2022, febrero kati 24 ra Rusia war aiklabanka daknika ba Ucrania kuntrika kutbi briaia tâ krikan, bara kuntrika ra diman. Ucrania uplika milian nani ba mahka plis wala ra plapaia kan, swak takaia dukiara. a

 “Bum nani baiwi kan. Sibrin tara dukia kan, dîa taki kan ba bîla kum ra wiaia sip apia ai munisa. Plis wala ra plapaia dukiara tren nani takbia nu taki banhri taim, mahka aimaki impakaia wahbi saki banhri. Upla kumi bani sakbat sirpi kumi baman brih wabia swin kan. Baha mita diara sut wan nina ra swiaia kan. Wauhkataya, sîka, lî, bara plun isi nani baman wahbi brih waia sip kan. Wan tnaya kir ra bum nani baiwi kan, duki nani sut swi si, tren alkaia pliska kat wih banhri”.—Nataliia, Ucrania kuntrika, Kharkiv tawanka wina.

 “Aima kumi ra sin yang nani lukras banhwi kapri, rait pali war aiklabanka kum takbia ba. Tawan bilara, plis sât sât wina bum nani baiwi binka nani wali kapri, bara windar nani ba kitwi kan. Diara nani nit ba baman bri si mahka taki wamna lukri. Titan 8 aklak, waitla wina takri, bara tren wal Lviv tawanka kat wari, ba wina bus wal Polonia kuntrika ra dimri”.—Nadija, Ucrania kuntrika, Kharkiv tawanka wina.

Naha ulbanka ra naha makabi walanka nani ansa munisa

•  ¿Naha war aiklabanka ra dîa mata upla nani ba ai pliska swi si plis wala ra plapaia kan ki?

•  ¿Ai pliska wina plapaia kan uplika nani ba bîla kaikanka brisa ki?

•  ¿Baibil ba ai pliska wina plapaia kan uplika nani ra hilp munaia sip sa ki?

 ¿Naha war aiklabanka ra dîa mata upla nani ba ai pliska swi si plis wala ra plapaia kan ki?

 Rusia war aiklabanka daknika mita Ucrania kuntrika kutbi briaia tâ krikan tâka, uplika nani ba plapaia nit kan. Sakuna naha trabilka dukiara, Baibil ba tânka kau tara nani marikisa:

•   Tasba aiska ra upla gabamintka nani ba ai uplika nani dîa nit ba yabaia sip apia kan. Sam taim gabamint nani ba upla nani ai karnika mununhtara bri kaia, apia kaka saura munaia dukiara ai karnika yus munisa (Smasmalkra 4:1; 8:9).

•   “Naha tasbaya ra wihta” Sitan Dibil ba trai munisa upla nani sin witin baku lukanka saura pali bribia. Baibil ba wisa: “Tasba aiska na lika Sitan karnika mununhtara sa” (Jan 14:30; 1 Jan 5:19).

•   Trabil nani sât sât tâwan, upla nani ba pat mani handat handat pât wahwisa. Kuna baha purkara yawan ba Baibil mita prapit aisan kan piua ra iwisa. Baibil ra naku wisa: “Tnata yua nani ra piua karna nani balbia” (2 Timoti 3:1). Naha piua nani ra kau kaikbia, war aiklabanka, tasba sauhkanka, plun sanglang, bara siknis nani. Baha nani tâwan upla nani ba ai pliska swi si, plis wala nani ra plapisa (Luk 21:10, 11).

 ¿Ai pliska wina plapaia kan uplika nani ba bîla kaikanka brisa ki?

 Baibil ba wan marikisa, wan Papaskra, Jehova b Gâd ba ai pliska swi si plis wala ra plapaia kan uplika nani ra latwan kaikisa, bara sin umpira kaikisa (Kli Smalkanka 10:18). Witin pramis munisa, upla gabamintka nani âpu daukbia, bara Heven ra ai Kingka lâka, Gâd Kingka lâka nina mâki ba yus muni, naha trabilka nani wapnika mangkbia (Daniel 2:44; Matiu 6:10). Jehova ai Kingka lâka yus muni, Sitan Dibil ba sin âpu daukbia (Roman 16:20). Baha Kingka lâka ba tasba aiska tâ bribia, bara nisan nani baiki sakan ba tâwan tar baiwan lâka taki ba sin, âpu daukbia. Tasba aiska ra upla sut ba asla pamali kumi kabia. Upla kumi sin ai watla swi si plapaia nit apia kabia, kan Baibil ba naku pramis munisa: “Upla nani sut ai wainka nasla nani ra, kwah damni dusa nani distika ra sin, ban ai kupia kumi iwi kabia, sibrin sin daukbia apia. ¡Dawan karnika nani sut bri ba ai bîla aisin ba kat kabia!” (Miqueas 4:4).

 Nawas upla nani ai watla swi si plis wala ra plapaia trabilka bri ba, Gâd Kingka lâka mita baman sip sa ban kaia ra wapnika mangkaia. Jehova Gâd ai Kingka lâka yus muni, baha pâtka nani buki trabilka nani ba sut âpu daukbia. Naha nani dukiara luki kaiks:

•   War aiklabanka. “Witin [Jehova] war nani âpu daukan tasba aiska ra” (Lawana Nani 46:9). Nahki Gâd bui war nani âpu daukbia nu takaia dukiara, “¿Cómo llegará a haber paz en la Tierra?” ulbanka ba aisi kaiks.

•   Taiban lâka bara rau munan lâka. “Taibi, saura muni nani ba mihta wina [Jehova mita] swaki sakan kabia” (Lawana Nani 72:14). Nahki upla nani ai daukanka saura bri ba chens takaia sip sa sapa nu takaia want sma kaka, “Cómo romper el ciclo del odio” ulbanka nani ba aisi kaiks.

•   Umpira lâka. “Witin [Jehova] bui swaki sâkbia baha umpira nani makabi ba” (Lawana Nani 72:12). Nahki Gâd bui umpira lâka wapnika mangkbia ba nu takaia dukiara, “¿Es realista esperar un sistema económico justo?” ulbanka ba aisi kaiks.

•   Plun sanglangka nani. “Plawar mâ ailal bâra kabia” (Lawana Nani 72:16). Upla kumi sin plun sanglang wahbia apia dukiara Gâd dîa daukbia ba nu takaia want sma kaka, “¿Un mundo sin hambre?” ulbanka ba aisi kaiks.

 ¿Baibil ba ai pliska wina plapaia kan uplika nani ra hilp munaia sip sa ki?

 Âu sika. Ai pliska swi si plis wala ra plapaia kan uplika nani ra bîla kaikanka aihwa kum yabisa, bara baha purkara, nawas dîa trabil nani bri ba pura luaia dukiara sin, Baibil ba hilpka yabaia sip sa.

 Baibil smalkanka: “Man nani diara kumi dukiara sin sari takpara, sakuna dîa dîa luha sma ba sut, Gâd ra puram sunra nani ra wis, makabi bas bara tingki sin wis. Bara Gâd ai kupia kumi lâka bara upla tânka briaia praiska sut pura lui ba, witin maikbia; bara naha kupia kumi lâka na, man kupiam nani lukanka nani sin main kaiki kabia” (Pilipai 4:6,7).

 Tânka ba: Dîa mai takbia kra sin, Gâd ra kupia kumi lâka bara âuyapah lâka makas. “Filipenses 4:6, 7 | ‘No se inquieten por nada’” ulbanka ba aisi kaiks.