24 თებერვალს უკრაინაში რუსეთის სამხედრო ინტერვენციის შემდეგ მილიონობით ადამიანს მოუწია საცხოვრებელი ადგილის დატოვება, რასაც მწვავე ჰუმანიტარული კრიზისი მოჰყვა. a

  „ირგვლივ ბომბები ცვიოდა და აფეთქებების ხმა ისმოდა. ვერ აღვწერ, როგორი შეშინებულები ვიყავით. როცა გავიგეთ, რომ საევაკუაციო მატარებლით ქალაქის დატოვება შეგვეძლო, მაშინვე წასვლა გადავწყვიტეთ. თითო ზურგჩანთის ამარამ დავტოვეთ სახლი. მეტის წაღება არ შეიძლებოდა. თან მხოლოდ დოკუმენტები, წამლები, წყალი და პატარა წასახემსებელი გვქონდა. სადგურისკენ რომ მივდიოდით, ჩვენ გარშემო სულ ბომბები ცვიოდა“ (ნატალია, ხარკოვი).

 „ბოლო წუთამდე გვეგონა, რომ ომი არ დაიწყებოდა. მოულოდნელად აფეთქების ხმა გავიგეთ, ფანჯრები სულ ზანზარებდა. გადავწყვიტე, ქალაქი დამეტოვებინა და თან მხოლოდ აუცილებელი წავიღე. სახლიდან დილის 8 საათზე გამოვედი და ლვოვისკენ მიმავალ მატარებელში ჩავჯექი, იქიდან კი ავტობუსით პოლონეთში გადავედი“ (ნადია, ხარკოვი).

ამ სტატიაშია:

•  რა არის ლტოლვილთა კრიზისის გამომწვევი უმთავრესი მიზეზები?

•  ნუგეში ლტოლვილთათვის

•  პრაქტიკული ბიბლიური დახმარება ლტოლვილთათვის

 რა არის ლტოლვილთა კრიზისის გამომწვევი უმთავრესი მიზეზები?

 არსებული კრიზისი უკრაინაში რუსეთის შეჭრამ გამოიწვია. თუმცა მსგავსი სახის პრობლემების მიზეზი უფრო ღრმად უნდა ვეძებოთ. მოდი გავიგოთ ამ საკითხზე ბიბლიის თვალსაზრისი.

•   ხელისუფლებებმა მთელ მსოფლიოში ადამიანებს იმედი გაუცრუეს. ისინი, ვინც ხელისუფლებაში არიან, ხშირად ძალაუფლებას ბოროტად იყენებენ და ჩაგრავენ სხვებს (ეკლესიასტე 4:1; 8:9).

•   სატანა ეშმაკს, რომელიც ამ ქვეყნიერების მმართველია, კაცობრიობა იმდენად ჰყავს თავის გავლენაში მოქცეული, რომ ბიბლიაში მასზე ნათქვამია: „მთელი ქვეყნიერება ბოროტის ხელშია“ (იოანე 14:30; 1 იოანე 5:19).

•   კაცობრიობა საუკუნეებია, არაერთი პრობლემის წინაშე დგას, თუმცა ამ ყველაფერს ისიც ემატება, რომ ჩვენ ახლა „ბოლო დღეებში“ ვცხოვრობთ, რომელსაც ბიბლია „მძიმე და ძნელად ასატან დროს“ უწოდებს (2 ტიმოთე 3:1). გარდა ამისა, როგორც ნაწინასწარმეტყველები იყო, „ბოლო დღეებში“ იქნებოდა ომები, ბუნებრივი კატაკლიზმები, საკვების უკმარისობა და ეპიდემიები, რის გამოც ბევრი იძულებული გახდებოდა, უსაფრთხო გარემო მოეძებნა (ლუკა 21:10, 11).

 ნუგეში ლტოლვილთათვის

 ბიბლიიდან ვიგებთ, რომ ჩვენი შემოქმედი, იეჰოვა, b თანაუგრძნობს მათ, ვისაც თავშესაფრის საძიებლად საცხოვრებელი ადგილის დატოვება მოუწია; მას უყვარს ეს ადამიანები (კანონი 10:18). ის გვპირდება, რომ დევნილთა პრობლემებს თავისი ზეციერი ხელისუფლების ანუ ღვთის სამეფოს მეშვეობით გადაჭრის. ეს სამეფო მთლიანად ჩაანაცვლებს ყველა სხვა ხელისუფლებას (დანიელი 2:44; მათე 6:10). მისი მეშვეობით იეჰოვა სატანის მმართველობასაც დაუსვამს წერტილს (რომაელები 16:20). ეს სამეფო მთელ დედამიწაზე იმმართველებს და ყველა იმ პრობლემას აღმოფხვრის, რომლებსაც ეროვნული ნიშნით მსოფლიოს დაყოფა იწვევს. მთელი კაცობრიობა როგორც ერთი ოჯახი ისე იცხოვრებს. აღარავის მოუწევს საკუთარი კერის მიტოვება, რადგან ბიბლიაში არაორაზროვნად წერია: „თითოეული თავისი ვაზისა და ლეღვის ძირში იჯდება და არავინ შეაშინებს მათ, რადგან ლაშქართა ღმერთმა იეჰოვამ თავისი ბაგით წარმოთქვა ეს“ (მიქა 4:4).

 მხოლოდ ღვთის სამეფოს შესწევს იმის ძალა, რომ ერთხელ და სამუდამოდ მოაგვაროს დღეს არსებული ლტოლვილთა კრიზისი. იეჰოვა თავისი სამეფოს მეშვეობით ყველა იმ პრობლემას გადაჭრის, რის გამოც ხალხი იძულებული ხდება, დატოვოს სახლ-კარი. მოდი ზოგიერთ მაგალითზე ვიმსჯელოთ:

•   ომი. „[იეჰოვა] წყვეტს ომებს“ (ფსალმუნი 46:9). წაიკითხეთ სტატია „როგორ დამყარდება მშვიდობა დედამიწაზე?“ და გაიგეთ, როგორ დაუსვამს ღმერთი წერტილს შეიარაღებულ დაპირისპირებებს.

•   ჩაგვრა და ძალადობა. „ჩაგვრისა და ძალადობისგან იხსნის მათ [იეჰოვა]“ (ფსალმუნი 72:14). წაიკითხეთ სტატიათა სერია სათაურით „გაიმარჯვეთ სიძულვილზე!“ და გაიგეთ, როგორ მოიშორებს ხალხი ძვალსა და რბილში გამჯდარ ცუდ ჩვევებს.

•   სიღარიბე. „[იეჰოვა] დაიხსნის ღარიბს, შველას რომ ითხოვს“ (ფსალმუნი 72:12). წაიკითხეთ სტატია „იარსებებს ოდესმე ეკონომიკური თანასწორობა?“ და გაიგეთ, როგორ აღმოფხვრის ღმერთი სიღარიბის გამომწვევ მიზეზებს.

•   საკვების უკმარისობა. „უხვად იქნება მარცვლეული დედამიწაზე“ (ფსალმუნი 72:16). წაიკითხეთ სტატია „მილიარდი ადამიანის გამოკვების მცდელობა“ და გაიგეთ, რატომ შეგვიძლია ვიყოთ დარწმუნებული, რომ ღმერთი შეასრულებს ამ დაპირებას.

 პრაქტიკული ბიბლიური დახმარება ლტოლვილთათვის

 ბიბლიაში ჩაწერილი მხოლოდ მომავლის უტყუარ იმედს კი არ ჩაუსახავს დევნილებს, არამედ დღესვე გაუწევს პრაქტიკულ დახმარებას.

 ბიბლიური რჩევა: „ნურაფრის გამო ნუ ჩაცვივდებით საგონებელში; ყველა თქვენი სათხოვარი ლოცვაში გაუმხილეთ ღმერთს, ევედრეთ და მადლიერებით მიმართეთ, და ღვთის მშვიდობა, რომელიც ნებისმიერ აზრს აღემატება, დაიცავს თქვენს გულსა და გონებას“ (ფილიპელები 4:6, 7).

 რას ნიშნავს ეს სიტყვები: რა სიტუაციაშიც არ უნდა აღმოჩნდეთ, ღმერთს სულის სიმშვიდე სთხოვეთ. წაიკითხეთ სტატია «ფილიპელების 4:6, 7 — „ნურაფრის გამო ნუ ჩაცვივდებით საგონებელში“».