24 فروری 2022 نُوں روس دی فوج نے یوکرین تے حملہ کر دِتا۔ جدی وجہ توں یوکرین دے لکھاں لوکاں دِیاں جاناں خطرے چ پے گئیاں تے اوہناں فوراً اپنا شہر یاں ملک چھڈ کے بھجنا پیا۔‏ a

 یوکرین دے شہر خاکیوو توں نٹالیا نے دَسیا:‏ ”‏ہر پاسے بمب دھماکے ہو رہے سن۔ میں توانوں دَس وی نئیں سکدی کہ مینوں کِنّاں ڈر لگ رہیا سی۔ جدوں سانوں پتہ لگیا کہ لوکاں نُوں ٹریناں دے ذریعے دُوجے علاقیاں چ لجان دا بندوبست کیتا گیا اے تے اَسی وی جان دا فیصلہ کیتا۔ سانوں اپنا سارا کجھ چھڈنا پیا کیونکہ ہر بندہ اپنے نال صرف اِک چھوٹا بیگ ای کھڑ سکدا سی۔ اَسی صرف ضروری کاغذ، دوائیاں، پانی تے کجھ کھان دِیاں شیواں لجا سکے۔ جدوں اَسی ٹرین سٹیشن وَل جا رہے ساں ساڈے آلے دوالے بمب دھماکے ہو رہے سن۔“‏

 یوکرین دے شہر خاکیوو توں نادیہ نے دَسیا:‏ ”‏آخری دن تک سانوں لگ رہیا سی کہ جنگ نئیں ہوئے گی۔ پر فیر شہر دے کجھ علاقیاں چ بمب دھماکے ہون لگ پئے۔ ایہدی وجہ توں میرے گھر دِیاں کھڑکیاں زور نال کھڑکن لگ پئیاں۔ اوسے وقت میں ملک چھڈن دا فیصلہ کر لیا۔ اگلے دن سویرے 8 وجے میں اپنا ضروری سامان لیا تے شہر لویو جان لئی ٹرین چ بیٹھ گئی۔ تے فیر ملک پولینڈ جان لئی میں اوتھوں بس لئی۔“‏

ایس مضمون چ اَسی ویکھاں گے:‏

•  اصل چ کیہڑیاں گلاں دی وجہ توں لوک پناہ لین تے مجبور ہو جاندے نیں؟‏

•  پناہ لین تے مجبور لوکاں نُوں امید کتھوں مِل سکدی اے؟‏

•  کیہہ پاک کلام پناہ لین تے مجبور لوکاں دی مدد کر سکدا اے؟‏

 اصل چ کیہڑیاں گلاں دی وجہ توں لوک پناہ لین تے مجبور ہو جاندے نیں؟‏

 یوکرین دے لوکاں نُوں ایس لئی بھجنا پے رہیا اے کیونکہ روس نے اوہناں دے ملک تے حملہ کیتا اے۔ پر بائبل چ دَسیا گیا اے کہ اصل چ ہور کیہڑیاں گلاں دی وجہ توں لوکاں نُوں پناہ لین لئی بھجنا پیندا اے۔‏

•   دُنیا بھر چ حکومتاں لوکاں دِیاں ضرورتاں نُوں پورا کرن چ ناکام ثابت ہوئیاں نیں۔ اِختیار رکھن والے لوک اکثر اپنے اِختیار دا ناجائز فائدہ چُکدے نیں تے دُوجیاں تے ظلم ڈھاندے نیں۔—‏واعظ 4:‏1؛‏ 8:‏9‏۔‏

•   شیطان ایس دُنیا دا حاکم اے تے اوہ لوکاں نُوں بُرے کم کرن لئی اُکساندا اے۔ بائبل چ دَسیا گیا اے کہ ساری دُنیا شیطان دے قبضے چ اے۔—‏یوحنا 14:‏30؛‏ 1-‏یوحنا 5:‏19‏۔‏

•   بھانویں کہ لوک صدیاں توں مشکلاں سہہ رہے نیں پر اَسی جیہڑے زمانے چ رہ رہے آں اوہدے بارے بائبل چ پہلاں توں ای ایہہ دَسیا گیا سی:‏ آخری زمانے چ مشکل وقت آئے گا۔ (‏2-‏تیمُتھیُس 3:‏1‏)‏ نالے پاک کلام چ لکھیا اے کہ ایس آخری زمانے چ جنگاں ہون گیاں، قدرتی آفتاں آن گیاں، کال پین گے تے وباواں پھیلن گیاں۔ (‏لُوقا 21:‏10، 11‏)‏ ایہناں مصیبتاں دی وجہ توں لوکاں نُوں اپنا گھر بار چھڈ کے بھجنا پیندا اے۔‏

 پناہ لین تے مجبور لوکاں نُوں امید کتھوں مِل سکدی اے؟‏

 پاک کلام چ دَسیا گیا اے کہ ساڈا خالق یہوواہ b خدا اوہناں لوکاں نُوں پیار کردا اے تے اوہناں تے ترس کھاندا اے جنہاں نُوں اپنا گھر بار چھڈ کے بھجنا پیا اے۔ (‏اِستثنا 10:‏18‏)‏ خدا نے وعدہ کیتا اے کہ اوہ اپنی بادشاہی دے ذریعے ایہناں لوکاں دِیاں ساریاں مشکلاں ختم کر دَوے گا۔ اوہدی بادشاہی انساناں دِیاں ساریاں حکومتاں نُوں ہٹا کے اسمان توں زمین تے حکمرانی کرے گی۔ (‏دانی‌ایل 2:‏44؛‏ متی 6:‏10‏)‏ خدا دی بادشاہی شیطان نُوں وی ختم کر دَوے گی۔ (‏رومیوں 16:‏20‏)‏ ایہہ بادشاہی پوری دُنیا تے حکمرانی کرے گی تے جنگاں تے سرحداں نُوں مٹا دَوے گی تاکہ سارے انسان اِک خاندان وانگوں پیار تے صلح نال رہن۔ فیر کدی وی کسے نُوں اپنا گھر چھڈ کے بھجنا نئیں پووے گا۔ کیونکہ پاک کلام چ وعدہ کیتا گیا اے کہ ہر اِک اپنی انگوراں دی ویل تے اپنے اِنجیر دے درخت تھلے بوَوے گا تے اوہناں نُوں کوئی نہ ڈرائے گا۔ کیونکہ فوجاں دے رب یہوواہ نے اپنے موُنہوں ایہہ کہیا اے۔—‏میکاہ 4:‏4‏۔‏

 صرف یہوواہ خدا ای اپنی بادشاہی دے ذریعے اوہناں سارے مسئلیاں نُوں حل کر سکدا اے جنہاں دی وجہ توں لوک پناہ لین تے مجبور ہو جاندے نیں۔ ذرا غور کرو کہ یہوواہ خدا نے ایہناں مصیبتاں نُوں ختم کرن لئی کیہڑے وعدے کیتے نیں:‏

•   جنگ۔‏ اوہ ساری زمین توں جنگاں نُوں ختم کر دیندا اے۔ (‏زبور 46:‏9‏)‏ ایہہ جانن لئی کہ خدا لڑائیاں نُوں کیویں ختم کرے گا ایہہ مضمون پڑھو:‏ ”‏زمین تے امن تے سلامتی کیویں قائم ہووے گی؟‏‏“‏

•   ظلم تے تشدد۔‏ یہوواہ اوہناں نُوں ظلم تے تشدد توں چھڈائے گا۔ (‏زبور 72:‏14‏)‏ ایہہ جانن لئی کہ لوک اپنے دل چوں تعصب کڈھنا کیویں سکھ رہے نیں ایہہ ویڈیو ویکھو:‏ ”‏کیہہ محبت نفرت توں جت سکدی اے؟‏‏“‏

•   غریبی۔‏ اوہ مدد لئی فریاد کرن والے غریب لوکاں نُوں بچائے گا۔ (‏زبور 72:‏12‏)‏ ایہہ جانن لئی کہ خدا غریبی نُوں کیویں ختم کرے گا اُردو زبان چ ایہہ مضمون پڑھو:‏ ”‏کیا دُنیا سے غربت ختم ہو سکتی اے؟‏‏“‏

•   کھانے دی کمی۔‏ زمین اُتے پہاڑاں دِیاں چوٹیاں تے بوہت زیادہ اناج اُوگے گا۔ (‏زبور 72:‏16‏)‏ ایہہ جانن لئی کہ خدا سارے انساناں دِیاں ضرورتاں نُوں کیویں پورا کرے گا اُردو زبان چ ایہہ مضمون پڑھو:‏ ”‏نئی دُنیا قریب ہے۔‏‏“‏

 کیہہ پاک کلام پناہ لین تے مجبور لوکاں دی مدد کر سکدا اے؟‏

 جی بالکل۔ ایہناں لوکاں نُوں اِک شان‌دار مستقبل دی امید دین دے نال نال پاک کلام چ دِتے اصول اَج وی ایہناں دی مدد کر سکدے نیں۔‏

 پاک کلام دا اصول:‏ کسے گلوں پریشان نہ ہووو سگوں ہر معاملے وچ شکرگزاری نال دُعا تے فریاد کرو تے اپنیاں ساریاں درخاستاں خدا دے حضور پیش کرو۔ فیر خدا توانوں اوہ اطمینان دَوے گا جیہڑا سمجھ توں باہر اے تے ایہہ اطمینان مسیح یسوع دے ذریعے تواڈے دل تے سوچ نُوں محفوظ رکھے گا۔—‏ فِلپّیوں 4:‏6، 7‏۔‏

 مطلب:‏ حالات بھانویں جیہو جہے وی ہون خدا کولوں دلی سکون منگو۔‏