Idi Pebrero 24, 2022, rinugianen ti militar ti Russia a sakupen ti Ukraine. Gapu iti dayta, minilion a tattao ti agpelpeligro ti biagda, ken ikagkagumaanda ti dagus a pumanaw iti pagilianda. a

 “Nagsasaruno dagiti bimtak a bomba. Nakabutbuteng, nagrigat a deskribiren. Idi naammuanmi nga adda dagiti tren nga agibakuit, nagdesisionkami a pumanaw. Bassit la a bag ti mabalin nga itugot ti tunggal maysa. Dagiti laeng dokumento, agas, danum, ken bassit a makan ti naitugotmi. Imbatimi ti amin sa nagdardaraskami a napan iti estasion ti tren bayat a bumbumtak dagiti bomba.”—Nataliia, Kharkiv, Ukraine.

 “Agingga iti maudi a kanito, dimi impagarup a talaga a mapasamak ti gubat. Nakangngegak iti nagpipigsa a kanalbuong iti nagduduma a paset ti siudad. Permi ti pannakagunggon dagiti tawa, isu a pimmanawak ken dagiti napateg la a banag ti intugotko. Pimmanawak idiay balay iti alas otso ti agsapa ken nagluganak iti tren a mapan Lviv, saak nag-bus nga agpa-Poland.”—Nadija, Kharkiv, Ukraine.

Iti daytoy nga artikulo

•  Ania dagiti pudpudno a makagapu iti daytoy a krisis?

•  Asino ti pangnamnamaan dagiti nagbakuit?

•  Makatulong kadi ti Biblia kadagiti nagbakuit ita?

 Ania dagiti pudpudno a makagapu iti daytoy a krisis?

 Nangrugi dayta a krisis idiay Ukraine gapu ta rinugian a sakupen ti militar ti Russia dayta a pagilian. Ngem ipakita ti Biblia nga adda pay dagiti naun-uneg a rason iti dayta a krisis:

•   Dagiti gobierno ti tao iti intero a lubong saanda a maipaay dagiti kasapulan ti amin a tattao. Masansan nga usaren dagiti gobierno ti autoridadda tapno makontrol ken maidadanesda dagiti tattao.—Eclesiastes 4:1; 8:9.

•   Ni Satanas a Diablo, “ti agturay iti lubong,” im-impluensiaanna dagiti tattao nga agaramid iti dakes isu nga ibaga ti Biblia: “Ti intero a lubong ket adda iti pannakabalin daydiay managdakdakes.”—Juan 14:30; 1 Juan 5:19.

•   Malaksid kadagiti problema a ginasuten a tawen a mangap-apektar iti amin a tattao, agbibiagtayon iti tiempo nga impakpakauna ti Biblia: “Iti maudi nga al-aldaw, dumtengto dagiti delikado ken narigat a tiempo.” (2 Timoteo 3:1) Bayat dagita nga aldaw, adda met dagiti gubat, natural a didigra, bisin, ken makapapatay a sakit—dagiti makagapu nga inkapilitan a pumanaw dagiti tattao iti lugarda.—Lucas 21:10, 11.

 Asino ti pangnamnamaan dagiti nagbakuit?

 Ipakita ti Biblia a ti Namarsua kadatayo, ni Jehova, b ket Dios a mannakipagrikna ken mangay-ayat kadagiti nagbakuit ken napilitan a nangpanaw kadagiti pagtaenganda. (Deuteronomio 10:18) Inkarina a solbarennanto dagiti problema dagiti nagbakuit babaen ti nailangitan a gobiernona a maawagan iti Pagarian ti Dios a mangsukatto kadagiti gobierno ti tao. (Daniel 2:44; Mateo 6:10) Usarento ni Jehova ti Pagarianna a mangpukaw ken Satanas a Diablo. (Roma 16:20) Iturayanto dayta a Pagarian ti intero a lubong ken ikkatenna dagiti border wenno beddeng a namagsisina kadagiti nasion. Amin a tattao ket agkaykaysanton kas sangalubongan a pamilia. Awanton ti inkapilitan a mangpanaw iti pagtaenganna ta inkari ti Biblia: “Agtugawto ti tunggal maysa iti sirok ti ubasna ken iti sirok ti kayona a higos, ken awanto ti pagbutnganda, ta ni Jehova a panguluen dagiti armada ti nangibaga iti dayta.”—Mikias 4:4.

 Ti laeng Pagarian ti Dios ti makaipaay iti permanente a solusion kadagiti problema a mapaspasaran dagiti nagbakuit ita. Usarento ni Jehova ti Pagarianna a mangikkat kadagiti problema a nangpuersa kadagiti tattao nga agbakuit. Kitaem ti dadduma a pagarigan:

•   Gubat. “[Ni Jehova] pagsarsardengenna dagiti gubat.” (Salmo 46:9) Tapno maammuam no kasano a ti gubat ket pagpatinggaento ti Dios, basaem ti artikulo a “Talna Ditoy Daga—Kasano a Mapasamak?”

•   Pannakairurumen ken kinaranggas. “[Ni Jehova] isalakannanto ida iti pannakairurumen ken iti kinaranggas.” (Salmo 72:14) Tapno maawatam no kasano a mabalbaliwan dagiti tattao dagiti nabayagen a dakes a kababalinda, basaem ti serye dagiti artikulo a napauluan “Mapasardengtayo ti Panagwaras ti Gura.”

•   Kinapanglaw. “[Ni Jehova] ispalennanto dagiti napanglaw nga agpatpatulong.” (Salmo 72:12) Tapno maammuam no kasano a parutento ti Dios dagiti ramut ti kinapanglaw, basaem ti artikulo a “Posible Kadi a Pataston ti Biag ti Baknang ken Pobre?”

•   Bisin. “Naruayto dagiti bukbukel ditoy daga.” (Salmo 72:16) Tapno maammuam no kasano a siguraduento ti Dios nga awan ti agbisin, basaem ti artikulo a “Lubong nga Awanan iti Bisin?”

 Makatulong kadi ti Biblia kadagiti nagbakuit ita?

 Wen. Maipaayan ti Biblia dagiti nagbakuit iti sigurado a namnama para iti masanguanan ken matulonganna ida a mangsango kadagiti pakarigatan a mapaspasaranda.

 Prinsipio ti Biblia: “Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman; ket ti talna ti Dios a mangartap iti amin a pannakaawat salaknibannanto ti puso ken isipyo.”—Filipos 4:6, 7.

 Kaipapananna: Dawatem iti Dios nga agbalin a natalna ti pusom ken isipmo iti aniaman a situasion a pakaipasanguam. Kitaem ti artikulo a “Filipos 4:6, 7—‘Awan Koma ti Pakadanaganyo.’”