Lo February 24, 2022, army blo Russia start for attakim Ukraine. Diswan mekem staka million pipol stap lo danger and olketa trae for kwiktaem ranawe from datfala kantri. a

 “Mifala herem olketa bomb bosta. Mifala barava fraet and hem hard for explainim feeling blo mifala. Taem mifala faendaot samfala train bae tekem pipol go aot from kantri, mifala disaed for go. Mifala mas lusim evri samting bikos each man savve holem wanfala smol basket nomoa. Mifala savve tekem nomoa olketa important pepa, samfala medicine, and lelebet kaikai. Evri nara samting mifala leavim nomoa, and go lo train station taem olketa bomb gohed foldaon and bosta.”—Nataliia, from Kharkiv, Ukraine.

 “Mifala barava tingse no eni war bae happen, bat then olketa soldia start for attak. Mi herem olketa bomb bosta lo samfala ples lo taon, and olketa window start for seksek. Mi disaed for go, and for tekem nomoa wanem mi barava needim. Mi lusim haos lo 8:00 lo morning and mi go lo wanfala train for kasem Lviv, then mi go lo wanfala bas for kasem Poland.”—Nadija, from Kharkiv, Ukraine.

Insaed disfala article

•  Wat nao really reason why disfala refugee problem kamap?

•  Wanem hope nao olketa refugee savve garem?

•  Waswe, Bible savve helpem olketa refugee?

 Wat nao really reason why disfala refugee problem kamap?

 Olketa refugee mas ranawe from Ukraine bikos army blo Russia attakim kantri. Bat Bible storyim olketa nara reason why olketa refugee problem olsem diswan happen distaem:

•   Lo evri kantri lo world, olketa gavman blo man no savve provaedem wanem pipol needim. Staka taem, olketa wea rul iusim paoa blo olketa for kontrolem pipol and treatim olketa nogud.—Ekelsiastes 4:1; 8:9.

•   Satan, datfala “man wea rulim disfala world,” iusim paoa blo hem for barava spoelem pipol evriwea lo world, dastawe Bible sei: “Full world hem stap long paoa bilong Satan.”—John 14:30; 1 John 5:19.

•   Pipol lo world kasem olketa problem for staka handred year finis. Bat distaem olketa problem kamap worse, bikos iumi stap lo taem wea Bible talem disfala profesi abaotem: “Long olketa last day bae hem barava difren and bae evri samting hem hard tumas.” (2 Timothy 3:1) And tu, Bible sei lo olketa last day bae iumi lukim olketa war, olketa natural disaster, pipol bae short lo kaikai, and olketa bigfala sik bae kamap. Olketa problem hia forcem staka pipol for ranawe from hom blo olketa.—Luke 21:10, 11.

 Wanem hope nao olketa refugee savve garem?

 Bible hem sei, Creator blo iumi, Jehovah, b hem God wea garem love and tingim olketa refugee and pipol wea displace. (Diutronomi 10:18) Hem promis for iusim gavman blo hem lo heven, wea Bible kolem Kingdom blo God, for stretem olketa problem wea mekem pipol for kamap refugee. Datfala Kingdom bae finisim and changem evri gavman blo man. (Daniel 2:44; Matthew 6:10) Jehovah bae iusim Kingdom blo hem for finisim Satan, wea nara nem blo hem Devil. (Rome 16:20) Datfala Kingdom bae rulim full earth, wea minim wei wea pipol divaed followim olketa difren kantri bae finis tu. Evriwan lo earth bae olsem wanfala famili, wea wan mind. Taem Kingdom rul, no eniwan bae need for ranawe from hom blo hem, bikos Bible promis olsem: “Evri pipol bae i stap gudfala, an garem piis olowe. Bae olketa save stap gudfala long olketa plantesin blong olketa long grep, an olketa save sidaon andanit long olketa fig tri blong olketa. An bae no eniwan save mekem olketa fo fraet moa. Hem nao toktok blong [Jehovah] hu hemi garem evri paoa.”—Maeka 4:4.

 Kingdom blo God nomoa fit for stretem olketa nogud samting wea mekem staka pipol for refugee distaem. Jehovah bae iusim Kingdom blo hem for stretem evri problem wea forcem pipol distaem for kamap refugee. Diswan nao samfala example blo olketa problem wea Kingdom bae stretem:

•   War. “[Jehovah] hemi finisim olketa faet long evriples long wol.” (Sams 46:9) For faendaot hao God bae finisim olketa war, readim lo English disfala article “Peace on Earth—How Will It Come?”.

•   Olketa samting wea spoelem pipol and mekem olketa safa. “[Jehovah] save stopem olketa hu i mekem olketa safa, an hemi stopem olketa hu i spoelem olketa ya.” (Sams 72:14) For faendaot hao pipol savve changem nogud wei blo olketa, nomata olketa garem for longfala taem, readim olketa article wea garem title “Lusim Wei for Heit.”

•   Pipol poor. “[Jehovah] hemi gohed fo sevem olketa pipol hu i no garem enisamting, wea i kol go long hem.” (Sams 72:12) For faendaot hao God bae stretem olketa problem wea mekem pipol for poor, readim lo English disfala article “Is a Fair Economic System Possible?”

•   Pipol short lo kaikai. “Letem lan blong mifala hemi garem plande kaikai long hem.” (Sams 72:16) For faendaot hao God bae mek sure no eniwan bae hangere, readim lo English disfala article “A World Without Hunger?”

 Waswe, Bible savve helpem olketa refugee?

 Yes. Lo Bible olketa refugee savve lane abaotem hope for future wea olketa savve trustim. And tu, Bible savve helpem olketa for deal witim olketa problem wea olketa feisim distaem.

 Bible principle: “Iufala mas no wari abaotem eni samting bat long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu. Taem iufala duim olsem, peace bilong God wea winim nao wanem man savve minim bae gaedem heart and tingting bilong iufala.”—Philippi 4:6, 7.

 Mining: Nomata wanem nao kasem iu, askem God for helpem iu garem peace lo mind and lo heart. Lukim article lo English wea garem title “Philippians 4:6, 7—‘Do Not Be Anxious About Anything.’”