TWALILILINI UKUYA AITEYANYE!
Antu Aingi Iyutuka Umu Ukraine
Apa 24 Febuluwale, 2022, uteeko uwa Russia watandike ukuzanza impanga iya Ukraine. Na cii caticilenga ukuti antu aingi yaye umu uzanzo, nupya yamwi yutukila nu mu mpanga zyuze. a
Nataliia uwa ku Kharkiv umu Ukraine walondolwile ati: “Tuvwanga kuno mabomu yakupuulika. Ala cuvwisyanga sana intete icakuti ungafilwa nu kulondolola. Lino twamanyile ukuti kwali matileni aasendanga antu, twapingwile ukufumamo. Twasenzile sile utuntu tunono utungingila umu kacola aka kupaapa nu kusya ivyasyala. Twakwanisye sile ukusenda mapepala aa ku uteeko, milembo, manzi, nu twakulya. Twasiile ivintu vyonsi nu kusimwilila uku sitesyeni yakwe tileni ala mabomu ya kupuulika.”
Nadija uwa ku Kharkiv umu Ukraine watiile: “Tutenekelanga ukuti kungaya inkondo. Nuvwanga kuno vimwi vyapuulikanga umu ncende zimwi izya mu musumba witu nu kulola kuno mawindo yateentanga. Napingwilepo ukufuma umu musumba nu kusenda sile ivintu ivicindamisye. Nafumile pa ng’anda na 8:00 katondo inkwela tileni ikuya uku Lviv alino inja inkwela baasi ikuya uku Poland.”
Umu cipande cii, tumaasuka mauzyo yaa
I vyani ivyativilenga ukuti kuye uwavya uu uwa mbutusi?
Uwavya uu uwa mbutusi umu Ukraine, watandiike lino aasilika aina Russia yazanzile impanga iya Ukraine. Lelo, kwaya na vyuze vino Baibo ikalanda ivikalenga ukuti kuye uwavya uwa mbutusi. Ni vintu vivyo aevi:
Ya kateeka ya yantunze yakafilwa ukupeela antu yano yakateeka ivintu vino yakulondekwa. Ya kateeka yakaomvya amaka yao ukutitikizya antu.—Kasambilizya 4:1; 8:9.
Satana Ciwa, “kateeka wa nsi yii,” akaalenga antu yacita iviipe icakuti Baibo ikati: “Insi yonsi ikatungululwa nu mwipe.”—Yoani 14:30; 1 Yoani 5:19.
Lyene ukulunda pa ntazi zino swe yantunze tukakwata ukufuma na mpiti, ndakai tukwikala umu nsita ino Baibo yasoowile ukuti: “Umu manda akusyalikizya mulaya insita izitale sana.” (2 Timoti 3:1) Nupya umu manda kwene yaa, mwali nu kulaaya inkondo, mazanzo aakuiponela, vipoowe, ni vikuko. Nupya ivintu kwene vii, i vikalenga antu yapuuka uku ncende izya kumwao.—Luka 21:10, 11.
Uzye a weni aangazwa imbutusi?
Baibo ikalanda ukuti Kaumba witu Yeova, b a Leza aakalanga ukutemwa ni cikuuku uku mbutusi nu ku yantu aafuma uku mpanga izya kumwao. (Malango 10:18) Watulaya ukuti uteeko wakwe uwa kwi yulu, uukaamwa ukuti Uwene Wakwe Leza, ulafumyapo uwavya uwa mbutusi nu kufumyapo mauteeko aa yantunze. (Danieli 2:44; Mateo 6:10) Yeova alaomvya Uwene wakwe ukufumyapo Satana Ciwa. (Loma 16:20) Uwene uu ulateeka insi yonsi, nupya kutalaya ya nande aa mpanga izipusanepusane aayako ndakai. Umu nsi yonsi antu yalaya aalemane. Kusi nanti aumwi aalasya ing’anda yakwe, pano Baibo yalaya ukuti: “Umuntu ali wensi alaikalila mu mutende apakasi ka mitingi ni misamvu yakwe. Kusi nanti umwi alayoofya, pano Yawe Wamaka yonsi uwatavwanga vintu vii.”—Mika 4:4.
Uwene wakwe Leza sile uungafumyapo uwavya ukalenga kuye intazi izya mbutusi ndakai. Yeova alaomvya Uwene uu ukusisyapo intazi izikapatikizya antu ukuya imbutusi. Lekini tulandeko pa ntazi zimwi:
Inkondo. ‘Yeova alalesya inkondo pano nsi yonsi.’ (Masamu 46:9) Pakuti mumanye vino Leza alalesya inkondo, mubelenge icipande icikati “Uzye Umutende Pano Nsi Ungayako Uli?”
Kucuziwa nu unkalwe. “[Yeova] amayapokololanga kuli yayo akuyacuzya.” (Masamu 72:14) Pakuti muvwikisye vino antu yangasenuka, belengini ivipande ivyaya muli magazini yakuti “Vino Tungacimvya Ulupato.”
Upiina. “[Yeova] amapokololanga antu aulilwa akupunda iyati, ‘Tutuulwe!’” (Masamu 72:12) Pakuti mumanye vino Leza alasisyapo intazi ya upiina, belengini cipande icikati “Uzye Antu Yonsi Yangikala Ukwaula Ukucula?”
Vipowe. “Mulaya ingano izingi umu mpanga yakwe; viseekwa vilavula.” (Masamu 72:16, NWT.) Pakuti mumanye vino Leza alacita pakuti kutaya nanti a wenga uwa kuti auvwa inzala, belengini icipande icikati “Uzye Cingacitika Ukuti Umu Nsi Mutaya Inzala?”
Uzye Baibo ingaazwa imbutusi ndakai?
Ee ingayazwa. Nanti cakuti Baibo ikalaya imbutusi ukuti vintu vilazipa uku nkoleelo, na ndakai kwene ingayazwa ukumanya ivya kucita pa ntazi zino yakakwata.
Cisinte ca muli Baibo: “Umuntu iciwelewele wene akataila muli vyonsi kwene, lelo uwa mano wene akawaka imipitile yakwe.”—Mapinda 14:15.
Vino cikapiliula: Mwaenekela ukuti mungaponelwa uwavya, alino nu kumanya vino mungaicingilila. Mwacenjela uku vipondo ivikalonda ukuzanza imbutusi. Ivipondo vikalonda ukuzanza antu aafuma uku mpanga zyuze pano ala yakuvwa intete nupya ala yatamanyikisye ni ncende ningo ningo.
Cisinte ca muli Baibo: “Nga tukweti ivyakulya ni vyakuzwala, twateeka imyenzo kuli vivyo kwene.”—1 Timoti 6:8.
Vino cikapiliula: Mutaikisya mano uku mpiya nu ku vintu vino mwakwata. Nga mwateeka umwenzo kuli vino mukweti ivikaalondekwa, mulaya sana ni nsansa.
Cisinte ca muli Baibo: “Acino vyonsi vino mukalonda ukuti antu yamucitile avino namwe mulinzile ukuyacitila.”—Mateo 7:12.
Vino cikapiliula: Mwaya aatekele nupya aa cikuuku. Nga mukweti imiyele ii, antu yalamucindika nupya mulaikala nayo ningo.
Cisinte ca muli Baibo: “Mutawezezya uyi pa uyi.”—Loma 12:17.
Vino cikapiliula: Mutaaleka ukuti icipyu cilenge mulandule nga yakumucuzya. Pano ukulandula kungalenga sile ivintu ukwipilako.
Cisinte ca muli Baibo: “Umu vintu vyonsi nakwata maka ukupitila muli wino akampeela maka.”—Filipi 4:13.
Vino cikapiliula: Mwaika Leza pa nkoleelo nupya mwapepa kuli aliwe. Angamwazwa ukuzizimizya lino mukweti intazi.
Cisinte ca muli Baibo: “Mutasakamikwa nanti acimwi, lelo lekini vyonsi vino mukulenga vimanyikwe kuli Leza ukupitila umwi pepo nu kupaapata pamwi nu kutaizya; nupya umutende wakwe Leza, uwacila imyelenganyizizye yonsi iya yantu ulacingilila imyenzo inu na melenganyo inu.”—Filipi 4:6, 7.
Vino cikapiliula: Nga mwakwata uwavya uli onsi, mwalenga Leza ukuti amupeele umutende umu melenganyo nu mu mwenzo winu. Lolini icipande icakuti “Filipi 4:6, 7— ‘Mutasakamikwa Nanti Acimwi.’”
a Uwanda uwalondelilepo ukufuma pano inkondo yatandikiile umu Ukraine, aakalolekesya pa mbutusi mu nsi yonsi ya United Nations High Commissioner for Refugees (UNHCR), yalanzile ukuti, uwavya uu uwa kupumikizya wali uukalamba sana. Antu ukucila pali 2 milyoni yutwike ukufuma umu mpanga iya Ukraine nu kuya uku mpanga zyuze nupya antu 1 milyoni yutwike pa mang’anda yao.
b Yeova ali zina lyakwe Leza. (Masamu 83:18) Mulole icipande icakuti “Uzye Yeova A Weni?”
Limwi Mungatemwa Ukulolako na Vii
Ya Russia Yazanza Impanga ya Ukraine—Uzye cii cikufikilizya vino Baibo yasowiile?
Ndi cakuti avino cili, uzye Baibo ikatunena vino ivintu vilaya?
MASAMBILILO AA MULI BAIBO AACINDAME
Uzye Uwene Wakwe Leza I Cani?
Mu mulimo wakwe onsi, Yesu wasambizyanga antu pa Wene Wakwe Leza kucila vino wasambizya pa vintu vyuze. Pa myaka iingi, alondezi yakwe yakapepa ukuti Uwene uwo wize.
