2022 febrero 24 punchawpim Rusiamanta tropakuna Ucrania nacionman yaykururqaku. Chayraykum Ucraniamanta achka runakuna lluptikuchkanku. a

 Ucrania nacionniyuq Nataliam nin: “Bombakuna kaypi-chaypi tuqyaptinmi llumpayta mancharikurqani. Yacharurqanikum ayqikunankupaq runakunata trempi apasqankuta. Chaymi tukuy imaykuta saqispayku mochilaykupi documentoykuta, yakuta, hampita hinaspa ima mikuychatapas aparikuspa bombakuna tuqyachkaptin trenpa sayanan lawman pasarqaniku”, nispa.

 Ucrania nacionniyuq Nadiapas ninmi: “Manam piensarqanikuchu guerra karunantaqa. Wasiymanta karuniqchapiraq bombakuna tuqyayta qallaykuptinmi ventanakunapas katkatatarqa. Chaymi mochilaypi necesitasqay kaqkunata aparikuspay chaylla pasakurqani. Tempranom huk llaqtaman pasarqani trenwan, hinaspa Polonia nacionmanqa carrowanña chayarqani”, nispa.

Kay yachachikuypim kaykunamanta yachasun:

•  ¿Imakunaraykutaq runakunaqa llaqtankumanta lluptikunku?

•  Llaqtankumanta lluptikuq runakunata, ¿imataq sunqunkuta tiyaykachinman?

•  ¿Llaqtankumanta lluptikuq runakunapa sunqunkuta tiyaykachinmanchu bibliapi yachachikuykuna?

 ¿Imakunaraykutaq runakunaqa llaqtankumanta lluptikunku?

 Ucrania nacionpi runakunaqa lluptikuchkanku Rusiamanta tropakuna yaykurusqanraykum, ichaqa bibliaqa ninmi imakunarayku kayna sasachakuykuna kasqanmanta.

•   Sasachakuykunaqa kan gobiernokuna runakunata mana allinta gobiernasqankuraykum. Yanapanankumantaqa astawanmi sasachanku (Eclesiastes 4:1; 8:9 b).

•   Sasachakuykunaqa kan satanas diablo mana allinkunata ruwanankupaq runakunata umachasqanraykum, bibliapim nin: “Diosta mana yupaychaq runakunam ichaqa llapallanku satanaspa munaychakusqan kachkanku”, nispa (Juan 14:30; 1 Juan 5:19).

•   Chaymantapas sasachakuykunaqa kachkan bibliapi nisqanman hina tukupay punchawkunapi kawsasqanchikraykum. 2 Timoteo 3:1 nin: “Tukupay punchawkunapiqa mana haykapipas qawasqanchik sasallaña punchawkunam kanqa”, nispa. Kay tukupay punchawkunapiqa kanantaqmi karqa guerrakuna, terromotokuna, llumpay wayra-parakuna, unquykuna, muchuykuna. Tukuy chaykunaraykum runakunaqa wasinkumanta, llaqtankumanta lluptikuchkanku (Lucas 21:10, 11).

 Llaqtankumanta lluptikuq runakunata, ¿imataq sunqunkuta tiyaykachinman?

 Bibliapiqa ninmi taytanchik Jehova c Diosqa wasinkuta saqispa llaqtanmanta lluptikuq runakunata llakipayasqanmanta (Deuteronomio 10:18). Payqa niwanchikmi sasachakuykunata chinkachinanmanta, ¿imaynatataq chinkachinqa? Diospa gobiernonmi hanaq pachamanta kamachimuspan kay pachapi gobiernokunata chinkachinqa (Daniel 2:44; Mateo 6:10). Satanastapas chinkachinqam (Romanos 16:20). Diospa gobiernonpiqa manañam rakinasqachu nitaq sapa nacionpichu kawsasun. Enteron allpa pachapim kawsakusun aylluntin hina huk sunqulla. Chay tiempopiqa manam pipas sasachakuykunaraykuqa wasinmanta lluptinqachu. Bibliapim nin: “Sapakamam uvas plantankupa higos sachankupa llantunpi tiyakunqaku, manañam pipas paykunataqa manchachinqachu. Tukuy atiyniyuq [Jehova] Diosmi chaynata nin”, nispa (Miqueas 4:4).

 Diospa gobiernonmi kay tiemponchikpi tukuy sasachakuykunata allichanqa. Kunanñataq yachaykusun imakunarayku wasinkumanta runakuna lluptikusqankuta hinaspa Jehova Dios imata ruwananmanta:

•   Guerrakuna kasqanrayku. Bibliapim nin: “[Jehova Diosmi] guerrakunata kay pachapi kuchun-kuchun chinkarachin”, nispa (Salmos 46:9). Guerrakunata Jehova Dios imaynata chinkachinanmanta yachanaykipaq leey “¿Cómo llegará a haber paz en la Tierra?” niq yachachikuyta.

•   Ñakarichisqa kasqankurayku. Bibliapim nin: “[Jehova Diosqa] sasachakuymantawan ñakariymantam paykunata libraykunqa”, nispa (Salmos 72:14). Chiqnikuq kayninkuta imaynata saqisqankumanta yachanaykipaq leey “¿Atichwanchu manaña chiqninakuspa kawsakuyta?” niqpi yachachikuykunata.

•   Wakcha kasqankurayku. Bibliapim nin “[Jehova Diosqa] qayakuqnin wakcha runatam libraykunqa”, nispa (Salmos 72:12). Manaña wakcha kananchikpaq Jehova Dios imakunata ruwananmanta yachanaykipaq leey “¿Es realista esperar un sistema económico justo?” niq yachachikuyta.

•   Muchuy kasqanrayku. Bibliapim nin: ‘Kay pachapiyá achka-achka kawsaykuna qispichun’, nispa (Salmos 72:16). Manaña muchuy kananpaq Jehova Dios imakunata ruwananmanta yachanaykipaq leey “¿Un mundo sin hambre?” niq yachachikuyta.

 ¿Llaqtankumanta lluptikuq runakunapa sunqunkuta tiyaykachinmanchu bibliapi yachachikuykuna?

 Awriki, hamuq tiempopi allinña kawsakunankumanta kallpanchaspanpas bibliaqa nintaqmi kay tiempopi imayna kawsakunankupaqpas.

 Bibliapim nin: “Amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik, hinaptinqa Diospa hawkayayninmi sunquykichiktawan yuyaynikichikta Cristo Jesusnintakama waqaychanqa, chay hawkayayqa runapa mana entiendey atinanmi”, nispa (Filipenses 4:6, 7).

 Imatam yachachiwanchik: Ima sasachakuypiña tarikuspaykipas Jehova Diostayá mañakuy sunquykipi hawka tarikunaykipaq. Leey “Filipenses 4:6, 7 | ‘No se inquieten por nada’” niq yachachikuyta.