KURAN NEN!
Ior Mbayevese Kwaghtseren—Ior Umiliôn Umiliôn Mba Yevese Duen ken Tar u Ukraine Kera
Sha iyange i Febewari 24, inyom i 2022 ne, tar u Russia va ta ityav sha tar u Ukraine, kwagh ne va ior a ican, nahan ior kpishi yevese ityav mbin. a
“I lu tan ubom man akaa agen a bughur. Kwagh ne cieryol je, me fatyô u pasen kwagh u lu zan hemen la jighilii ga. Yange se mba ungwan ser agirgiradogo nga duen a ior yô, se kpa se mough. Se undu akaa ase cica cii sha ci u gba u hanma or nana wa ikyav hen anikpa u cuku tseegh. Nahan se tôô di udôkumente asev, man icigh man mngerem kua akaayan a kiriki tseegh tsô. Se undu hanma kwagh ugen cii, se yem hen tashan u igirgirdogo. Er se lu yemen la i lu tan ubom hanma ijiir cii.”—Mkaanem ma Nataliia, u ken Kharkiv, tar u Ukraine.
“Yange se hen ser a nôngo ityav ga zan zan ityav va hii. M ungwa ubum lu bughur sha ajiir agen ken geri, uwindou lu tenger. Nahan m nenge mer hemba doon u me mough. Maa m mough pepe er ahwa anigheni nahan, m tôô akaa a kwagh gbam a mi hange hange la tseegh, m nyôr igirgirdogo m yem ken geri u Lviv. M za mase nyôron bôôsu heela m yem ken tar u Poland.”—Mkaanem ma Nadija, u ken Kharkiv, tar u Ukraine.
Ken ngeren ne
Er nan jim i hingir u ior a mough a lu yevese duen ken tar u Ukraine nahana?
Tar u Russia ta ityav sha tar u Ukraine, ka ityôkyaa la ior ve lu yevese duen ken tar la ye. Nahan cii kpa, Bibilo pase atôakyaa a vesen a i hii ve ior ve lu yevese undun ajiir a ve yô:
Ugomoti mba ken ityar kposo kposo fatyô u nan ior akaa a kwagh a gbe ve a mi la ga. Ashighe kpishi mbahemenev ka ve nzughul a ior sha ci u mba a tahav.—Orpasenkwagh 4:1; 8:9.
Satan Diabolo, un u a lu “tor u tar ne” la ngu tuur ior ken ijime mba eren akaabo kpishi, je yô Bibilo kaa ér: “Tar cii ngu sha ikyev i Iferor.”—Yohane 14:30; 1 Yohane 5:19.
Uumace tagher a mbamzeyol anyom uderi uderi hegen shi bee kera yô, se mba sha shighe u Bibilo i vande ôron ér: “Ken ayange a masejime yô, ashighe a bo aa va shi uma una taver” la. (2 Timoteu 3:1) Ken ayange a masejime shon ne, a lu nôngon ityav shi akaa a vihin er tartenger man ahumbe a vihin akaa nahan aa lu eren, kua m-ban u kwaghyan man iangev. Ka akaa a ka a na ve, ior ve hingir u yevese undun ajiir a ve je ne.—Luka 21:10, 11.
Ior mbayevese kwaghtseren vea zua a ishimaverenkeghen hana?
Bibilo pase ér Yehova, b un u a gbe se la, ka Aôndo u a tesen ior mbayevese mbamzeyol man mba ve undu ajiir a ve la dooshima na, shi a zungwen ve kpaa yô. (Duteronomi 10:18) A tôndo zwa ér una sôr mbamzeyol vev sha ikyev i gomoti na u sha, u i yilan ér Tartor u Aôndo la. Gomoti ne una kar a tile sha ityough ki ugomoti mba u uumace cii. (Daniel 2:44; Mateu 6:10) Yehova una kar a Satan Diobolo kera sha ikyev i Tartor na. (Mbaroma 16:21) Tartor la ua lu gomoti u una hemen tar cii yô, nahan mpav una bee sha ci u upyaven vea kera lu kposo kposo sha tar ga. Uumace sha tar cii vea hingir tsombor môm u lun ken mzough. Nahan or môm nana kera yevese a undu ya u nan ga, sha ci u Bibilo tôndo zwa ér: “Kpa hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga; gadia ka zwa u [Yehova] u akum a Sha je, u kaa nahan ye.”—Mika 4:4.
Ka Tartor u Aôndo tseegh ua bee a kwagh u ior ve lu yevese undun ajiir a ve nyian ne vindi vindi ye. Yehova una bee a mbamzeyol mba ka ve na i hingir u ior a yevese a undu ajiir a ve la sha ikyev i Tartor na. Ka mbamzeyol mbagenev mba una bee a mi je ne:
Ityav. ‘Yehova er ityav mbi bee.’ (Pasalmi 46:9) Wea soo u fan er Aôndo una bee a ityav kera yô, ôr ngeren u a lu a itinekwagh ér, “A Er Nan Ve Bem Una Va sha Tara?” la.
Mkighir man ipila. “[Yehova] una paa uma ve sha mkighir man ipira.” (Pasalmi 72:14) Wea soo u fan er ior vea fatyô u den anza a dang a a ye tor sha a ve la yô, ôr ungeren mba ve lu a itinekwagh ér, “Er Se Er Ve Ihyom ia Bee Yô” la.
Ibanave. “[Yehova] una yima oribanave zum u nana vaa yô.” (Pasalmi 72:12) Wea soo u kaven er Aôndo una bee a akaa a van a ibanave la cii kera yô, ôr ngeren u ken zwa Buter u a lu a itinekwagh ér, “Is a Fair Economic System Possible?” la.
M-ban u kwaghyan. “Iyiav [mbia] ngee shin tar.” (Pasalmi 72:16) Wea soo u fan kwagh u Aôndo una er sha er or môm nana kera tsa ijen ga yô, ôr ngeren u ken zwa Buter u a lu a itinekwagh ér, “A World Without Hunger?” la.
Bibilo ia fatyô u wasen mbayevese kwaghtseren hegen je kpa?
Een ia fatyô. Bibilo i wasen mbayevese ityav u lun a ishimaverenkeghen ér a va doo ken hemen, kpa ka cii la ga, ka i wase ve u nôngon a mbamzeyol mba ve lu tagher a mi hegen ne je kpaa.
Kwaghwan u ken Bibilo: “Orlanenkwagh ka nan gba nan jighjigh sha hanma kwaghôron tsô, kpa orfankwagh yô, ka nan ver ishima sha zende u nan.”—Anzaakaa 14:15.
Inja i kwaghwan ne: Vande henen sha akaabo a alaghga u va tagher a mi la, nahan hen sha kwagh u u fatyô u eren sha u kuran iyol you yô. Mbaaferev ka ve soo u nzughul a mbayevese ityav hen ijiir i he i ve lu la, sha ci u ve fa kwagh u ijiir la kuma ve ga shi mba a or u kuran ve kpaa ga, nahan lu tsevaa sha kwagh ve.
Kwaghwan u ken Bibilo: “Nahan aluer se mba a kwaghyan man akondo yô, akaa ne aa kuma se.”—1 Timoteu 6:8.
Inja i kwaghwan ne: De hemban veren ishima sha akaa a iyolough ga. Aluer u zua a akaa a kwagh a gbe u a mi la, nahan kuma u yô, a hemba saan we yô.
Kwaghwan u ken Bibilo: “Sha nahan yô, akaa a ne soo ner ior ve eren a ven la cii, ne kpa eren nen a a ve kpee je.”—Mateu 7:12.
Inja i kwaghwan ne: Waan ishima shi tesen erdoo. Aluer u ngu a aeren ne yô, ior mba hen ijiir you i he la vea hemba nan we icivir shi kwagh wou una doo ve.
Kwaghwan u ken Bibilo: “Or a̱ er u ifer kpa, we de eren nan ifer ga.”—Mbaroma 12:17.
Inja i kwaghwan ne: A nzughul a ve kpa, de oron iyev sha ci u ishimavihin ga. U er nahan kwagh a hemba vihin a vihi.
Kwaghwan u ken Bibilo: “Ka sha ikyev i un u a nan mo tahav la m zough a agee a eren akaa cii ye.”—Mbafilipi 4:13.
Inja i kwaghwan ne: Na Aôndo ian ken uma wou shi eren msen hen a na. Una na u agee a wan ishima.
Kwaghwan u ken Bibilo: “Ishima i̱ de nyian ne sha ma kwagh ga, kpa ken hanma mlu cii, pasen nen Aôndo akaa a a gbe ne la ken mbamsen mba zamber man mbamsen mba sughun un; nahan bem u Aôndo u a hembe hanma mkav la una kura asema a en kua mbamhen enev.”—Mbafilipi 4:6, 7.
Inja i kwaghwan ne: Wea tagher a nyityô zayol je kpa, sôn Aôndo a̱ wase u u lun a bem ken ishima,. Ôr ngeren u ken zwa Buter u a lu a itinikwagh ér, “Philippians 4:6, 7—‘Do Not Be Anxious About Anything.’ ”
a Yange i hii ityav mbin, kpernan maa orvesen u gbaatom u United Nations u a nengen sha kwagh u mbayevese ityav, u i yilan ér United Nations High Commissioner for Refugees (UNHCR) la kaa wener, kwagh u a lu zan hemen ne ka kwagh u hemban vihin u i gbe u a er kwagh sha mi fele fele yô. Ken atô u ayange 12 tseegh, iorov mba hemban miliôn uhar yevese due tar u Ukraine yem ken ityar igen i i lu ikyua yô, shi ior mba kuman miliôn môm yevese yem sha ajiir agen ken tar u Ukraine.
b Iti i Aôndo kpôô kpôô ér Yehova. (Psalm 83:18) Ôr ngeren u a lu a itinekwagh ér “Ka An Nan Lu Yehova?” la.
Kwagh Ugen u Alaghga Shi Una Doo U Yô
Tar u Russia Ta Ityav sha Tar u Ukraine—Kwagh ne Ngu Kuren Kwaghôron u Profeti u ken Bibilo?
Aluer ka nahan yô, Bibilo pase er kwagh u a lu eren ne una za a kure yôô?
ESSENTIAL BIBLE TEACHINGS
Ka Nyi I Lu Tartor u Aôndo?
Yesu yange hemban tesen ior kwagh u Tartor u Aôndo shighe u lu eren tom na la. Mbadondon un ndera eren msen sônon ér Tartor la u va anyom kar hegen uderi imôngo.
MBAMPIN MBA BIBILO I NE MLUMUN SHA MI LA
A Va Tim Taraa?
Bibilo pase awashima u Aôndo sha ci u tar la wang.
MBAMPIN MBA BIBILO I NE MLUMUN SHA MI LA
Er Nan Ve Bem a Ban sha Tar Yum Nahana?
Uumace mba nôngon ér vea va a bem sha tar kpa mba fantyô ga. Fa atôakyaa a a ne ve ve lu fantyô ga yô.
