NGAIHVEN RENG RAWH U!
Râl Tlânte Harsatna—Mi Maktaduai Têlin Ukraine An Chhuahsan
Russia chuan kum 2022, February nî 24 khân Ukraine ram chu sipai chaknain a rûn ṭan a, chu chuan mi maktaduai tam tak chu dinhmun hlauhawma a awmtîr avângin, ram chhuahsan nghâl an tum a ni. a
“Bomb-te a puak nasa hle a. A hlauhawm dân chu ṭawngkama sawi fiah thiam rual a ni lo. Rêl chhuak tûr a awm tih kan hriat veleh, chu rêla chhuah kan tum nghâl a. Mahse, mi pakhat tân hmun zîm tê chauh pêk a nih avângin kan thil neih zawng zawng chu hnutchhiah a ngai a ni. Lehkha pawimawh zual te, damdawi te, tui te, leh ei tûr tlêm azâwng chauh kan keng thei. Engkim kalsanin rêl lam chu kan pan a, chutih lai chuan bomb-te a puak reng a ni.”—Ukraine, Kharkiv khawpuia chêng Nataliia-i.
“Hetiang hian indona a thleng tak tak ang tih rêng ka ngaihtuah ngai lo. Khawpui khawi hmun aṭang emaw hian thil puak ri dur hi ka hria a, kawngkhârte a rawn nghîng a. Ka mamawh zualpuite chauh kenga tlân chhuah ka tum ta a ni. Lviv khawpui pan tûr rêl chuang tûrin zîng dâr 8:00-ah in ka chhuahsan a; chuta ṭangin Poland ram pan tûr bus-ah ka chuang leh a ni.”—Ukraine, Kharkiv khawpuia chêng Nadija-i.
He thuziakah hian hêngte hi a tel:
Râl tlânte harsatna thlentu ber chu engte nge ni?
Ukraine rama râl tlânte harsatna chu Russia-in sipai chakna hmanga a rûn vânga inṭan a ni a. Mahse, Bible chuan chûng râl tlânte harsatna zawng zawng thlen chhan dangte pawh a târ lang a ni:
Khawvêl sawrkârte chuan mihringte chu an mamawh a pe thei tak tak lo. Thiltihtheihna neitute chuan sawrkâr thuneitute chu mite hnehchhiah nân an hmang fo ṭhîn.—Thuhriltu 4:1; 8:9.
Diabol-Setana, “khawvêl lal” chuan mihringte chungah chûng thil ṭha lote chu a thlentîr a, Bible chuan heti hian a sawi a ni: “Khawvêl pumhlûm hi mi sual thu thuin a awm,” tiin.—Johana 14:30; 1 Johana 5:19.
Kum zabi tam tak chhûngin mihringte hian buainate kan neih bâkah, Bible-in: “Ni hnuhnûngahte chuan hun khirh takte a lo awm ang,” tia a sawi lâwkna hunah kan awm mêk a ni. (2 Timothea 3:1) Chu bâkah, tûn kan hun hi indona te, leilung chhiatna te, ṭâm te, leh hrite—mite tlân chhiattîrtu thilthlengtea chhinchhiah a ni.—Luka 21:10, 11.
Râl tlânte chuan khawiah nge beiseina an hmuh theih?
Bible chuan min Siamtu Pathian Jehova b chu râl tlânte leh mahni chênna in tlân chhuahsantute hmangaihtu leh khawngaihtu a ni tih a sawi a. (Deuteronomy 10:18) Ani chuan râl tlânte hmachhawn harsatnate chu a vân lam sawrkâr hmanga chingfel tûrin a tiam a, chu Pathian Lalram chuan mihring sawrkârte chu a rawn thlâk tawh ang. (Daniela 2:44; Matthaia 6:10) Jehova chuan chu Lalram hmangin Diabol-Setana chu a nuai bo vang. (Rom 16:20) Chu Lalram chuan ramrîte avânga mite inṭhen hranna chu ti bovin, khawvêl pumpuiah ro a rêl tawh ang. Mi zawng zawng chu khawvêl pum huap chhûngkaw lungrual tak an ni ang a. Tu mahin mahni in leh lo an tlânsan a ngai tawh lo vang, Bible chuan heti hian a tiam a ni: “Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tu man an tihlau lo vang: sipaihote LALPA kâ chuan a sawi tawh si a,” tiin.—Mika 4:4.
Pathian Lalram chauhvin tûna kan hmachhawn mêk râl tlânte harsatna chu a chingfel hlen thei a ni. Jehova chuan a Lalram hmangin râl tlân ni tûra mite siamtu buainate chu a nuai bo vang. Hêng entîrnate hi han ngaihtuah teh:
Indona. “[Jehova] chuan indonate chu kâwlkil thlengin a tireh ṭhîn.” (Sâm 46:9) Pathianin chûng buainate a tihreh dân hre tûrin, “Lei Chunga Remna—Engtin Nge A Lo Thlen Ang?” tih thuziak chu chhiar rawh.
Hnehchhiahna leh nunrâwnna. “[Jehova] chuan hnehchhiahna leh nunrâwnna lak ata a tlan ang.” (Sâm 72:14) Mite rilru thlâk danglam theih dân hre thiam tûrin, “Inhuatna Thleng Leh Ṭhîn Chu Titâwp Rawh,” tih thuziak chu chhiar rawh.
Retheihna. “Pachhiain a auhvin [Jehova] chuan a chhanhim ang.” (Sâm 72:12) Pathianin retheihna awmtîrtu bul berte a nuai bo dân tûr hre turin, “Hausa-Rethei Intluktlânna A Awm Thei Ang Em?” tih thuziak chu chhiar rawh.
Ṭâm Tlâkna. ‘Leiahte hian buh tam tak a awm ang.’ (Sâm 72:16) Pathianin ṭâmna awm tawh lo tûra a tih dân hre tûrin, “Ṭâmna Awm Tawh Lohna Khawvêl A Awm Ngai Ang Em?” tih thuziak chu chhiar rawh.
Râl tlânte chu Bible-in tûnah a ṭanpui thei em?
Thei e. Bible chuan râl tlânte tân nakin hun beiseina chiang tak a pêk bâkah, tûna an hmachhawn mêk harsatnate pawh a ṭanpui thei a ni.
Bible thu bul: “Mi mâwl chuan thu tin a ring a, mi remhria erawh chuan a kalna a en ṭha ṭhîn.”—Thufingte 14:15.
A Awmzia: Lo thleng thut thei dinhmun hlauhawmte leh chumi laka invênghim tûra i tihtheihte chu ngaihtuah lâwk rawh. Râl tlânte chuan an râl tlânna hmunah him tâwk nia inhriatna an neih dâwn loh avângin, chumi remchânga lâk lo tumtute lakah chuan fîmkhur rawh.
Bible thu bul: “Ei tûr leh silh tûr neiin chûngah chuan kan lungawi ang.”—1 Timothea 6:8.
A Awmzia: Tisa lam thilte ngaihven chu pumpelh rawh. I mamawh zualpuite i neih avânga i lungawi chuan, i hlim lehzual ngei ang.
Bible thu bul: “Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u.”—Matthaia 7:12.
A Awmzia: Dawhtheihna leh khawngaihna nei rawh. Chûng miziate chuan i chênna hmuna mite zah leh pawm a hlawhtîr ang che.
Bible thu bul: “Tu sual pawh sualin thungrûl suh u.”—Rom 12:17.
A Awmzia: Dik lo taka cheibâwl i nih hunah phuba lâk tum suh. Phuba lâkna chuan dinhmunte chu a tichhe zual mai zâwk ang.
Bible thu bul: “Mi tichaktuah chuan engkim ka ti thei a ni.”—Philippi 4:13.
A Awmzia: I nunah Pathian dah pawimawh berin, a hnênah ṭawngṭai ang che. I harsatnate hmachhawn tûrin chakna a pe thei che a ni.
Bible thu bul: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.”—Philippi 4:6, 7.
A Awmzia: Eng dinhmun hnuaiah pawh awm mah la, Pathian hnênah rilru leh thinlunga thlamuanna pe tûr chein dîl ang che. “Philippi 4:6, 7—‘Engah Mah Mangang Suh U,’” tih thuziak chu chhiar rawh.
a Russia-in Ukraine a rûn hnu chuan, United Nations High Commissioner for Refugees (UNHCR) chuan, chu dinhmun chu rîkrum thilthleng azawnga dinhmun hlauhawm ber tih a sawi a. Ni 12 chhûng lêkin, mi maktaduai hnih aia tamte chuan Ukraine ram chhuahsanin, an ṭhenawm ramahte an tlânchhia a, chutih rualin mi maktaduai khat aia tamte chu ram chhûnga hmun dangahte an insawn bawk a ni.
b Jehova chu Pathian hming bil a ni. (Sâm 83:18) “Jehova Chu Tu Nge Ni?” tih thuziak chu chhiar rawh.
You May Also Like
Russia-in Ukraine A Rûn—Bible Hrilh Lâwkna A Thleng Famkim Em?
He thilthleng pawimawh chhan hi hriat tum ang che.
ESSENTIAL BIBLE TEACHINGS
Pathian Ram Chu Eng Nge Ni?
Isua chuan rawng a bâwl chhûngin, thil dang zawng aiin Pathian Ram chanchin a zirtîr nasa ber a. Mite chuan kum zabi tam tak chhûng chu, chu Ram lo thleng tûrin an ṭawngṭai tawh a ni.
BIBLE ZIRTIRNATE
Bible Sawihona Neih Dîlna
Mi pakhat nên a thlâwna phûrawm taka Bible sawihona nei rawh.
