¡GAKUWÁÁNʼLÚ MÁ XÚʼKO̱ XAWII!
Mbaʼiin xa̱bu̱ nagájnún náa Ucrania numuu rí numíniiʼ
Nákhá 24 ñajunʼ gu̱nʼ febrero tsiguʼ 2022, soldados bi̱ kúwá náa Rusia nigíʼdi̱i̱ nini̱ gámbáa Ucrania. Rígi̱ niʼni dí mumíniiʼ mbaʼiin xa̱bu̱ ga̱jma̱a̱ mbaʼiin ndiyóoʼ dí magajnún náa xuajñún. a
“Nu̱da̱ʼ bombas ga̱jma̱a̱ nawáán rí najmídáʼ. Ra̱ʼkhá tháán emíñúʼ rí asndu tséyóo xóo ma̱ta̱. Índo̱ nidxáwíínʼxu̱ dí xa̱bu̱ nagáñún ga̱jma̱a̱ tren ni̱taxu̱ dí múʼguáxu̱ mangáanʼ. Mámbáa kayá ni̱jkha̱ mbá mochila chíʼgíiʼ náa gajti rí itháan mbaʼyúxu̱. Ikhí gajti i̱yi̱i̱ʼ, thana, iyaʼ ga̱jma̱a̱ dí muphúxu̱. Índo̱ kúwá ru̱dáʼ bombas nigayúxu̱ níjkhuá náa nagájnuu tren” (Natalia, de Járkov, Ucrania).
“Nditháan túndxa̱ʼwa̱míjna̱xu̱ dí marigá guerra, asndu índo̱ nidxáwíínʼxu̱ dí nawán mijdáʼ bomba náa xuajin dí tri̱ga̱ mijngii náa kuwáanʼxu̱ dí asndu naʼba̱a̱n ventanuxu̱. Ikhú nigájnuʼ niguéjkhá i̱ndó dí mbaʼyóʼ. Nigájnuʼ náa goʼwóʼ a las ocho dí miʼcha̱ ga̱jma̱a̱ niguajthun tren dí na̱jkha̱ náa xuajin Lviv, nda̱wa̱á niguajthun autobús dí na̱jkha̱ náa Polonia” (Nadia, de Járkov).
Rígi̱ nindxu̱u̱ dí mbuʼyáálú xúgi̱:
Ndiéjunʼ eʼni dí xa̱bu̱ magajnún náa guʼwún rá.
Maski ajndu dí kúwá rumíniiʼ xa̱bu̱ Ucrania nindxu̱u̱ ga̱jma̱a̱ numuu dí soldados bi̱ Rusia nini̱ gámbáa país rúʼko̱, mú náa Biblia naʼthí itháan ga̱jma̱a̱ numuu xúgíʼ rígi̱.
Xa̱bu̱ ñajunʼ tséʼngu̱u̱n gúmbañún xa̱bu̱. Najmún ñajunʼ dí guáʼdáá mu muni̱ gíníin, raʼkháa dí mumbañún (Eclesiastés 4:1; 8:9).
Gixa̱a̱, “xa̱bu̱ ñajunʼ ndrígóo numbaaʼ” natsudiin xa̱bu̱ muni̱ gíníin eʼwíinʼ, náa Biblia naʼthí: “Náa xúgíʼ numbaaʼ rígá tsiakii ndrígóo Gixa̱a̱” (Juan 14:30;1 Juan 5:19).
Xúgíʼ xkujndu dí nuni̱ marigá xa̱bu̱ náa mba̱yu̱u̱ʼ tsiguʼ, kuwáánʼ náa mbiʼi dí Biblia niʼtáriyaʼ marigá. Náa 2 Timoteo 3:1 naʼthí: “Índo̱ gáʼni iwáá mbiʼi, maʼni gakhi̱i̱ ga̱jma̱a̱ maʼni mingíjyúuʼ rí maʼngulú”. Xúgíʼ dí xtáa rarígá xóo guerras, ruʼwa mbiʼ, ewiʼ ga̱jma̱a̱ nandii nasngájma dí kuwáánʼlú iwáá mbiʼi. Xúgíʼ rígi̱ naʼni dí xa̱bu̱ muniña̱a̱nʼ guʼwún (Lucas 21:10, 11).
Náá gándoo gúxkamaa rí guáʼthi̱i̱n mundrígu̱u̱ bi̱ nuniña̱a̱nʼ guʼwún rá.
Náa Biblia naʼthí dí Jeobá b bi̱ niʼniáánʼlú nindxu̱u̱ mbáa Dios bi̱ nandoo kaʼñún xa̱bu̱ bi̱ nduyáʼ náa makuwá, bi̱ nuniña̱a̱nʼ guʼwún, nagáwíinʼ a̱jkiu̱u̱n kaʼñún (Deuteronomio 10:18). Ikhaa nakudaminaʼ dí maʼnigámbáa dí naʼni mumíniiʼ bi̱ nuniña̱a̱nʼ guʼwún. Xú káʼnii gáʼni xá. Majmiuu Xa̱bu̱ Ñajunʼ ndrígóo bi̱ xtáa mekhuíí, ikhaa mariʼkuwíin xúgíinʼ xa̱bu̱ ñajunʼ bi̱ kúwá náa numbaaʼ (Daniel 2:44; Mateo 6:10). Jeobá majmiuu Xa̱bu̱ Ñajunʼ ndrígóo mu maxíyáa Gixa̱a̱ (Romanos 16:20). Xa̱bu̱ Ñajunʼ buʼko̱ maʼtáñajunʼ náa xúgíʼ numbaaʼ ikhaa maʼngo̱o̱ maʼni dí xa̱bu̱ makuwá mbá kambájxu̱u̱n. Nimbáa ní xáʼyóoʼ magajnúu náa goʼwóo, numuu rí náa Biblia naʼthí: “Mámbáa gági̱ʼi̱ náa agoo ixu̱u̱ uva ga̱jma̱a̱ náa agoo ixi̱ higo, nimbáa xáʼnimíñún, numuu rí xúʼko̱ niʼthí Jeobá bi̱ gíʼdiin mbaʼiin ejércitos” (Miqueas 4:4).
I̱ndó Xa̱bu̱ Ñajunʼ ndrígóo Dios maʼngo̱o̱ mambáñún xa̱bu̱ bi̱ nduyáʼ náa makuwá. Jeobá majmiuu Xa̱bu̱ Ñajunʼ ndrígóo mu maʼni gámbáa xkujndu dí naʼni muniña̱a̱nʼ guʼwún xa̱bu̱. Guʼyáá tikhuu xkri̱da:
Guerra. “Ikhaa [Jeobá] naʼni gámbáa guerra” (Salmo 46:9). Mu ma̱ndoo ma̱ta̱ya̱a̱ xú káʼnii Dios gáʼni gámbáa xkujndu, atraxnuu artículo “¿Cómo llegará a haber paz en la Tierra?”.
Naguma gíníin ga̱jma̱a̱ najuixnún. “[Jeobá] maʼni káwíin náa rí najma gíníi ga̱jma̱a̱ náa rí najuixnún” (Salmo 72:14). Mu ma̱ndoo ma̱ta̱ya̱a̱ xú káʼnii gándoo gúriʼkujmináá xa̱bu̱, atraxnuu dí na̱ʼkha̱ náa artículo “Atani̱ gámbáa dí nawiya̱a̱ʼ xtañún eʼwíinʼ”.
Tsingíná. “Ikhaa [Jeobá] naʼni kríya̱a̱ʼ bi̱ gínáa índo̱ na̱nda̱ʼa̱ dí mixtambáyíí” (Salmo 72:12). Mu ma̱ta̱ya̱a̱ xú káʼnii Dios gáʼni gámbóo tsingíná, atraxnuu artículo “¿Es realista esperar un sistema económico justo?”.
Ewiʼ. “Marigá wéñuʼ ganitsu náa tsu̱du̱u̱ ku̱ba̱ʼ” (Salmo 72:16). Mu ma̱ta̱ya̱a̱ xú káʼnii Dios gáʼni rí xúgíinʼ xa̱bu̱ maguáʼdáá ganitsu, atraxnuu artículo “¿Un mundo sin hambre?”.
Lá ma̱ndoo mambáñún Biblia bi̱ nigájnún náa guʼwún ráʼ.
Xúʼko̱. Biblia raʼkháa índo̱ naʼthí ga̱jma̱a̱ dí mundrigúu nda̱wa̱á ma̱ngaa naxnún consejo dí mambáñún mu maʼngu̱u̱n ga̱jma̱a̱ xkujndu dí kúwá ruraʼníí.
Texto dí nagájnuriyo̱o̱ʼ: “Mbáa bi̱ tséʼyoo naʼnimbo̱o̱ xúgíʼ rí nutháán, mú bi̱ najmañuu nandxa̱ʼwáminaʼ ndaʼyoo náa ejkha̱” (Proverbios 14:15).
Rí nandoo gáʼthí: Atatsaʼwáminaʼ wapháá xkujndu dí gamíi matraʼníí ma̱ngaa xú káʼnii gátani̱ mu matani̱ kríyamínaʼ. Atiewumínaʼ náa bi̱ nuni̱ kuʼwáʼ, numuu dí ikhiin nuni̱ gíníin bi̱ ndiʼkhún eguáʼnú náa mbá xuajin. Nuniún xígi̱ kaʼnii numuu dí namíñúún, tséyáá xú káʼnii nindxu̱u̱ xuajin.
Texto dí nagájnuriyo̱o̱ʼ: “Á mu kuaʼdáá ganitsu ga̱jma̱a̱ xtíin, gakuwáanʼ gagi ga̱jma̱a̱ numuu rúʼko̱” (1 Timoteo 6:8).
Rí nandoo gáʼthí: Xúʼyáʼ dí muguaʼdáá. Itháan má gagi gákúwáánʼ ga̱jma̱a̱ i̱ndó dí kuaʼdáá.
Texto dí nagájnuriyo̱o̱ʼ: “Guniu̱u̱la eʼwíinʼ xúgíʼ rí nandala muniala ikháanʼ” (Mateo 7:12).
Rí nandoo gáʼthí: Ganindxa̱a̱ʼ mbáa májáanʼ xa̱bu̱ ga̱jma̱a̱ gaʼngo̱o̱ a̱jkia̱a̱nʼ. Rí ma̱nindxa̱a̱ʼ xúʼko̱ káʼnii maʼni rí mbuyamajkuaaʼ ga̱jma̱a̱ mundriguíín májánʼ xa̱bu̱ bi̱ kúwá náa xuajen rúʼko̱.
Texto dí nagájnuriyo̱o̱ʼ: “Xútangáanʼ muniu̱u̱nla dí ra̱májánʼ bi̱ niniala dí ra̱májánʼ” (Romanos 12:17).
Rí nandoo gáʼthí: Índo̱ nuniaanʼ dí raʼkhí, xátatsiʼñáminaʼ rí nakiʼnán maʼni rí mataniu̱u̱nʼ mangáanʼ xó má niniaanʼ. Rúʼko̱ gáʼni dí maʼni itháán mba̱a̱ xkujndu.
Texto dí nagájnuriyo̱o̱ʼ: “Gúʼdoo tsiakii mu ma̱ni̱ xúgíʼ núma̱a̱ má bi̱ naxnúʼ tsiakii” (Filipenses 4:13).
Rí nandoo gáʼthí: Náa xúgíʼ rí gátani̱ gákuma̱a̱ʼ xtayáá Dios. Índo̱ gáratajkáan atanda̱ʼa̱a̱ dí maxnáa tsiakii mu maʼnga̱a̱ʼ, ikhaa mambáyáaʼ.
Texto dí nagájnuriyo̱o̱ʼ: “Xáxmiéjuanla ga̱jma̱a̱ numuu nimbá, tséʼniuu má xóo kuwáanʼla, gutájkháan, gunda̱ʼa̱ ga̱jma̱a̱ xúgíʼ a̱jkia̱la, ma̱ngaa gu̱xna̱a̱ núma̱aʼ Dios, gu̱ni̱ mbaʼyoo rí ndayála, ikhú tsímáá ndrígóo Dios dí rígá itháan ñuʼún rí nimbáa xa̱bu̱ numbaaʼ tséʼngo̱o̱ gíkro̱ʼo̱o̱ mañewu̱u̱n a̱jkia̱la, mañewu̱u̱n ku̱ma̱ ndrígala” (Filipenses 4:6, 7).
Rí nandoo gáʼthí: Asndu xú káʼnii má xkujndu dí xtaa natraʼníí atanda̱ʼa̱a̱ Dios dí maʼni maraxtaa tsímáá. Atayáá artículo “Filipenses 4:6, 7 | ‘No se inquieten por nada’”.
a I̱mba̱ néjtsu̱ú dí nini̱ gámbáa, Alto Comisionado de las Naciones Unidas para los Refugiados (ACNUR) niʼthí dí ndayóoʼ magajnún nacha̱ xa̱bu̱ náa Ucrania. Káaʼ 12 mbiʼi nigájnún itháan dí dos millones xa̱bu̱ ga̱jma̱a̱ mbá millón xa̱bu̱ niniña̱a̱nʼ guʼwún, mú niguanún náa ikháá má país.
b Jeobá mbiʼyuu Dios (Salmo 83:18). Atayáá artículo “¿Quién es Jehová?”.
Puede que también le interese
Rusia naʼni gámbóo Ucrania | Lá xtáa rambánuu dí niʼtáriyaʼ náa Biblia rá.
Atayáá ndiéjunʼ eyoo gáʼthúun dí xúgi kaʼnii xtáa rarígá.
ESSENTIAL BIBLE TEACHINGS
Ndiéjunʼ nindxu̱u̱ Reino ndrígóo Dios rá.
Xúgíʼ tsiguʼ rí Jesús niʼtáraʼa, niʼsngáa ga̱jma̱a̱ numuu Reino ndrígóo Dios itháan ki xóo i̱ʼwáʼ.Mba̱yu̱ʼ tsiguʼ xa̱bi̱i̱ nitajkháan mu ma̱ʼkha̱nú Reino bigi̱.
