NYOWADJƐKE!
Okakasano wolendana la waalota olotshi: Miliyɔ y’anto walota m’Ukraine
Owila wɔ Russie wowangaka nanyɛ owila w’Ukraine lá Ngɔndɔ k’ape 24, 2022, nkambo djɛsɔ mbila mbiko y’anto lá mbalaka edjinge walota má owila wɔkɔ. a
“Abɔmbɛ watondjɔtondjɔ. Anto walekɔ la wɔma lombombe wɔ yopewe kaanga ntepela. Winá wɔ isewe ente trɛ kɛwɛmba anto djɛ ndaaposɛ má owila, iso tɔsaka nkano djɛ ntshɔ. Toyalaka ladjɛ ntshika nkete djɛso nkfumɔ ladjikɛnde onto onkfumɔ ayalaki ladjɛ ndɔsa ngo mpata kɛmɔ kɛ daambi. Toyalaka ladjɛ ndɔsa ngo adɔkima wa djonyi, ekanga wɛ nnɔ, washi edjinge tokekete tɔ daambi tɔ ndɛ. Totshikaka nkete nkfumɔ ko totshɔka t’edjena kokongakawɔ train winá wɔ abɔmbɛ yakindjɛka nkfɔ.”—Nataliia, má Kharkiv, Ukraine.
“Tii lá winá w’ekomo, takanelaki ente mbandji kepangonanema. Ntateyɛka ndjoka eta má ndjena mɔtshi dj’owila edjinge adindishi watshikitaki. Ndɔsaka nkano djɛ ndota, ko ndɔsaka ngo nkete dj’oyɛmi la djonyi. Nyimaka má mvulu l’eshidji 8:00 wɛ nkɛsɛ ko ndɔsaka trɛ tá Lviv edjinge m’eteyi, ndɔsaka otuka tá Pologne.”—Nadija, má Kharkiv, Ukraine.
Lá djamba djɛnɛ
Donga djɛ nsɔsɔlɔ djɛkɔnge djetshinda anto djɛ ntshika ambandja yɛwɔ?
Anto watateyɛka ndota m’Ukraine ladjikɛnde owila wɔ Russie wawangaka ndaananyɛ mbandji. Koko, Bible ndjisolaka akambo ankina wa djonyi lombombe, ntepela ente donga nkina djetshinda anto djɛ ndota amvulu yɛwɔ nde:
Enkfumi wɛ wana w’anto wa l’andja w’otondo wambopekɔ djɛ mpɛyɛ nkfumbo yɛ wana w’anto kɛnɛ k’oyɛwɔ la djonyi. Anto walekɔ́ la lowandji nkambaka la lowandji lɔwɔ djɛ nyɛnyɛ anto ankina ndjolo.—Losanghanyɛ 4:1; 8:9.
Satana Djabolo, ‘owandji w’andja wanɛ,’ ndjimbolaka anto tá nyɛtshi, djɛkondeke Bible otepelande ante: ‘Andja w’otondo walɔndjɛma me onto wɔ pɔlɔ.’—Djɔanɛ 14:30; 1 Djɔanɛ 5:19.
Lá djiko dj’ekakasano wɛnyɛ anto ndjolo l’ilá kɛ nkama y’ɛnɔnyi, towika lá deko djɛ Bible ndatepela ante: ‘Lá etsho w’ekomo, deko djɛ ndjolo djɛ wolo nkfulumeyɛ ngoyala.’ (2 Timɔte 3:1) Ntepelaka lonkina ante, lá etsho w’ekomo, ambandji, ndjolo yeyɛ má nkete djetongamisá, ndjala yɛ nkasa edjinge epela wengoyala, akambo wangotshinda anto djɛ ndota.—Luka 21:10, 11.
Anto walotá olotshi okokawɔ mba nkongi mampe?
Bible nyɛnyɛka ante Ontongi wɔso Yehova, b alekɔ Ndjambe k’oka anto walotá olotshi edjinge watshika amvulu yɛwɔ ngandji edjinge djandji. (Mvungo K’ɛlɛmbɛ 10:18) Nde ndakaka djɛ nshiyɛ ekakasano wɛ waalotá elotshi má lotshimbo lɔ lowandji lɔnde lɔ l’olongo, l’etawɔ ambɔ Onkfumi wɔ Ndjambe, wɔngɔhɛná enkfumi wɛ wana w’anto. (Danyɛlɛ 2:44; Mateo 6:10) Yehova angokamba l’Onkfumi wɔnde djɛ nyimɛ Satana Djabolo. (Ɔrɔma 16:20) Onkfumi wɔsɔ wongokoma lowandji lɔ l’andja w’otondo edjinge wongimɛ wayi wa lotono wayɛ má wepo w’anto wel’ewila wetshikitanyi. Andja w’otondo wangoyala nkfumbo kɛmɔ kelekɔ́ l’osanga. Lako onto wongolota mvulu kɛnde lonkina, ladjikɛnde Bible ndakaka ante: ‘Iwɔ wangintasɛ onto l’onto l’anse k’ɔkɔdji wɔnde wɔ vinyɔ edjinge l’anse k’otamba wɔnde wɔ mfingo, edjinge lako onto wongawoke wɔma, ladjikɛnde ɔlɔmɔ wɔ Yehova kanga lɔndjɛndjɛyi l’angala ndeke lotepela.’—Mika 4:4.
Ngo Onkfumi wɔ Ndjambe toko ndeke longoshiyɛ ndjolo yelendana la wayi w’elotshi w’ɛnaso lɔɔko kɛnɛ. Yehova angokamba l’Onkfumi wɔnde djɛ nyimɛ ekakasano enkfumɔ wetshinda anto djɛ ndota elotshi. Toshishime ndjɔmbɔmba imotshi:
Ambandji. ‘[Yehova] angoshiyɛ ambandji lá looko l’otondo.’ (Yeembo 46:9) Djɛ ndjewa wopo wɔ Yehova ndongoshiyɛ ambandji, wala djamba djelekɔ́ l’ɔtɛ wɔ djoyi ante: “La paix dans le monde: Comment sera-t-elle établie?”
Lɔnyɔkɔ edjinge wayi wa lopango. ‘Nde [Yehova] angaawikɛ má lɔnyɔkɔ la má wayi wa lopango.’ (Yeembo 72:14) Djɛ nsipisoyɛ wopo wɔ anto okokawɔ ntshikitanyɛ djalelo djɛwɔ djɛ nyɛtshi, wala wamba walekɔ́ l’ɔtɛ wɔ djoyi ante “Woho wa mbidja lohetsho otshumba.”
Ɔmvɔ. ‘[Yehova] angowikɛ ose ɔmvɔ wohona okotshɔ.’ (Yeembo 72:12) Djɛ nyɛna wopo wɔ Ndjambe ndongoshiyɛ akambo wakomɛ anto djɛ ndjala ɔmvɔ, wala djamba djelekɔ́ l’ɔtɛ wɔ djoyi ante: “Onde sho koka nongamɛ dia monga la dikongɛ di’awui wa falanga diele la losembwe?”
Ndjala yɛ nkasa. ‘Nkete djɛ ndɛ ngoyala efula lá looko.’ (Yeembo 72:16) Djɛ ndjewa wopo wɔ Ndjambe ndongonangha dj’ipa kaanga onto ɔmɔ mvɔ ndjala lonkina, wala djamba “Plus jamais la faim dans le monde?”
Bible nkoka nkotshɛ́ anto walota elotshi lɔɔko kɛnɛ?
Ee. Ma djiko djɛ mpɛyɛ waalota elotshi nkongi djɛ nsɔsɔlɔ djelendana l’etsho weyaye, Bible nkoka ndaakotshɛ́ lá ekakasano w’opomanawɔ winá wɔsɔ.
Ikfɔ yɛ Bible: ‘Kanga enkesa angawolake etepela enkfumɔ, koko kanga kɛsɔ angilake yimba lá djina nkfumɔ djotapolakande.’—Woongo 14:15.
Kɛnɛ kɛ nkambo djɛsɔ osakisolawɔ: Tɔnɔla djɛ ndjewa mbalaka yekoka nkokomela la kɛnɛ k’okokɛ nangha djɛ ndalama. Hona djɛ djewa antɔmbɔki wahonaká nkamba l’ovungusano djɛ nanghela anto wambolota olotshi nyɛtshi má wopo wɔ yotalembetela mbandja yɛ yombolota wɔlɔ.
Ikfɔ yɛ Bible: ‘Ntsha tolekɔ la nkete djɛ ndɛ, la ntshendja djɛ ndɔta, tosasange la djɛkɔ.’—1 Timɔte 6:8.
Kɛnɛ kɛ nkambo djɛsɔ osakisolawɔ: Tilake yimba yɛko ngo lá nkete djelá demba. Ntsha osasanga la nkete djelekɔ́ djonyi, ongoyala l’osasa.
Ikfɔ yɛ Bible: ‘Akambo ankfumɔ w’ɔkɔpanyo anto nyonanghela, edjinge nyo ladjɛ ndaananghela.’—Mateo 7:12.
Kɛnɛ kɛ nkambo djɛsɔ osakisolawɔ: Yala la bale ntshitshi edjinge wɔlɔ. Wekeka wasɔ wangokotshɛ́ anto welá mbandja kɛnyo djɛ nkɔlɛmɛyɛ la nkawola.
Ikfɔ yɛ Bible: ‘Nyotakawoyɛke nyɛtshi tá nyɛtshi.’—Ɔrɔma 12:17.
Kɛnɛ kɛ nkambo djɛsɔ osakisolawɔ: Tawolake nkɛlɛ nkotshinda djɛ nkawoyɛ nyɛtshi tá nyɛtshi winá w’onto okonanghelande nyɛtshi. Djoyi djɛsɔ ngoleka ntɔla akambo ngo tá nyɛtshi.
Ikfɔ yɛ Bible: ‘Lá akambo ankfumɔ, lemi ndekɔ la wolo me kanga lɔmpɛyɛka nkfulu.’—Filipɛ 4:13.
Kɛnɛ kɛ nkambo djɛsɔ osakisolawɔ: Pɛyɛ Ndjambe edjena kɛ djonyi lá lowiko lɔko edjinge lɔmbakande. Nde nkoka nkɔpɛyɛ lokembo lɔ nkfulumeyɛ.
Ikfɔ yɛ Bible: ‘Lá nkambo nkfumɔ nyotakiyanake koko nyoshimele Ndjambe ehomba wɛnyo lá lɔlɔmbɔ lá ɛwɔndɔwɔndɔ esanga la ekawoyelo kɛ losaka, ko vu djɛ Ndjambe djeleka tokanyi tonkfumɔ ngolama eloko wɛnyo la tiimba tɔnyo.’—Filipɛ 4:6, 7.
Kɛnɛ kɛ nkambo djɛsɔ osakisolawɔ: Lɔmba Ndjambe akɔpɛyɛ vu djelá wɔɔngɔ la djel’oloko winá w’opomanɛ l’okakasano la wopo w’okakasano onkfumɔ. Lenda djamba djetepela ante: “Philippiens 4:6, 7—‘Ne vous enquiétez de rien.’”
a M’ɔkɔngɔ wɔ lofu lɔ yawokela bɔmbɛ, Commissariat kɛ Nations Unies kelendana la waalotá olotshi (HCR) atepelaka ante nkambo djɛsɔ alekɔ nkambo djɛlɔmbama nanghema lankeke lankeke. Ngo m’ɔkɔngɔ w’etsho 12 toko, anto ndekana miliyɔ 2 walotaka m’Ukraine t’ewila enkina waasukana ko anto ankina miliyɔ 1 walotaka m’amvulu yɛwɔ tá atshuku ankina w’Ukraine.
b Yehova alekɔ djiina djɛ Ndjambe. (Yeembo 83:18) Lenda djamba djetepela ante: “Qui est Jéhovah?”
