IKARAGAI MWĨHŨGĨTE!
Andũ Milioni Nyingĩ Gwĩthara Ngũĩ Ukraine
Kũrĩ Februarĩ 24, 2022, Russia nĩ yaambĩrĩirie gũtharĩkĩra Ukraine. Ũndũ ũcio nĩ ũtũmĩte andũ milioni nyingĩ makorũo ũgwati-inĩ, na nĩ marageria kuuma bũrũri-inĩ ũcio. a
“Kwarĩ na mĩtuthũko ya mbomu. Warĩ ũndũ wa kũmakania itangĩhota gũtaarĩria na ciugo. Rĩrĩa twamenyire atĩ nĩ kwarĩ na mĩgithi ya gũthaamia andũ, tũgĩtua itua rĩa kuuma kuo. Twatigire indo citũ ciothe, tondũ o mũndũ angĩakuuire o mondo ĩmwe nini. Twakuuire o maratathi maitũ ma bata, ndawa, maĩ, na tũindo tũnini twa kũrĩa. Tũgĩtiga indo iria ingĩ ciothe na tũgĩthiĩ ceceni ya mũgithi o tũkĩiguaga mĩtuthũko ya mbomu.”—Nataliia, kuuma Kharkiv, Ukraine.
“Nginya ndagĩka ya mũthia, tuoonaga ta gũtekuumĩra mbaara ĩyo. Ndaiguaga mĩtuthũko kuuma icigo-inĩ imwe cia taũni, na ndirica nĩ ciainainaga. Ngĩtua itua rĩa kũũra, na ngĩkuua o indo iria cia bata mũno. Ndoimire mũciĩ thaa igĩrĩ cia rũcinĩ, ngĩoya mũgithi nginya Lviv ngĩcoka ngĩoya mbathi o nginya Poland.”—Nadija, kuuma Kharkiv, Ukraine.
Gĩcunjĩ-inĩ gĩkĩ
Nĩ kĩĩ gĩtũmĩte ethari ngũĩ maingĩhe mũno?
Kwambĩrĩirie kũgĩa na ethari ngũĩ aingĩ kuuma Ukraine rĩrĩa Russia yaatharĩkĩire bũrũri ũcio. O na kũrĩ ũguo, Bibilia nĩ ĩguũrĩtie itũmi ingĩ nene cia gũkorũo na ethari ngũĩ aingĩ ũguo:
Thirikari cia andũ thĩinĩ wa thĩ yothe nĩ iremetwo nĩ kũhingĩria andũ mabataro mao. Kaingĩ anene a thirikari mahũthagĩra ũnene wao kũhinyĩrĩria andũ.—Kohelethu 4:1; 8:9.
Shaitani ũrĩa Mũcukani, o we “mũnene wa thĩ ĩno,” akoragwo na ũgucania mũũru kwerekera andũ ũũ atĩ Bibilia yugaga ũũ: “Thĩ yothe ĩkoragwo rungu rwa hinya wa ũrĩa mũũru.”—Johana 14:30; 1 Johana 5:19.
Makĩria ma mathĩna marĩa andũ makoretwo magĩcemania namo kwa ihinda rĩa mĩaka mĩingĩ, tũratũũra ihinda rĩrĩa Bibilia yarathĩte ũũ ũhoro warĩo: “Matukũ-inĩ ma kũrigĩrĩria nĩ gũkaagĩa mahinda ma ũgwati maritũ kũhiũrania namo.” (2 Timotheo 3:1) Gũthũkia mũno, matukũ macio makũũrĩkanaga nĩ ũndũ wa gũkorũo na mbaara, icanjama cia ndũire, ngʼaragu, na mĩrimũ mĩũru—maũndũ marĩa matũmaga andũ more kuuma mĩciĩ-inĩ yao.—Luka 21:10, 11.
Ethari ngũĩ mangĩruta kũ kĩĩrĩgĩrĩro?
Bibilia yonanagia atĩ Mũũmbi witũ, Jehova, b nĩ Ngai wendete na ũcayagĩra ethari ngũĩ na andũ arĩa mabataraga kũũra kuuma mĩciĩ-inĩ yao. (Gũcokerithia Maathani 10:18) Nĩ eranĩire atĩ nĩ akaaniina mathĩna ma ethari ngũĩ akĩhũthĩra thirikari yake ya igũrũ, ĩrĩa ĩtagwo Ũthamaki wa Ngai, ũrĩa ũgaacoka ithenya rĩa thirikari cia andũ. (Danieli 2:44; Mathayo 6:10) Jehova akaahũthĩra Ũthamaki wake kweheria Shaitani ũrĩa Mũcukani. (Aroma 16:20) Ũthamaki ũcio ũgaakorũo ũrĩ thirikari ya thĩ yothe, na nĩ ũkeeheria ngayũkano iria irehagwo nĩ mĩhaka ya mabũrũri. Andũ othe magaakorũo marĩ famĩlĩ ya thĩ yothe ĩrĩ na ũrũmwe. Gũtirĩ mũndũ ũkaabatara rĩngĩ kũũra oime mũciĩ-inĩ wake tondũ Bibilia ĩranĩire ũũ: “Magaaikaraga thĩ, o mũndũ rungu rwa mũthabibũ wake na rungu rwa mũtĩ wake wa mũkũyũ, na gũtirĩ mũndũ ũgaatũma maigue guoya, nĩ gũkorũo kanua ka Jehova mũnene wa ita nĩko koigĩte ũguo.”—Mika 4:4.
No Ũthamaki wa Ngai tu ũngĩteithia nĩguo gũtigaakoragwo na ethari ngũĩ ta ũrĩa tuonaga mahinda-inĩ maya. Jehova akaahũthĩra Ũthamaki wake kũniina mathĩna marĩa matũmaga andũ more mĩciĩ-inĩ yao. Ta wĩcirie ũhoro wa mamwe mamo:
Mbaara. Jehova nĩ “aniinaga mbaara.” (Thaburi 46:9) Nĩguo wone ũrĩa Ngai akaaniina mbaara, thoma gĩcunjĩ kĩa “Amani Duniani—Itapatikanaje?”
Kũhinyĩrĩrio na gwĩkwo maũndũ ma ũhinya. “[Jehova] nĩ akaamahonokia matige kũhinyĩrĩrio na gwĩkwo maũndũ ma ũhinya.” (Thaburi 72:14) Nĩguo wone ũrĩa andũ mangĩcenjia mĩerekera mĩũru makoretwo nayo kwa ihinda iraihu, thoma icunjĩ cia ngathĩti ĩrĩ na kĩongo “Ũrĩa Tũngĩtooria Rũmena.”
Ũthĩni. “[Jehova] nĩ akaahonokia athĩni arĩa makayaga makĩhoya ũteithio.” (Thaburi 72:12) Nĩguo wone ũrĩa Ngai ageeka nĩguo aniine maũndũ mothe marĩa marehaga ũthĩni, thoma gĩcunjĩ kĩrĩ na kĩongo “Je, Inawezekana Kuwa na Mfumo wa Kiuchumi Wenye Usawa?”
Ngʼaragu. “Nĩ gũgaakorũo na ngano nyingĩ thĩinĩ wa thĩ.” (Thaburi 72:16) Thoma gĩcunjĩ kĩrĩ na kĩongo “Ulimwengu Usio na Njaa” nĩguo wone ũrĩa Ngai ageeka nĩguo atigĩrĩre atĩ gũtirĩ mũndũ ũkaahũũta.
Hihi Bibilia no ĩteithie ethari ngũĩ mahinda-inĩ maya?
Ĩĩ. Makĩria ma kũhe ethari ngũĩ kĩĩrĩgĩrĩro kĩa ihinda rĩũkĩte, Bibilia no ĩmateithie kũhiũrania na mathĩna marĩa maracemania namo rĩu.
Ũtaaro wa Bibilia: “Mũndũ ũrĩa ũtarĩ na ũũgĩ etĩkagia kiugo o gĩothe, no ũrĩa mũũgĩ nĩ ecũranagia ikinya o rĩothe.”—Thimo 14:15.
Ũrutani: Wĩcirie ũhoro wa mogwati marĩa ũngĩcemania namo na ũrĩa ũngĩka nĩguo wĩgitĩre. Wĩhũgage eki-naĩ arĩa mageragia kũhũthĩra ũũru ethari ngũĩ, tondũ nĩ moĩ atĩ meiguaga matarĩ na ũgitĩri na matimenyeranĩte na gĩcigo kĩrĩa mathamĩire.
Ũtaaro wa Bibilia: “Tũngĩkorũo na irio na nguo-rĩ, nĩ tũrĩiganagĩra na indo icio.”—1 Timotheo 6:8.
Ũrutani: Wĩtheme gũthingata indo cia kĩĩmwĩrĩ. Nĩ ũrĩkoragwo na gĩkeno makĩria ũngĩiganagĩra na maũndũ ma o mũhaka.
Ũtaaro wa Bibilia: “Nĩ ũndũ ũcio, maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo.”—Mathayo 7:12.
Ũrutani: Koragwo na wetereri na ũtugi. Maũndũ macio nĩ marĩtũmaga andũ a kũrĩa ũthamĩire makũhe gĩtĩo na makũnyite ũgeni.
Ũtaaro wa Bibilia: “Mũtikanarĩhe ũũru na ũũru harĩ mũndũ o na ũrĩkũ.”—Aroma 12:17.
Ũrutani: Ndũkanareke marakara matũme wĩrĩhĩrie rĩrĩa wekwo maũndũ moru. Gwĩka ũguo no gũthũkia kũngĩthũkia maũndũ makĩria.
Ũtaaro wa Bibilia: “Maũndũ-inĩ mothe nĩ ngoragwo na hinya kũgerera ũrĩa ũũheaga hinya.”—Afilipi 4:13.
Ũrutani: Igaga Ngai mbere ũtũũro-inĩ waku na ũkamũhoyaga. No akũhe hinya ũrĩa ũrabatara nĩguo ũtoorie.
Ũtaaro wa Bibilia: “Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho; naguo thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu na ũhoti wanyu wa gwĩciria.”—Afilipi 4:6, 7.
Ũrutani: Ũndũ-inĩ o wothe ũrĩgeragĩra, hoyaga Ngai akũhe thayũ wa meciria na wa ngoro. Thoma gĩcunjĩ kĩrĩ na kĩongo “Wafilipi 4:6, 7—‘Msihangaike Kuhusiana na Jambo Lolote.’”
a Mũthenya ũmwe thutha wa tharĩkĩro ĩyo, Rũhonge rwa Ũrũmwe wa Mabũrũri rwa Gũteithia Ethari Ngũĩ (UNHCR) rwoigire atĩ thĩna ũcio warĩ mũnene mũno na wabataraga kuoerũo makinya ma na ihenya. Ihinda-inĩ rĩa thikũ 12 tu, andũ makĩria ma milioni igĩrĩ nĩ moorĩte Ukraine magathiĩ mabũrũri marĩa marĩ hakuhĩ na bũrũri ũcio, nao angĩ milioni ĩmwe makoima mĩciĩ-inĩ yao na makorĩra icigo-inĩ ingĩ cia bũrũri ũcio.
b Jehova nĩrĩo rĩĩtwa rĩa Ngai. (Thaburi 83:18) Thoma gĩcunjĩ kĩrĩ na kĩongo “Jehova Nũũ?”
Icunjĩ Ingĩ Hihi Ũngĩenda Gũthoma
IKARAGAI MWĨHŨGĨTE!
Russia Gũtharĩkĩra Ukraine—Hihi nĩ Ũrathi wa Bibilia Ũrahinga?
Angĩkorũo nĩguo-rĩ, hihi Bibilia nĩ ĩtaaragĩria ũrĩa maũndũ macio makaarĩkĩrĩra?
MORUTANI MA BATA MA BIBILIA
Ũthamaki wa Ngai nĩ Kĩĩ?
Hĩndĩ ĩrĩa Jesu aahunjagia gũkũ thĩ, aarutanaga ũhoro wĩgiĩ Ũthamaki wa Ngai makĩria ya ũndũ ũngĩ o wothe. Kwa ihinda rĩa mĩaka magana maingĩ, arũmĩrĩri ake makoretwo makĩhoya Ũthamaki ũcio ũũke.
MACOKIO MA CIŨRIA CIA BIBILIA
Ingĩruta Kũ Kĩĩrĩgĩrĩro?
Bibilia no ĩgũteithie kwagagĩria ũtũũro waku rĩu na ĩkũhe mwĩhoko wa ihinda rĩrĩa rĩũkĩte.
MORUTANI MA BIBILIA
Ambĩrĩria Kwĩruta Bibilia na Ithuĩ
Ambĩrĩria kwĩruta Bibilia ũgĩteithĩrĩrio nĩ mũndũ.
