Ekiro 24, Omwisi 2, 2022, Oburusi mubwatsuka eribambira ekihugho kye Ukraine, n’ekyo mukyalekire abandu bangyi ibabya basayi bakatibita amalwa. a

 “Esyobombe esikalakalire musyahuta. Sinangabana ebinywa ebikakanganaya ndeke-ndeke ngoko abya mwatsi owakita buba bunene. Twabere towa ambu hane emitoka eyinemuheka abandu abanzire eritibika amalwa, mutwayisogha erighenda muyo. Mutwasigha ebyosi kundi obuli mundu abya ahamulirwe erisamba omo mutoka n’akasakose kake kaghuma kasa. Ebyo twaheka bisa w’amadokima, amaghetse, edawa n’ehiri nga hibisikwiti ehy’erirya. Mutwasigha ebyosi, twamaya eyo emitoka yinatulindirire, esyobombe isinemuhuta.”​—Nataliia, owe Kharkiv, Ukraine.

 “Twabya isitulengekenie tuti hakendibya amalwa. Munowa esyobombe sikahuta omo bindi biharo by’omuyi, n’amadirisa wetu inyanemutitimana. Munayisogha eritibita, munaheka ebyo nilaghireko bisa. Munalw’eka oko 8:00 omo tututu n’erisambira omo mutoka owakaya eLviv, neryo n’abere n’ahika eLviv, n’amimya oghundi mutoka amanitwala ePologne.”​—Nadija, owe Kharkiv, Ukraine.

Ebyo tukendikaniako omo mwatsi ono

•  Ekikaleka abandu ibabya basayi niki?

•  Abasayi bangabana amaha gho hayi?

•  EBiblia yanganawatikya abasayi bo munabwire?

 Ekikaleka abandu ibabya basayi niki?

 Abandu b’omo kihugho kye Ukraine mubatibitire, bamabya basayi kundi abasuda b’Oburusi mubingirire kinya-maka omo Ukraine. Aliwe, eBiblia ikakanganaya eyindi myatsi mikulu-mikulu eyikaleka abandu ibatibita n’eribya basayi:

•   Amatabali w’abandu w’omo kihugho kyosi abiritaluka eriha abandu ebyo balaghireko. Amatabali abere akakolesya ehamuli yagho erisosotya abandu n’eryaghalyabo.​—Omugambuli 4:1; 8:9.

•   Sitani Diabolo, “Omutabali wʼekihugo,” anemukuna abandu erikola emyatsi eyituwene. Ekyo kyo kikaleka eBiblia iyabugha yiti: “Ekihugo kyosi kiri omo butoki bwʼOmubi Oyu.”​—Yoane 14:30; 1 Yoane 5:19.

•   Eritomeka oko maligho agho abandu bakalabamo eritsuka kera, lino tuli omo biro ebyo eBiblia yahula embere yiti: “Oko biro byʼenyuma-nyuma [biro by’enduli] hasyabya emigulu ikalire.” (2 Timoteo 3:1) Muyatomekako yiti ebiro ebyo byasyabyamo amalwa, ebitsinduli, akalyo eribula, n’ebihunzo—emyatsi eyikaleka abandu ibahuma n’eribya basayi.​—Luka 21:10, 11.

 Abasayi bangabana amaha gho hayi?

 EBiblia ikabugha yiti Omuhangyiki wetu ye Yehova, b ni Mungu oyuwite olwanzo n’oyutsomene abasayi abakalua omo bihugho byabo n’eritibita. (Eryibuka Ebihano 10:18) Akalagha ati asyabughaho amaligho agho abasayi bakalabamo. Akalagha erisyakola ekyo erilabira obutabali bwiwe obuli elubula, obukahulawamo Bwami b’oMungu, obukendisyalusyaho amatabali w’abandu. (Danieli 2:44; Matayo 6:10) Yehova akendisyakolesya Obwami bwiwe eritoghotya Sitani Diabolo. (Abanya Roma 16:20) Obwami obo bwasyatabala ekihugho kyosi, n’eribughaho erighabana erikaletawa n’abandu abakahira emitano y’oko bihugho byabo. Abandu b’omo kihugho kyosi basyabya kihanda kighuma. Sihendisyasyabya oyukatibita enyumba yiwe n’eribya musayi kundi eBiblia ikabugha yiti: “Obuli mundu asyikala oko ndina yʼomuliki wuwe wʼebinyu nʼomo ndina yʼomutini wuwe; kandi sihali oyo wasyubahyabo; kusangwa obuno bwa Yehova Wʼemilondo bwabiribugakyo.”—Mika 4:4.

 Obwami b’oMungu busa bo bwasyabughaho amaligho wa munabwire ow’abandu eribya basayi. Yehova akendisyakolesya Obwami bwiwe eribughaho ebitsibu byosi ebikaleka abandu ibatibita n’eribya basayi. Obwami b’oMungu bwasyabughaho emyatsi ng’eno:

•   Amalwa. “[Yehova] akakubaya amalwa omo kihugo kyosi.” (Esyonyimbo 46:9) Wamanza eriminya oMungu ng’akendisyabughaho ati amalwa, usome omwatsi “Obuholo bwasyasa buti omo kihugho”

•   Eryaghalibwa. “[Yehova] akalamayabo okwʼinubya nʼobwaga.” (Esyonyimbo 72:14) Wamanza erilangira ngoko abandu ababiriyikoberya omo bibi banganabindula emibere yabo eyituwene, usome omwatsi “Eriponangana lyanganahwaho.”

•   Obwera. “[Yehova] asyalamya abera abakamulakira.” (Esyonyimbo 72:12) Wamanza eriminya ngoko oMungu akendisyabughaho ebikaletera obwera, usome omwatsi “Eribulirwa esyofranga linemwendisyahwa?”

•   Eribula akalyo. “Engano ibyeho nene omo kihugo.” (Esyonyimbo 72:16) Eriminya ngoko oMungu asyabughaho enzala, usome omwatsi “Enzala yanganasyahwa oko kihugho?”

 EBiblia yanganawatikya abasayi bo munabwire?

 Ingaa. EBiblia ikaha abasayi b’amaha w’ebiro ebikasa kandi yanganabawatikya erikinda amaligho agho bakalabamo lino.

 Omulondo w’eBiblia: “Simuhanga-hangaye emitima yenyu, nikwa omo buli mwatsi mubwire oMungu obwaga bwenyu, imukamusaba nʼerimuhatikana, imunemuha ewasingya. Nʼobuholo b’oMungu, Obulabire amenge gosi, bwasyateya emitima yenyu nʼamaganirya wenyu omwisi wa Kristo Yesu.”​—Abanya Filipi 4:6, 7.

 Ngoko wangakolesyagho: Usabe oMungu akuhe obutekane nomo wangayeya omo mibere yahi. Langira omwatsi “Abanya Filipi 4:6, 7—‘Simuhanga-hangaye emitima yenyu.’”