Yʋʋmd 2022 wao-fugdg kiuugã rasem 24 daare, Risi tɩ sɩnga zabr ne Ikrɛn. Rẽ kɩtame tɩ neb milyõ-rãmb vɩɩm da be yell pʋgẽ, tɩ b zoe tao-tao n na n yi tẽngã. a

 “B ra lobda bom-dãmb tɩ pusdẽ. Ra kẽesda rabeem wʋsgo, hal tɩ f pa tõe n bãng n bilg ye. Tõnd sẽn bãng tɩ tẽrẽ-rãmb n be n talld nebã n yit tẽngã, d yãka yam n tɩ kẽ. D ra segd n basa d sẽn tarã fãa n looge. D sẽn tõog n zã bal yaa sɛba, tɩto, koom, la bũmb bilf sẽn na n ning noorẽ. D sɩd basa d sẽn da tarã fãa n zoet n teesd tẽrẽ wã yalsg zĩigẽ, tɩ bom-dãmbã ra tar pusb bala.”—A Nataliia sẽn yit Kaarkiiv, Ikrɛn.

 “Sã n pa d sẽn wa n yã zabrã sẽn sɩngã, d ra pa tẽed tɩ sɩd na n yɩɩ zabr ye. Mam da wʋmda bom-dãmb rãamd tẽngã zĩis kẽere, la rotã vɩta-rãmb sẽn wãada. M yãka yam n na n yi tẽngã. M dɩka bũmb nins sẽn yaa tɩlɛ ne-mã bala. M yii yir yibeoog wakat a 8, n tɩ kẽ tẽrẽ wã n kẽng Leviiv, n tɩ kẽ bis beenẽ n kẽng Poloyn.”—A Nadija sẽn yit Kaarkiiv, Ikrɛn.

Sõs-kãngã pʋgẽ, d na n paama sogs-kãensã leoore:

•  Bõe n kɩt tɩ nebã wa zoet n yit Ikrɛn tẽngã?

•  Yɛ la neb nins sẽn zoe n bas b tẽnsã tõe n paam belsgo?

•  Biiblã tõe n sõnga sẽn zoet-b n yit b tẽnsẽ wã bɩ?

 Bõe n kɩt tɩ nebã wa zoet n yit Ikrɛn tẽngã?

 Yaa Risi sodaasã sẽn kẽng n na n tɩ zab ne Ikrɛnnã n kɩt tɩ neb ka tɛk zoet n yit Ikrɛn. La Biiblã wilgda bʋʋm a to sẽn kɩt tɩ neb wʋsg zoet n yit b tẽngẽ wã. Wala makre:

•   Ninsaalbã goosneema-rãmbã pa tõog n sõng nebã dũniyã gill zug tɩ b paam b sẽn datã ye. Goosneema-rãmbã nong n tũnugda ne b naamã n weoogd nebã la b maand-b pãnga.—Koɛɛg soaba 4:1; 8:9.

•   A Sʋɩtãan sẽn yaa ‘dũniyã naabã’ tara pãng wʋsg ãdem-biisã zugu, hal tɩ Biiblã yetẽ tɩ “dũniyã tõr bee wẽng soabã nugẽ.”—Zã 14:30; 1 Zã 5:19.

•   Yɛl nins sẽn namsd ãdem-biisã yʋʋm wʋsgã sẽn yãk b toogo, d vɩɩ wakat Biiblã sẽn da pĩnd n gom a yelle. Biiblã pĩnd n togsame tɩ “yaoolem wakatã, yɛlã na n yɩɩ kãn-kãe hal tɩ vɩɩmã lebg toogo.” (2 Tɩmote 3:1) Sẽn paase, yaoolem wakatã sasa, zaba, sabab-wẽnse, kom la bã-longds na n zĩndame. Woto fãa yaa yɛl sẽn kɩtd tɩ nebã zoet n yit b tẽnsẽ wã.—Luk 21:10, 11.

 Yɛ la neb nins sẽn zoe n bas b tẽnsã tõe n paam belsgo?

 Biiblã wilgdame tɩ Wẽnnaam a Zeova b sẽn yaa d Naandã zoeta neb nins sẽn zoe n bas b tẽns la b zagsã nimbãanega, la t’a nong-b lame. (Tõodo 10:18) A pʋlmame t’a na n welga nin-kãensã zu-loeesã ne a saasẽ Rĩungã maasem. B boonda Rĩun-kãng tɩ Wẽnnaam Rĩungã. Rẽ n na n ledg ninsaalbã goosneema-rãmbã fãa. (Dãniyɛll 2:44; Matiye 6:10) A Zeova na n tũnuga ne a Rĩungã n menes a Sʋɩtãana. (Rom dãmbã 16:20) Wẽnnaam Rĩungã sã n wa soog dũniyã gilli, tods pa na n le beẽ n welg tẽnsã ne taab ye. Ãdem-biisã fãa na n yɩɩ wa zak a ye neb sẽn be dũniyã gill zugu. Ned baa a ye pa na n le zoe n bas a tẽng bɩ a zak ye. Bala Biiblã pʋgẽ, Wẽnnaam pʋlmame yaa: “Ned kam fãa na n zĩnda a reezẽ tɩɩg ne a kankang tẽngre, tɩ ned ka be n tõe n kẽes-b rabeem ye. Yaa Saasẽ-Pãng-Soabã meng noor n yeele.”—Mise 4:4.

 Wẽnnaam Rĩungã bal n tõe n sõng neb nins sẽn zoet n basd b tẽns rũndã-rũndã wã tɩ b paam yolsg hakɩɩka. Ne Rĩungã maasem, a Zeova na n kɩtame tɩ yɛl nins sẽn kɩtd tɩ nebã zoet n yit b tẽnsẽ wã sa. Wala makre:

•   Zabã. “[A Zeova] n kɩtd tɩ zabã sẽn be dũniyã tɛk fãa wã sɛ.” (Yɩɩn-sõamyã 46:10) Y sã n dat n bãng Wẽnnaam sẽn na n maan to-to tɩ zabã sa, bɩ y karem sõsg ning gom-zug sẽn yaa “La paix dans le monde : Comment sera-​t-​elle établie?”

•   Wẽgbã la nen-kɛglmã. “[A Zeova] na n fãag-b-la ne namsgo, la ne wẽnga.” (Yɩɩn-sõamyã 72:14) Y sã n dat n bãng ned sẽn tõe n maan to-to n bas a minim-wẽnse, bɩ y karem sõsg ning gom-zug sẽn yaa “Y sẽn tõe n maan n da le kisg y taabã.”

•   Naongã. “[A Zeova] na n fãaga nimbãan-ned sẽn kelemd n kot sõngre.” (Yɩɩn-sõamyã 72:12) Y sã n dat n bãng Wẽnnaam sẽn na n maan to-to tɩ yɛl nins sẽn wat ne naongã sa, bɩ y karem sõsg ning gom-zug sẽn yaa “Peut-on espérer un système économique plus juste?”

•   Rɩɩb kaalem. “Tẽngã na n pida ne bɩle wʋsgo.” (Yɩɩn-sõamyã 72:16) Y sã n dat n bãng Wẽnnaam sẽn na n maan to-to tɩ kom da le zĩndi, bɩ y karem sõsg ning gom-zug sẽn yaa “Plus jamais la faim dans le monde?”

 Biiblã tõe n sõnga sẽn zoet-b n yit b tẽnsẽ wã bɩ?

 N-ye. Biiblã tõe n sõnga neb nins sẽn zoe n yi b tẽnsẽ wã tɩ b bãng tɩ manegr n wate. La pa rẽ bal ye. A leb n tõe n sõng-b lame tɩ b tõog n mao ne b zu-loeesã masã menga.

 Biiblã yetame: “Da maan-y yɩɩr baa fʋɩ poorẽ ye. La bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã, tɩ rẽ la Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ yãmb sũyã la y tagsa wã, Kirist Zeezi maasem yĩnga.”—Filip rãmbã 4:6, 7.

 Y sẽn tõe n maane: Sẽn wa n yaa zu-loɛɛg ning fãa, bɩ y kos Wẽnnaam t’a kõ-y sũur pʋgẽ bãane. Karm-y sõsg ning gom-zug sẽn yaa “Philippiens 4:6, 7 : ‘Ne vous inquiétez de rien.’”