Pan Febiweri 24, 2022, Rosha muuv iin pan Yuukrien wid im aami dem an staat waar gens Yuukrien. An siek-a dat uol iip a piipl afi ron we fram wich paat dem liv kaaz a di sofarieshan we a gwaan. a

 “A bie bum mi ier a jrap roun di plies. Mi kyaahn iivn tel yu a ou fraitn mi did bi. Wi did disaid se wi a-go lef wen wi ier se dem did av som chrien fi muuv piipl outa di ieriya. Bwai, yu did afi put di wol a yu laif iina wan likl bag pan yu bak. Wi kuda onggl kyari wi impuotant piepa dem, som medisn, waata, an som likl sitn fi nyam. Wen di bum dem staat jrap, wi did afi ron we lef evriting els an ga’a di chrien stieshan.”—Nataliia, fram Kaakiv iina Yuukrien.

 “Aal di di de wi di de, wi neehn tingk no waar did a-go staat fi chuu. Wi ier bum a jrap aal bout iina som ada paat a di siti, an di winda dem staat shiek laik dem a-go jrap out. Mi disaid se mi onggl a-go tek wa mi niid an lef. Mi lef mi yaad 8:00 iina di maanin an tek wan chrien go Liviv an den mi tek wan bos go Puolan.”—Nadija we kom fram Kaakiv iina Yuukrien.

Dis a wa wi a-go taak bout

•  Wen piipl afi a ron we fram wich paat dem liv, laik iina Yuukrien, a wa riili kaaz dat?

•  Di wan dem we afi ron we fram wich paat dem de, ou dem kyan nuo fi shuor se tingz a-go get beta fi dem?

•  Ou di Baibl kyan elp di wan dem we afi ron we fram wich paat dem liv?

 Wen piipl afi a ron we fram wich paat dem liv, laik iina Yuukrien, a wa riili kaaz dat?

 Piipl did afi staat ron we fram we dem liv iina Yuukrien kaa Rosha muuv iin wid im aami dem an staat waar gens Yuukrien. Bot di Baibl shuo se a som ada tingz riili mek dem tingz de a gwaan. Si chrii riizn ya:

•   Non a di govament dem iina di worl kyaahn get rid a di sofarieshan dem we piipl a go chuu. Matarafak, som a di taim di piipl dem iina govament yuuz dem powa fi mek tingz aad fi piipl.—Iikliiziyastiiz 4:1; 8:9.

•   Di Devl a “di ruula fi da worl ya.” A im a mek piipl pan di ort du aal kain-a wikid sitn an a dat mek di Baibl se: “Di devl kanchuol di uol worl.”—Jan 14:30; 1 Jan 5:19

•   Pan tap a aal a di prablem dem we piipl a go chuu fram ‘Wapi kil Filop,’ wi a liv iina wan taim nou we di Baibl kaal “di laas die dem” an it se dem taim de “tingz a-go get aad aad.” (2 Timoti 3:1) An sitn els we di Baibl tel wi tu bout dem taim ya a dat yu wuda av wol iip a waar, wol iip a orikien an flod an dem ting de, fuud a-go shaat, an yu a-go av siknis we kil aaf piipl. Aal a dem sitn de a tingz we kaaz piipl fi afi ron we fram wich paat dem liv.—Luuk 21:10, 11.

 Di wan dem we afi ron we fram wich paat dem de, ou dem kyan nuo fi shuor se tingz a-go get beta fi dem?

 Di Baibl shuo wi se Jeuova, b Di Wan We Mek Wi, im a wan Gad we lov wi an im fiil it fi di wan dem we afi ron we fram wich paat dem liv. (Dyuutaranami 10:18) Yu si aal a di prablem dem we piipl uu afi ron we fram wich paat dem liv a go chuu, Gad pramis se im a-go yuuz fi’im Kindom govament we ruul fram evn fi get rid a aal a dem prablem de. An fi’im govament a-go get rid a aal a di govament dem we a ruul. (Daniyel 2:44; Matyu 6:10) Wan neda ting a dat Jeuova a-go yuuz im Kindom fi get rid a Sietan. (Ruoman 16:20) Gad Kindom a-go bi wan govament we a-go ruul uova di uol worl, an evribadi iina di difrant difrant konchri dem naa go plit op plit op no muor, an dem a-go wok tugeda az wan. So kaaz a dat, nobadi naa go eva afi ron we fram wich paat dem liv agen. Di Baibl mek wi nuo se: “Dem a-go sidong anda dem uona vain an anda dem uona fig chrii, an nobadi naa go mek dem fiil fried, kaaz Jeuova we a liid im aami dem se so.”—Maika 4:4

 A onggl Gad Kindom kyan mek shuor se nobadi naa go eva afi ron we fram wich paat dem liv agen. Jeuova a-go yuuz im Kindom fi get rid a di prablem dem we kaaz piipl fi afi a ron we fram wich paat dem liv. Mek wi luk pan som a dem prablem de:

•   Waar. Saam 46:9 tel wi se “[Jeuova] a-go tap di waar dem we a gwaan aal uova di ort.” Fi fain out ou im a-go du dis, riid dis: “Peace on Earth—How Will It Come?”

•   Piipl a mek laif aad fi ada piipl an a du tingz fi ort dem. Saam 72:14 se: “[Jeuova] a-go siev dem fram di piipl dem we a mek laif aad fi dem an fram aal a di piipl dem we a du tingz fi ort dem.” Fi fain out ou piipl kyan get fi chienj som wiez we dem av fram lang taim, riid dis: “Breaking the Cycle of Hatred.”

•   Piipl puor bad. Saam 72:12 se: “[Jeuova] a-go siev di puor piipl dem we beg im fi elp dem.” Fi fain out ou Gad a-go get rid a aal a di prablem dem we mek piipl puor, riid dis: “Is a Fair Economic System Possible?”

•   Fuud shaat. Saam 72:16 se: “Uol iip a fuud a-go de pan di ort.” Fi fain out ou Gad a-go mek shuor se nobadi no eva onggri agen, riid dis: “A World Without Hunger?”

 Ou di Baibl kyan elp di wan dem we afi ron we fram wich paat dem liv?

 Fi di wan dem we afi ron we fram wich paat dem liv, di Baibl kyan mek dem nuo fi shuor se tingz a-go get beta fi dem. An it kyan elp dem fi diil wid di prablem dem we dem av rait ya nou.

 Dis a wa di Baibl se: “No wori wori op unuself bout notn. We unu fi du a prie tu Gad bout evriting, aks im fi we unu waahn, an gi im tangks fi evriting. Wen unu du dat, Gad wi gi unu piis iina unu aat an main iina wan wie we unu kyaahn iivn andastan. Im a-go du it so unu no afi wori bout notn.”—Filipiyan 4:6, 7.

 Ou dis kyan elp yu? Dis a mek yu si se no mata wa yu a go chuu, yu fi prie tu Gad an aks im fi gi yu piis iina yu aat an main. Fi fain out muor bout dis, riid dis: “Philippians 4:6, 7—‘Do Not Be Anxious About Anything.’”