VANGARARENI!
Vatjwayuki—Mamiliyona govantu kwa tjwayuka moUkraine
Sirongo saRusia kwa tamekere kuhomokera sirongo saUkraine mo-24 Murongankuru 2022, eyi kwa reterere udigu vatungi mo ntani kwa va ninkisire va tjwayuke. a
Nataliia gomoUkraine kwa tanta asi: “Noboma kwa cukire ntani nomahanauko gamwe. Ayo kwa tu tjilisire sili unene ntani udigu kuyifaturura. Apa va tu tanterere asi pana kara nomahina dorutenda edi dina kuvatera vantu mokutjwayuka, yipo twa tokwere nose kutjwayuka. Ose kwa sigire yininke nayinye nokusimba ndjato zimwe tupu. Ose kwa simbire nombapira doyihepwa yosirongo nomutji nomema ntani yikulya. Yokuhupa ko kwa yi sigire, makura tatu ka ronda mehina ado noboma kudizuvha omu dina kucuka.
Nadija kwa tanta asi: “Kapi twa yi gazarere asi napa kara yita. Ame kwa zuvhire yininke omu yina kuhanauka momaruha gamwe gositata ntani makende kwa linyungangere. Yipo na tokwere kutjwayuka noyininke tupu yoyisesu eyi na hepere. Ame kwa tundire membo po-8:00 nokuronda mahina ni ze koLviv makura yipo na ka rondere hena mbesa ni ka ze moPoland.”
Eyi ya hamene mosirongwa esi
Yisinke ya retesa po ukaro ou woutjwayuki?
Ukaro ou wokutjwayuka moUkraine kwa wiza po morwa vakwayita vaRusia kwa homona mosirongo saUkraine. Nye Bibeli kwa kwa faturura ko momunene kuhamena ukaro wokutjwayuka:
Mapangero govantu kapi ya ga tompoka kugava yininke eyi va hepa vantu. Vanankondo momapangero kuruganesa nonkondo dawo mokuhepekera mo vantu.—Muudisi 4:1; 8:9.
Satana muzonaguli mupangeli gouzuni, kuninkisa vantu va rugane yoyidona morwa Bibeli kutanta asi: “uzuni mudima kwa kara mepangero lyoMuzonaguli.”—Johanesa 14:30; 1 Johanesa 5:19.
Vantu kwa ligwanekera nomaudigu monomvhura dononzi, nye ngesi ose kuna kuparuka posiruwo esi za pumba Bibeli asi: “Ove diva asi pomazuva gopouhura, ngapa kara yiruwo yoyidigu.” (2 Timoteusa 3:1) Bibeli kulikida asi mazuva aga ngapa kara yita noyimpwagwa yopansitwe nonzara ntani mauvera, yininke eyi kuninkisa vantu va tjwayuke.—Rukasa 21:10, 11.
Kupi vatjwayuki nava gwana ehuguvaro?
Bibeli kulikida asi Jehova b Musiti, Karunga ogu ga kara neharo nonkenda kovatjwayuki ava va siga mambo gawo. (Deuteronomium 10:18) Age kwa tumbwidira asi nga ka gusa po maudigu govantu kupitira mepangero lyendi lyemeguru ava tumbura asi Uhompa waKarunga, ou ngau ya gusa po mapangero govantu. (Ndaniyera 2:44; Mateusa 6:10) Jehova nga ruganesa Uhompa wendi ngaya guse po Satana muzonaguli. (Varoma 16:20) Uhompa owo ngau kara epangero limwe tupu mouzuni naunye, ntani ngau gusa po hena maligaunuko nagenye gana kara mouzuni. Vantu ngava kara epata limwe tupu mouzuni mudima. Kwato hena ogu nga tjwayuka membo lyendi, morwa Bibeli kwa tumbwidira asi: “Nkenye ogu nga kara mompora moyikunino yamwene yoyindjembere nomaukuzu, kutupu ogu nga mu tjilisa. HOMPA Munankondo nadinye yige ana yi tumbwidire eyi.”—Mika 4:4
Uhompa waKarunga welike wokuvhura kugusa po udigu wovatjwayuki. Jehova nga ka ruganesa Uhompa wendi mokukagusa po maudigu aga aga ninkisa vantu va tjwayuke. Tara yihonena yimwe:
Yita. “[Jehova] age kwa hageka yita.” (Episarome 46:9) Mokudiva ko yoyinzi omu Karunga nga hagekesa po yita, resa sirongwa “Ngapi omu mbili ngazi wiza po pevhu?”moRuhingilisa.
Yirwanangana ntani ehepeko. “Age [Jehova] kuvayoworora mompatakani nomomahepeko.” (Episarome 72:14) Nsene ono hara kukwata egano omu vantu nava vhura kurundurura nkareso zawo zondona, resa yirongwa yokulikwama, “Kunyokera po nkareso zonyengo.” moRuhingilisa.
Ruhepo. “[Jehova] age kuyoworora vahepwe ava ava mu kugu.” (Episarome 72:12) Mokudiva omu Karunga nga ka gusa po ruhepo, resa sirongwa, “Vantu navenye kuvhura va kare noyihepwa yeparu yokugwanesa po ndi?” moRuhingilisa.
Nzara ndi erumbu. “Ewogo lyoyisima ngano tali kara mosirongo.” (Episarome 72:16) Mokudiva ko yoyinzi omu Karunga nga divilisa asi kwato ogu nga fa nzara, resa sirongwa “Uzuni ou ngau pira nzara.” moRuhingilisa.
Kuvhura Bibeli zi vatere vatjwayuki neina ndi?
Nhi. Bibeli kugava ehuguvaro lyewa kovatjwayuki nye azo hena kuvhura kuvavatera momaudigu aga vana kuligwanekera nago ngesi.
Mpango zoBibeli: “Mugova kupura nkenye eyi, nye vanandunge kutakamesa nontambo dawo.”—Yisewe 14:15.
Eyi dina kutanta: Gazadara ko ndi nongonona maudigu aga no vhura kuligwanekera nago ntani neyi no rugana o li popere. Takamesa kuhamena vakorokotji ava va hara kurugana vatjwayuki momudona.
Mpango zoBibeli: “Nsene tuna kara nonondya noyidwara, ngano yi tu gwanene makura.”—1 Timoteusa 6:8.
Eyi dina kutanta: Nyokera po kudemenena koyininke yopanyama. Nsene o tambura ndi yi kugwanena po eyi ono kara nayo, ngo hafa.
Mpango zoBibeli: “Nkenye eyi mwa harera vantu asi va yi mu ruganene none omu yi va ruganene.”—Mateusa 7:12.
Eyi dina kutanta: Kara nelididimiko. Nkareso ezi ngazi kuvatera va ku fumadeke ntani ku kutambaru momukunda ogu wa tjwayukira.
Mpango zoBibeli: “Mwa ha tengwida kuwoko.”—Varoma 12:17.
Eyi dina kutanta: Nyokera po kutengwida kuwoko morwa ehandu, nsene vana kurugana momudona. Nsene o tengwida kuwoko kapi ngayi kugenda po nawa.
Mpango zoBibeli: “Yeeyi ame kuvhura nayinye nononkondo dogu a pameke nge.”—Vafilipi 4:13.
Eyi dina kutanta: Litura mo unene mokukarera Karunga ntani kanderera kwendi. Age nga ku pa nonkondo o lididimikire.
Mpango zoBibeli: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.”—Vafilipi 4:6, 7
Eyi dina kutanta: Kanderera kwaKarunga a ku pe mbili zopamagazaro nomomutjima, mwankenye ukaro ono kara. Tara sirongwa “Vafilipi 4:6, 7—Walye omu kara nosinka soyuma.” moRuhingilisa
a Konyima zezuva limwe kutunda apa Rusia ga homwene sirongo saUkraine, gumwe gosipundi somoUNHCR kwa tente asi ukaro ou kuna kara siponga unene. Momazuva 12 vantu wokupitakana pomamiliyona gavali kwa tjwayuka moUkraine va ze koyirongo yopopepi ndi kwa dukira komaruha gapeke moUkraine.
b Jehova kuna kara Edina lyaKarunga (Episarome 83:18) Tara sirongwa “Yilye Jehova?” moRuhingilisa.
Kuvhura o hafere hena
Rusia kwa homokera Ukraine—Mauporofete gomoBibeli kuna kusika mo ndi?
nsene kuna kusika mo, bibeli za faturura omu nga yi haga ndi?
