KESYAZI!
Ma milioni ma Bantu Batina Kutuka ku Ukraine
Basola ba ku Russie balingile kwitania Ukraine kutukila kindi kya 24/2/2022, bubo bwitizie ma milioni ma bantu boba nu kukita batine lubilu kutuka mu nsi zabo. *
“Balekelaga ma bombe kunsania bwa nkambo. Buli bubibu kusola musagu wongo bwasi-bwasi kubuno ukwitia boba nunse. Gatwamenyile buno train zikuvwa kweka bantu, twamonile buno buli busoga tutine nu beiswe. Twasigile binsania kubuno na muntu atungananine tugu kweka ka muzigo kakeke. Muntu en’ekile madokima, idawa, mazi nu twa bintu tukeke twakulya. Twasigile binsania nu kwenda kulindila train aba buno kwalekelwaga ma bombe.”—Nataliia, kutukila ku Kharkiv ku Ukraine.
“Tatwakengelaga buno bita binabasila. Tondo nalingile k’ungwa nkindo za ma bombe ku biziki kishembe mu mwino weitu nu madirisa malingile kutenga-tenga. Namonile buno buli busoga nitine nu n’ekile tugu bintu bya mutali nunse. Natukile ku numba na 8h:00’ n’ekile train nu kutinina ku mwino wa Lviv nu kusila n’ekile bus nu kubasa ku Pologne.”—Nadija, kutukila ku Kharkiv ku Ukraine.
Wono musagu watendele
Kikizi kikukitaga bantu batine nsi zabo?
Bantu balingile kutuka ku Ukraine kubuno basola ba Russie balingile kwitania Ukraine. Biblia byalosya nunse kabamba kakizi bantu bekutinaga nsi zabo:
Ma guvernema ma banakantu mu kisi kinsania tamekukosya kukasa bantu bibyo bibekwijanizia. Mambizi meingi, babo beli na bwangato bekusungyaga bango.—Musambazi 4:1; 8:9.
Satana Diabolo, “mukota wa kisi” ekusindika bantu bakite bubi, ukinsa Biblia byatenda: “Kisi kinsania kili kunsi kwa bwangato bwa wozo mubi.”—Yoana 14:30; 1 Yoana 5:19.
Gantata na tunkunku tukukulumana nato bantu kutukila wakalazi, twizi buno tukulama bindi byatendile Biblia bunee: “Mu bindi bizinda kukaba bitondo bibibu.” (2 Timoteo 3:1, NTKI57.) Mu bindi bibyo munabaside nunse bita, kibuka, nzala, nsambo nene za kutolokela—nu bubo bukukita bantu kuba batini.—Luka 21:10, 11.
Kikizi kinakasa batini kilemanizio?
Biblia byalosya buno Yehowa, Mubumbi weitu, * eli Kalaga ukulosyaga lutundo nu ukukwilaga kyombo batini nu babo batina nu kusiga mazumba mabo. (Kukokomezia Mulembe 10:18) Alaga kusila tunkunku twa batini kutingila guvernema zage za mwigulu, zikumanwa Bukota bwa Kalaga, buk’angata ga kiziki kya makota ma banakantu. (Danieli 2:44; Matayo 6:10) Kutingila Bukota bwage, Yehowa ekazikya Satana Diabolo. (Baroma 16:20) Bukota bwongo bwangate kisi kinsania nu kutikya miaga zabegania nsi za kisi. Bantu ba kisi kinsania bakite kikanga kimozi nu kuba muntu umozi. Takukaba muntu ukatina lingo nu kusiga numba zage, kubuno Biblia byatenda bunee: “Na muntu na muntu na wikale gansina ga muzabibu wage nu gansina ga muti wage wa biguma; aba takuli ukabeitia boba kubuno Yehowa, Mwiya Mayombo atendile bubo.”—Mika 4:4.
Bukota bwa Kalaga tugu u bwazindye binsania bikukita bantu kuba batini ono lelo. Kutingila Bukota bwage Yehowa ekasila tunkunku tunsania tukukita bantu kuba batini. Lola bibino byekakita:
Bita. ‘[Yehowa] ekasila bita mu kisi kinsania.’ (Nimbo 46:9) Kwakumenya Kalaga ekasila bita mu nzila nkizi, soma musagu “Buni Bukamona Kisi Bubobelelo?”
Kumonela bango nu butombo. “[Yehowa] akulule kalamo kabo ku kubengwa nu kunyagwa.” (Nimbo 72:14) Kwa kumenya buni bunagalukya bantu makengelo mabo ma bulundulundu mabeli namo kutukila wakalazi, soma musagu “Tunaweza Kushinda Chuki!”
Muzambo. “[Yehowa] onie. . . muzambi uteli na mukasia.” (Nimbo 72:12) Kwakumenya buni bukasila Kalaga bibyo bikulisya muzambo soma musagu “Ndi Muzambo Ukasila Busi Bumozi?”
Nzala. “Matubulo mabe meingi gantata ga miduko.” (Nimbo 72:16) Kwa kumenya buni bukakita Kalaga kwa kutitikizia buno takuli muntu ukukua na nzala soma musagu “Ulimwengu Usio na Njaa”
Ndi Biblia binakasya batini ono lelo?
Lebelebe. Biblia byakasa batini kilemanizio kya bulili ku kabamba ka nkungu zikuvwa nu binabakasya kulwania mizangozango zibeli nazo ono lelo.
Kanuni ka Biblia: “Kikongolo akwitabizagia nabo nabo, tondo mwiya mwenge akutitika bwakwenda.”—Misumo 14:15.
Bwisulilwa: Kengela ku mbaselo mbi zunakulumana nazo nu buni b’unilanga. Ube meiso na beibi bekupunganaga na batini kubuno bizi mizangozango zibekubezaga nazo nu lukita lwa kutamenya busoga kiziki kibatinila kukyo.
Kanuni ka Biblia: “Ndi tuli n’idia nu nsulu, tubogeboge nabyo.”—1 Timoteo 6:8.
Bwisulilwa: Ntukokomezye makengelo ku bintu bya mubili. Ndi ukubogelabogela bintu bya mutali biuli nabyo ntun’ida mbogimbogi.
Kanuni ka Biblia: “Bubo bumukutunda bango bantu bamukitile, ububo nu inyuwe bumubakitile.”—Matayo 7:12.
Bwisulilwa: Ube muntu musoga nu ukulosya nkiki. Ndi uli na misako zezo tabwabe bubibu ku bantu ba kuko kuwatinina bakwitabizye nu kukulosya lwanzo.
Kanuni ka Biblia: “Tamusubizie muntu wampa bubi ku bubi.”—Baroma 12:17.
Bwisulilwa: Ntulonde kwisuba ku kabamba ka bongoa ndi wakitilwa bubi. Bubo bukubezaga na mbaselo mbi nunse.
Kanuni ka Biblia: “Ninavwama kukita bitondo binsania mu wozo ukunkasaga magala.”—Bafilipi 4:13.
Bwisulilwa: Bika Kalaga ga kiziki kitangi mu kalamo kobe nu sega kweli. Enakukasa magala ma kulwania lukita lwobe.
Kanuni ka Biblia: “Tamwikutie ku kampa, tondo mu kitondo na kitondo, ku kusega nu ku kubuzia gamozi na kusima, mulolesie masego meinyu ku Kalaga. Nu bubobelelo bwa Kalaga bubo bwatinga menge mansania bwalange mitima zeinyu nu makengelo meinyu.”—Bafilipi 4:6, 7.
Bwisulilwa: Sega Kalaga akukase bubobelelo bwa makengelo nu bwa mutima mu lukita lunsania lunaba mulo. Lola Musagu “Bafilipi 4:6, 7—‘Tamwikutie ku Kampa.’”
^ Kusila kindi kimozi nagalingile basola ba Russie kwitania Ukraine, Agence de Nations Unies pour les réfugieés (UNHCR) zatendile buno bubo bwakite bantu beingi kuba batini kutinga ingo nkungu insania. Kusila tugu bindi 12 bantu batinga milioni 2 batinine ku nsi zili muntungo mwa Ukraine, nu bango milioni imozi basigile mazumba mabo nu kutina mu bingo biziki mumo mu Ukraine.
^ Yehowa u izina lya Kalaga. (Nimbo 83:18) Lola Musagu “Yehowa U Nazi?”
You May Also Like
MEIGISYA MA BIBBLIA
Geleka Tangi Kwijigisya Biblia Gamozi na Beiswe
Linga kwijigisya Biblia mu nzila za mwezezyo na mwigisya kishembe.
