Pa ri 24 re febrero 2022, ri rajchʼojabʼ Rusia xekibʼana kʼax pa Ucrania. Wariʼ xuya jun nimalaj kʼax chke ri winaq y e kʼi xeʼanimaj lo rumal ri chʼoj. a

 «Are chiʼ xwil ri bombas che xqaj loq y xubʼan kʼax chke ri winaq. Xinnaʼ jun nimalaj xibʼin ibʼ che kinkun taj kinbʼij rukʼ tzij. Are chiʼ xqilo che xetaq bʼi ri winaq pa jun tren, xojteriʼ bʼi chkij. Chqajujunal xaq xiw xojkunik xqakʼam bʼi jun alaj mochila jawiʼ qanimom wi bʼi xaq xiw ri rajawaxik. Xaq xiw xojkunik xqakʼam bʼi ri wuj che nim ubʼanik, kunabʼal, joron y jastaq che ktijowik. Are chiʼ tajin kkʼaq lo ri bomba, xqaya kan ronojel y aninaq xojbʼe wi jawiʼ kʼo wi ri tren» (Natalia, de Járkov, Ucrania).

 «Xinchomaj taj che kbʼan ri chʼoj, xintaʼ are chiʼ xkʼaq bʼi bombas pa jujun taq lugares y kuslabʼej ri ventanas. Xinchomaj kinel bʼik y xaq xiw kinkʼam bʼi ri kajwataj chwe. A las ocho aqʼabʼil xinel bʼik y xinbʼe pa jun tren che kbʼe pa Lviv, tekʼuriʼ xinbʼe pa jun autobús che kbʼe pa Polonia» (Nadia, de Járkov).

Pa wajun kʼutunem riʼ kqil wariʼ:

•  ¿Jas ri qas rumal che kkiriq kʼax ri e winaq che keʼel bʼi pa ri kitinamit?

•  ¿Jawchiʼ kkiriq wi kubʼsal kikʼuʼx?

•  ¿La kkun ri Biblia che kitoʼik chanim riʼ?

 ¿Jas ri qas rumal che kkiriq kʼax ri e winaq che keʼel bʼi pa ri kitinamit?

 Paneʼ ri kʼax riʼ che tajin kbʼan pa Ucrania xkʼulmatajik rumal che ri Rusia xbʼe che ubʼanik kʼax chke, are kʼu ri Biblia kuya ubʼixik jasche tajin kkʼulmataj wariʼ.

•   Ri e qʼatal taq tzij e kuninaq ta che uyaʼik ri kajwataj chke ri e winaq. Xaneʼ are kkikoj kichuqʼabʼ che ubʼanik kʼax chke (Eclesiastés 4:1; 8:9).

•   Ri Itzel Satanás, are «ri unimal we uwach ulew riʼ», ri ktaqan pa kiwiʼ ri winaq, rumal laʼ ri Biblia kubʼij: «Ronojel kʼu ri uwach ulew kʼo pa uqʼabʼ ri Itzel» (Juan 14:30; 1 Juan 5:19).

•   Paneʼ ojer umajim lo ri kʼax, are kʼu ri tajin kkʼulmataj kimik are ri uyaʼom kan ubʼixik ri Biblia. Pa 2 Timoteo 3:1 kubʼij: «Pa ri kʼisbʼal taq qʼijol, kepe na kʼaxalaj taq qʼij». Ri chʼoj, ri desastres naturales, ri wiʼjal, ri yabʼil are ri kkʼutuwik che qastzij oj kʼo chi pa ri kʼisbʼal taq qʼij. Y xuqujeʼ are ri kbʼanowik che ri e winaq kkiya kan ri kachoch y kebʼe chi pa jun tinamit (Lucas 21:10, 11).

 ¿Jawchiʼ kkiriq wi kubʼsal kikʼuʼx?

 Ri Biblia kukʼutu che ri Bʼanol qe, Jehová, b are jun Dios che kel ukʼuʼx chke ri winaq che kkiya kan ri kachoch y kebʼe chi pa jun lugar (Deuteronomio 10:18). Ri areʼ kutzujuj che kusukʼumaj na ri kʼax che kkiriq ri winaq che e opanaq pa jun chi tinamit. ¿Jas kubʼan che ubʼanik? Are kukoj ri uQʼatbʼal tzij che kʼo pa ri kaj, rech kusachisaj kiwach ri e qʼatal taq tzij pa ri uwach Ulew (Daniel 2:44; Mateo 6:10). Xuqujeʼ kukoj ri uQʼatbʼal tzij che usachisaxik uwach ri Itzel, Satanás (Romanos 16:20). Wajun Qʼatbʼal tzij riʼ kubʼan jun chke konojel ri tinamit. Konojel ri winaq keʼux xa jun familia. Kʼo ta chi jun rajawaxik kel bʼi cho ri rachoch, rumal che ri Biblia kutzujuj: «Konojel kʼut kejeqiʼ na man kʼo ta chi jachin kexibʼinik, chkijujunal kekun na keʼuxlan chuxeʼ ri umuʼjal ri uʼuva xuqujeʼ chuxeʼ ri ucheʼal ri uhigo. ¡Qas utzij waʼ ri Ajawaxel ri kʼo ronojel ukunem!» (Miqueas 4:4).

 Xaq xiw ri uQʼatbʼal tzij ri Dios kutzujuj che kusukʼumaj na ri kʼax che kkiriq ri winaq che keʼel bʼi pa ri kitinamit y keʼopan pa jun chik. Chqilampeʼ jujun kʼutbʼal:

•   Chʼoj. Ri Jehová kukʼis na «kitzaʼm ri chʼoj» (Salmo 46:9). Rech kawetaʼmaj jas kubʼan ri Dios che resaxik ri chʼoj, chasikʼij ri kʼutunem ubʼiʼ «¿Cómo llegará a haber paz en la Tierra?».

•   Itzelal y kʼaxkʼolil. Ri Jehová «keresaj pa ri latzʼ xuqujeʼ pa ri riqoj kʼax» (Salmo 72:14). Rech kachʼobʼo jas ketoʼw ri winaq rech kkesaj ri itzelal che kʼo pa kanimaʼ, chasikʼij ri e kʼutunem che keriqitaj pa ri wuj ubʼiʼ «Rompamos el ciclo del odio».

•   Mebʼayil. Ri Jehová «are kʼu kyoʼw na ri tobʼanik che ri mebʼaʼ ri ktzʼononik» (Salmo 72:12). Rech kawetaʼmaj jas kubʼan ri Dios che resaxik ri mebʼayil, chasikʼij ri kʼutunem ubʼiʼ «¿Es realista esperar un sistema económico justo?».

•   Wiʼjal. «¡Mat chkʼis ri triko pa ri ulew[!]» (Salmo 72:16). Rech kawetaʼmaj jas kubʼan ri Dios che resaxik ri wiʼjal, chasikʼij ri kʼutunem «¿Un mundo sin hambre?».

 ¿La kkun ri Biblia che kitoʼik chanim riʼ?

 Kkunik. Ri Biblia xaq xiw ta kuya kubʼsal kʼuʼx chke ri e winaq riʼ, xaneʼ xuqujeʼ kuya pixabʼ chke rech kketaʼmaj jas kkibʼan chuwach ri kʼax che kkiriq kimik.

 Ri kubʼij ri Biblia: «Kʼo jun jasach mixok wi il, xaneʼ chiyaʼ ronojel chuwach ri Dios pa chʼawem rukʼ Dios; chixtzʼonom che, chiyaʼ kʼu maltyoxinik che xuqujeʼ. Are kʼu ri ujamaril ri Dios, ri nim na chuwach ronojel noʼj, kchajin na ri iwanimaʼ xuqujeʼ ri ichʼobʼobʼal» (Filipenses 4:6, 7).

 Ri kraj kubʼij: Apastaneʼ ri kʼax che tajin kiriqo, chitaʼ che ri Dios che kuya jamaril pa iwanimaʼ. Chiwilaʼ ri kʼutunem «Filipenses 4:6, 7 | ‹No se inquieten por nada›».