Amahe we Russia mwathahirire e Ukraine eritsuka biro 24 Okwakabiri, 2022, erileka ihabya bandu banene kutsibu abakayithagha obuwathikya bakathibitha erisagha olhuhi. a

 “Muyabere erithulhangika ly’esyobbomu nene. Muk’ithire obuba bunene kutsibu indi siwuwithe ngoku wanga kisoborera. Thwabere thwowa ngoku hane esyotrayini esikaheka abakathibitha, muthwathwiremu erighenda. Obuli kindu muthwakisighire kundi obuli mundu iniatholere eriheka akakapa kake buyira. Ebya thwabya thwathokire eriheka by’ebisakango ebithuhambireko, omubatsi, amaghetse, n’ehy’erirya ehya lhuba-lhuba. Muthwasighire obuli kindu, thwamaghenda okwa paka y’etrayini n’esyobbomu isinemuthulhangika.”—Nataliia, erilhua Kharkiv, Ukraine.

 “Sithwabya thukalengekania thuthi iyabya lhuhe erihika aho lhwathwikira. Munowa esyobbomu isinemuthulhangika omwa tawuni, n’amadirisa inianemusuka-sukana. Munathwiremu erithibitha, namaheka ebikayithaghisibawa bisa. Nahongoka saha ibiri sy’engyakya, mamahamba etrayini eyikaya e Lviv, neryo namathasyahamba ebbasi erinyithwalha e Poland.”—Nadija, erilhua Kharkiv, Ukraine.

Omo mwatsi ono

•  Ni byahi ebikaleka ihabya ekitsibu eki eky’abandu erithibitha?

•  Ni hayi aho abathibithi bangabana amaha?

•  Mbwino e Biblia iyanawathikya abathibithi munabwire?

 Ni byahi ebikaleka ihabya ekitsibu eki eky’abandu erithibitha?

 Ekitsibu ky’abandu erithibitha omwa Ukraine kyatsuka kundi amahe we Russia mwabathahirire. Aliwe, e Biblia yikabisulha ekikulhu ekilekire ihabya ebitsibu ng’ebi eby’abandu erithibitha:

•   Esyogavumente sy’abandu erithimba omwa kihugho kyosi syabirilhabirya abandu bahisi. Mughulhu mungyi abali okwa buthegheki bakakolesaya obuthoki bwabu erinubya abandu.—Omugambuli 4:1; 8:9.

•   Sitani Diabolo, “omuthabali w’ekihugho,” awithe ngoku abirihengemya nabi abandu indi e Biblia yikabugha yithi: “Ekihugho kyosi kiri omo buthoki bw’omubi.”—Yoane 14:30; 1 Yoane 5:19.

•   Eryongera okwa bitsibu ebyabirinubya abandu ahabw’emyaka mingyi, thuli omwa buthuku obo e Biblia yalhaghulha yithi: ‘Oko biro by’enyuma-nyuma hasyabya emighulhu yikalire.’ (2 Timoteo 3:1) Neryo ibbwa kandi, ebiro ebi mwangabere esyonyuhi, ebitsinduli, enzalha, n’amalhwere—ebindu ebikaleka abandu ibathibitha.—Luka 21:10, 11.

 Ni hayi aho abathibithi bangabana amaha?

 E Biblia yikabisulha yithi Omuhangiki wethu, Yehova, b ni Nyamuhanga oyuwanzire n’erikwira abathibithi b’obulighe n’abandu abakakakawa erisighania emiyi yabu. (Eryibuka Ebihano 10:18) Akalhaghanisaya erighunzaho ebitsibu by’abathibithi erilhabira omo gavumente yiwe ey’elhubulha, eyikahulhawamo Obwami bwa Nyamuhanga, eyikendi syasuba omo mwanya w’esyogavumente sy’abandu. (Danieli 2:44; Matayo 6:10) Yehova akendi syakolesya Obwami bwiwe erilhusyaho Sitani Diabolo. (Abanya Roma 16:20) Obwami obo bukendi syabya buthabali bw’ekihugho kyosi, obukendi syaghunzaho erighabana erikasa busana n’emithano y’ebihugho. Abandu bosi bakendi syabya lihiika lighuma ery’ekihugho kyosi. Sihendi syasabya oyukathibitha akasagha, kundi e Biblia yikalhaghanisaya yithi: “Obuli mundu asyikalha omo ndina y’omuliki wiwe w’ebinyu n’omo ndina y’omuthini wiwe; kandi sihali oyuwasyubahyabo; kusangwa obuno bw’Omwami Mukulhu w’emilhondo bwabiribughakyo.”—Mika 4:4.

 Obwami bwa Nyamuhanga busa bw’obwanga ghunziraho ighuma ekitsibu ky’abandu erithibitha ekiriho munabwire. Yehova akendi syakolesya Obwami bwiwe erighunzaho ebitsibu ebikaleka abandu ibabya bathibithi. Eby’erileberyako byabino:

•   Esyonyuhi. “[Yehova] akakubaya amalhwa omo kihugho kyosi.” (Esyonyimbo 46:9) Eriminya Nyamuhanga ng’akendi syaghunzaho athi amalhwa, soma omwatsi “Obuholho Okwa Kihugho—Bukendi Syasa Buthi?”

•   Erinubibwa n’obutsurumi. “[Yehova] Akalhamayabo okw’inubya n’omwagha.” (Esyonyimbo 72:14) Eriminya ngoku bandu bangana hindulha emibere mibi eyibakaghathiremu, soma emyatsi eyiwithe omuthwe “Eriponangana Lyangana Hwaho.”

•   Obusama. “[Yehova] asyalhamya abera abakamulhakira.” (Esyonyimbo 72:12) Eriminya Nyamuhanga ng’akendi syaghunzaho athi ekikaleka ihabya obusama, soma omwatsi “Kinathokekene Indi Ihabya Obulingirirania Omwa by’Emingirirye Okwa Bosi?”

•   Ebyalya eribulha. “Engano yibyeho nene omo kihugho.” (Esyonyimbo 72:16) Eriminya Nyamuhanga ng’akendi syakolha athi erilhangira athi sihali oyukwire enzalha, soma omwatsi “Ekihugho Ekithemo Enzalha?”

 Mbwino e Biblia iyanawathikya abathibithi munabwire?

 Ee. Eryongera okw’ihererya abathibithi b’amaha aw’okwenene busana n’obuthuku obukasa, e Biblia yangana bawathikya omo bitsibu ebya bakabana lino.

 Omusingyi we Biblia: “Si muhanga-hangaye emithima yenyu, nikwa omo buli mwatsi mubwire Nyamuhanga obwagha bwenyu, imukamusaba n’erimuhathikana, imunemuha ewasingya. N’obuholho bwa Nyamuhanga, obulhabire amenge wosi, bwasyatheya emithima yenyu n’amaghaniryo wenyu.”—Abanya Filipi 4:6, 7.

 Ekya kikamanyisaya: Saba Nyamuhanga akuhe erithekana omo bulengekania n’omwa muthima omwa mibere yosi-yosi eyo wanga yisangamu. Lebaya omwatsi “Abanya Filipi 4:6, 7—‘Si Muhanga-hangaye Emithima Yenyu.’”