Ha 24 Fabruary 2022, lifuchi lyaRussia lyatumine maswalale vakalukuke lifuchi lyaUkraine. Echi chinalingisa vatu vavavulu vachine. a

 “Twevwile tupata vali nakupiluka. Ngwevwile woma chikuma, kaha kangweshi namazu alumbununa omu chapwileko. Omu vatulwezele ngwavo kuli jimasuwa jili nakututa vatu vaze vali nakusaka kuchina, nayetu twayile nakunyina masuwa. Twasele vyuma vyavivulu nakuchina kaha natujingonga twatundende. Twambachile kaha mapapilo amijimbu yetu yayilemu, navitumbo, nameya navisakwola. Kaha twayile kuchitulilo chamasuwa oku tupata vali nakupiluka.”—Nataliia, wamuKharkiv, muUkraine.

 “Katwashinganyekele ngwetu mulifuchi lyetu munahase kupwa jitako swi nomu yaputukile. Ngwevwile tupata vali nakupiluka kuvihela vyamunganda yetu, kaha jinjanena japwile nakundenda. Kufumaho, ngwasezele vyuma vyavivulu nakumbatako kaha vyavindende vize vyapwile vyavilemu nakuchina. Ngwafumine hembo nalwola lwa 8:00 yachimene, ngwayile nakunyina masuwa yapwile nakuya kuLviv, omu ngwahetele kuze ngwanyinyine sacha nakuya kuPoland.”—Nadija, wamuKharkiv, muUkraine.

Tala vyuma natushimutwila muchihande chino

•  Vyuma muka vinalingisa vatu vahone kupwa vakukingiwa?

•  Uno matunduke vanahase kuwana kulihi lutalililo?

•  Uno Mbimbiliya yinahase kukafwa matunduke makumbi ano tahi?

 Vyuma muka vinalingisa vatu vahone kupwa vakukingiwa?

 Vatu kuhona kupwa vakukingiwa muUkraine chaputukile omu maswalale javaRussia valukukile lifuchi kana. Chipwe ngocho, Mbimbiliya yasolola hatoma vyuma vili nakulingisa vatu vahone kupwa vakukingiwa:

•   Jifulumende javatu mukaye kosena jinahono kulingila vatu vyuma vasakiwa. Kaha vakulwane jafulumende vali nakuzachisa ngolo javo hakushinyinyika vatu.—Muka-kwambulula 4:1; 8:9.

•   Satana Liyavolo uze apwa “muka-kuyula kano kaye,” ikiye ali nakuyula vatu ngana muze yahanjika Mbimbiliya ngwayo: “Kaye kosena katwama mumavoko ayauze wakuhuka.”—Yowano 14:30; WaYowano 1, 5:19.

•   Chamokomoko naukalu vanamononga vatu hamyaka yayivulu, tuli nakuyoyela mulwola luze vavuluka muMbimbiliya ngwavo: “Hamakumbi akukuminyina nahakapwa lwola lwalukalu.” (WaChimoteu 2, 3:1) Shikaho makumbi kana tunawatachikiza mwomwo yajijita, naukalu wakulijila, nakuhona vyakulya, namisongo yachihita. Ukalu kana ukiko uli nakulingisa vatu vaseze membo avo.—Luka 21:10, 11.

 Uno matunduke vanahase kuwana kulihi lutalililo?

 Mbimbiliya yasolola ngwayo Yehova b uze apwa Tengi, apwa Kalunga uze azanga nakutetela matunduke navatu vaze vanachinyi nakuseza membo avo. (Lushimbi lwamuchivali 10:18) Ashika kukakumisa ukalu wosena uze vali nakumona matunduke kuzachisa fulumende yenyi yamwilu, yize vavuluka ngwavo Wangana waKalunga, uze naukashisa jifulumende javatu. (Ndanyele 2:44; Mateu 6:10) Yehova mwakazachisa Wangana wenyi hakufumisako Satana Liyavolo. (Wavaka-Loma 16:20) Ou Wangana naukapwa fulumende yamukaye kosena, kaha naukafumisako ukalu wakumona vatu ulumbi uze weza mwomwo yakulihandununa chamafuchi. Vatu vosena mukaye navakapwa tanga yimwe yakulinunga. Kakweshi kukapwa mutu mwakachina nakuseza limbo lyenyiko. Mbimbiliya yashika ngwayo: “Navakatwamanga mutu himutu mwishi yamuvinyo wenyi, mwishi yamukuyu wenyi, kaha naumwe wauchi mwakavevwisa woma, mwomwo Yehova wamayongomena nahanjikamo lyehi.”—Mika 4:4.

 Wangana waKalunga kaha ukiko naukafumisako ukalu wosena uze vali nakumona matunduke makumbi ano. Yehova mwakazachisa Wangana wenyi mangana akafumiseko ukalu wosena uze uli nakulingisa vatu vapwenga matunduke. Ukalu umwe shina:

•   Jita. “[Yehova] mwakumisa jijita hamavu hosena.” (Samu 46:9) Hakusaka kutachikiza omwo Kalunga mwakafumisako vikokojola, tanga chihande chakwamba ngwavo “Uno haMavu Nahakapwa Ngachilihi Kuunda?”

•   Luyanjisa naulyanyi. “[Yehova] mwakavapululula kuluyanjisa nakuulyanyi.” (Samu 72:14) Hakusaka kutachikiza omwo vatu vanahase kwalumuna vishinganyeka vyavo vyavipi, tanga vihande vyakwamba ngwavo “Mwakuhonesela Chijindo Kutanda.”

•   Uhutu. “[Yehova] mwakapululula vaka-kuhutwa vaze vali nakutwa kawelele.” (Samu 72:12) Hakusaka kutachikiza omwo Kalunga mwakafumisako uhutu, tanga chihande chamuchingeleshi chakwamba ngwavo: “Is a Fair Economic System Possible?”

•   Kukaluhwa chavyakulya. “Hamavu nahakapwanga mbuto jamanona jakulisala.” (Samu 72:16) Hakusaka kutachikiza omwo Kalunga mwakafumisako zala, tanga chihande chamuchingeleshi chakwamba ngwavo “A World Without Hunger?”

 Uno Mbimbiliya yinahase kukafwa matunduke makumbi ano tahi?

 Eyo. Mbimbiliya yahana matunduke lutalililo lwamwenemwene nakuvakafwa nawa valitalasane naukalu navamona makumbi ano.

 Lundongi lwamuMbimbiliya: “Kanda namulizakamina hachuma numba chimweko, oloze muvyuma vyosena, hakulomba, nahakulembelela, nahakusakwilila, mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu.”—Wavaka-Fwilipi 4:6, 7.

 Mwalumbunukila Mazu Kana: Lomba Kalunga akukafwe uunde muchima nakupwa wakuunda muvishinganyeka mukala ukalu. Tanga chihande chamuchingeleshi chakwamba ngwavo “Philippians 4:6, 7—‘Do Not Be Anxious About Anything.’”