnasi nga moli na totolay i negatibo ira nga ugali da, bibbigan i serye na artikulo nga “Nu Kunnasi nga Maffu i Lussaw.”

•   Ziga. Si Jehova, “kuragan na i mariga ira nga umagal sa.” (Salmo 72:12) Tapenu masingan nu kunnasi solban na Dios i pinakarason ta pazziga-riga, bibbigan i artikulo nga “Posible Ba ang Isang Patas na Sistema ng Ekonomiya?”

•   Pakkurang tu makan. “Aru paray i magatab ta koman ira.” (Salmo 72:16) Tapenu mammuan nu kunnasi siguraduan na Dios nga awan ngana noka tu mabisin, bibbigan i artikulo nga “Isang Daigdig na Wala Nang Gutom?”

 Makoffun kari i Biblia ta refugee ira sangawe?

 Wan. Fuera ta pangiyawa ta refugee ira tu kurug nga iddanama ta mappange, makoffun gapa i Biblia ta pangarubadda ta problema ira sangawe.

 Prinsipio na Biblia: “Arian nu nga kavurungan i anni laman nga gannug. Ngem ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu.”​—Filipos 4:6, 7.

 Kebalinan na: Ipakimallo mu ta Dios nga iddan naka tu memammo nga nono anna futu ta maski anni nga situasion nga meparubang ta nikaw. Innan i artikulo nga “Filipos 4:6,7—‘Huwag Kayong Mabalisa Tungkol sa Anumang Bagay.’”