Na Kiya 24 février, basoda ya Russie kotaka na insi Ukraine sambu na kunwanisa yo. Bitumba yai me nata mpasi ya ngolo na Ukraine mpi yo me tula luzingu ya bamilio ya bantu na kigonsa. Yo yina bantu mingi kele na kutina insi yai kukonda kusukinina. a

 “Babombe vandaka kubwa mpi bima yina vandaka kupanzana mpi kupela tiya vandaka kutula makelele. Yo vandaka mambu ya boma mingi mpi mpila ya kutubila yo kele ve. Bo songaka beto nde ba train ke na kubaka bantu sambu na kutinisa bo. Yo yina beto bakaka lukanu ya kutina. Yo lombaka nde beto bikisa bima yonso sambu konso muntu lendaka kaka kubaka saki ya fioti ya mukongo. Beto bakaka kaka mikanda, bankisi ya kunwa, masa, mpi mwa bima ya fioti-fioti ya kudia. Beto yambulaka bima yonso ya nkaka mpi beto kwendaka na kisika yina train ke telamaka. Na ntangu yina babombe vandaka kubwa-bwa na lweka na beto.”—Nataliia, yandi me katuka na Kharkiv na Ukraine.

 “Beto vandaka ve kundima nde bitumba ta salama kibeni. Mono waka makelele ya ngolo ya bima yina vandaka kupanzana na bisika ya nkaka ya mbanza, mpi bafenetre vandaka kunikana. Mono bakaka lukanu ya kutina. Mono bakaka kaka bima yina vandaka kibeni mfunu. Mono basikaka na nzo na 8:00 mpi mono bakaka train sambu na kukwenda na Lviv. Na nima mono bakaka bisi sambu na kukwenda na Pologne.”—Nadija, yandi me katuka na Kharkiv na Ukraine.

Na disolo yai, nge ta zaba

•  Inki me sala nde bantu kutina na bansi ya nkaka?

•  Na nani bantu ya ke tina bansi na bo lenda tula ntima?

•  Keti Biblia lenda sadisa bantu yina ke tina bansi na bo bubu yai?

 Inki me sala nde bantu kutina na bansi ya nkaka?

 Mambu ya me sala nde bantu kutina insi Ukraine kele bitumba yina basoda ya Russie me kwisa kunwanisa insi Ukraine. Kansi Biblia ke tubila mambu yai ya nkaka ya ke sala nde bantu kuyambula bansi na bo sambu na kukwenda na bansi ya nkaka:

•   Baluyalu ya bantu na ntoto ya mvimba ke kuka ve kupesa bantu bima yina bo kele na yo mfunu. Mbala mingi bamfumu ya luyalu ke sadilaka kiyeka na bo sambu kuniokula bantu.—Longi 4:1; 8:9.

•   Satana Diabulu, “mfumu ya nsi-ntoto,” ke pusa bantu na kusala mambu ya mbi. Yo yina Biblia ke tubaka nde: “Nsi-ntoto ya mvimba kele na nsi ya kiyeka ya muntu ya mbi.”—Yoane 14:30; 1 Yoane 5:19.

•   Katula bampasi yina bantu ke mona banda bamvula mingi, beto ke zinga sesepi na ntangu yina Biblia tubilaka dezia na ntwala: “Na bilumbu ya nsuka bantangu ya mpasi mpi ya nku ta vanda.” (2 Timoteo 3:1) Diaka, na bilumbu yai ya nsuka, bitumba, bisumbula ya lugangu, nzala, mpi bipupa ta vanda mingi. Mambu yai ta sala nde bantu kutina bisika yina bo ke vandaka.—Luka 21:10, 11.

 Na nani bantu ya ke tina bansi na bo lenda tula ntima?

 Biblia ke tuba nde Yehowa, b Muntu Yina Salaka beto, kele Nzambi ya zola mpi ya ke wilaka bantu yina ke tina bansi na bo mpi bayina ke yambula banzo na bo mawa. (Kulonga 10:18) Yandi ke tuba nde yandi ta manisa mambu yai ya kutina bansi na nzila ya luyalu na yandi yina kele na zulu. Zina ya luyalu yango kele Kimfumu ya Nzambi. Luyalu yina ta katula baluyalu ya bantu. (Daniele 2:44; Matayo 6:10) Yehowa ta sadila luyalu na yandi sambu na kufwa Satana Diabulu. (Baroma 16:20) Kimfumu yina ta yala ntoto ya mvimba mpi yo ta katula bandilu ya bansi, kima yina ke salaka nde bantu na bantu kudivandila. Na ntangu yina, ata muntu mosi ve ta tina diaka nzo na yandi sambu Biblia ke tuba nde: “Bo ta vanda, konso muntu na nsi ya nti na yandi ya vinu mpi na nsi ya nti na yandi ya bafige, ata muntu mosi ve ta pesa bo boma, sambu munoko ya Yehowa ya makesa me tuba.”—Mika 4:4.

 Kimfumu ya Nzambi mpamba kele ti makuki ya kumanisa mambu yai ya kutina bansi ya beto ke mona bubu. Yehowa ta sadila Kimfumu na yandi sambu na kukatula mambu yina ke pusaka bantu na kukwenda kuzinga na bansi ya nkaka. Tala mwa mambu yina Kimfumu ya Nzambi ta katula:

•   Bitumba. “[Yehowa] ke sukisa bitumba.” (Nkunga 46:9) Sambu na kuzaba mambu yina Nzambi ta sala sambu na kumanisa bitumba, tala disolo “Inki Mutindu Ngemba Ta Kota na Ntoto ya Mvimba?”

•   Bampasi mpi mubulu. “[Yehowa] ta gulusa bo na bampasi mpi na mubulu.” (Nkunga 72:14) Sambu na kuzaba inki mutindu bantu ta soba bikalulu ya mbi yina me kotaka bo banda ntama, tala masolo ya kulandana ya kele ti ntu-diambu “Mutindu ya Kubuya Kumenga Bantu ya Nkaka.”

•   Kinsukami. “[Yehowa] ta gulusa nsukami yina ke dila sambu na kulomba lusadisu.” (Nkunga 72:12) Sambu na kuzaba mambu yina Nzambi ta sala sambu na kukatula mambu yina ke salaka nde bantu kuvanda bansukami, tanga disolo “Keti Bantu Yonso Lenda Vanda Kiteso Mosi na Mambu ya Mbongo?”

•   Nzala. “Mbuma ta vanda mingi kibeni na ntoto.” (Nkunga 72:16) Sambu na kuzaba mambu yina Nzambi ta sala sambu ata muntu mosi ve kufwa na nzala, tanga disolo “Plus jamais la faim dans le monde?”

 Keti Biblia lenda sadisa bantu yina ke tina bansi na bo bubu yai?

 Ee. Biblia ke pesa bantu yina ke tina bansi na bo kivuvu mosi ya kieleka. Yo lenda sadisa bo mpi na bampasi yina bo ke mona bubu.

 Verse ya Biblia: “Beno kudiyangisa ve sambu na konso kima yina, kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno mpi mabanza na beno na nzila ya Kristu Yezu.”—Bafilipi 4:6, 7.

 Ntendula: Samba Nzambi sambu yandi pesa nge ngemba ya mabanza mpi ya ntima yo vanda luzingu na nge kele nki mutindu. Tala disolo “Bafilipi 4:6, 7—‘Beno Kudiyangisa Ve Sambu na Konso Kima Yina.’”