Wodja wa Russie wakatatɛ mbɔtwɛ wodja w’Ukraine la ta lo Ngɔndɔ ka hende 24, 2022, ndo nsɛnɔ ya miliyɔ y’anto yekɔ lo waale ndo wekɔ lo ndawɔ oma lo wodja w’Ukraine. a

 “Waa bɔmbɛ yekɔ lo tondɔtondɔ. Anto wekɔ la wɔma waheyama ndo nkɔndɔla. Lam’akateye dia kawolo kekɔ lo mɛmba anto dia mbatondja oma l’Ukraine, sho takɔshi yɛdikɔ ntshɔ. Takahombe ntshika diangɔ diaso tshɛ, nɛ di’onto tshɛ akahombaka mbɔsa tapa dia tshitshi ɔtɔi. Takakoke tsho mbɔsa adɔkima w’ohomba, ekanga ndo ashi. Takatshike diangɔ dikina tshɛ ndo takatshu otsha lo gara etena kakakɔka bɔmbɛ.”​—Nataliia, oma la Kharkiv, Ukraine.

 “Polo l’etena k’ekomelo, takafɔnyaka dia ta hadiotɔlɔma. Lakoke wendjo w’ekoma oma lo bɛtshi dimɔtshi di’osomba ndo adidishi wakadidimaka. Lakɔshi yɛdikɔ ya ndawɔ, ndo lakɔshi paka diangɔ diele ohomba. Lakatshike luudu lami l’eshidi 8 kokele wa pindju ndo lakɔshi kawolo otsha la Lviv ndo oma laasɔ, lakɔshi mutuka otsha la Pologne.”​—Nadija, oma la Kharkiv, Ukraine.

Lo sawo nɛ

•  Naa ɛkɔkɔ w’eshika wakonya anto dia ntshika ngelo yawɔ?

•  Lende akoka ase dawo ntana elongamelo?

•  Onde Bible koka nkimanyiya ase dawo ɛlɔ kɛnɛ?

 Naa ɛkɔkɔ w’eshika wakonya anto dia ntshika ngelo yawɔ?

 Anto wakatatɛ ndawɔ oma l’Ukraine l’ɔtɛ wakɔtwɛ wodja wa Russie wodja w’Ukraine la ta. Koko, Bible mbisholaka awui akina w’ohomba efula, mbuta ate ɛkɔkɔ ekina wakonya anto dia ndawɔ ngelo yawɔ:

•   Mandji y’ana w’anto ya l’andja w’otondo yambohekɔ dia mbisha nkumbo y’anto w’anto kɛnɛ kewɔ l’ohomba. Wanɛ wele la lowandji kambaka la lowandji lawɔ dia nsɔkisha anto.​—Ondaki 4:1; 8:9.

•   Satana Diabolo, “owandji w’andja ɔnɛ,” ekɔ la shɛngiya ya kɔlɔ le anto, diakɔ diata Bible ɔnɛ: “Andja w’otondo wekɔ lo nɔmbɔma oma le kanga kɔlɔ.”​—Joani 14:30; 1 Joani 5:19.

•   Laadiko w’ekakatanu wambɛnya anto paa l’edja k’ɛnɔnyi nkama, tekɔ lo nsɛna l’etena kakatatshi Bible ɔnɛ: “Lo nshi y’ekomelo, tena dia wolo mbikikɛ diayoyala.” (2 Timɔte 3:1) Ndo nto ɔnɛ, lo nshi y’ekomelo, ata, mpokoso y’oma lo diangɔ diakatongama, ndjala ya kasha ndo elando wayonga, akambo wayotshutshuya anto dia ndawɔ.​—Luka 21:10, 11.

 Lende akoka ase dawo ntana elongamelo?

 Bible mɛnyaka di’Otungi aso, Jehowa b ekɔ Nzambi koka ase dawo ndo anto watshika mvudu yawɔ ngandji ndo kɛtshi. (Eohwelo k’Ɛlɛmbɛ 10:18) Nde ndakaka dia nkandola ekakatanu w’ase dawo oma lo tshimbo ya lowandji lande la l’olongo, lelamɛ Diolelo dia Nzambi, nɛ diayɔhɛna mandji y’ana w’anto. (Danyɛlɛ 2:44; Mateo 6:10) Jehowa ayokamba la Diolelo diande dia minya Satana Diabolo. (Rɔmɔ 16:20) Diolelo sɔ diayonga lowandji la l’andja w’otondo ndo diɔ diayonya awui wa diatɔnelo dioye oma lo woho wele anto lo wedja wotshikitanyi. Andja w’otondo wayonga nkumbo ɔtɔi kele kaamɛ. Ndooko layolawɔ luudu lande nto, nɛ dia Bible ndakaka ɔnɛ: “Vɔ wayodjasɛ onto l’onto l’ɛse k’ɔkɔdi ande wa vinyɔ ndo l’ɛse k’osongo wa fingo, ndo ndooko onto layowaotsha wɔma, nɛ dia onyɔ wa Jehowa kanga lolembelembe kambota.”​—Mika 4:4.

 Paka Diolelo dia Nzambi mbakoka nkandola lo pondjo ekakatanu wendana l’awui wa dawo wɛnaso ɛlɔ kɛnɛ. Jehowa ayokamba la Diolelo diande dia minya ekakatanu tshɛ watshutshuya anto dia nkoma ase dawo. Tɔsɛdingola bɛnyɛlɔ dimɔtshi:

•   Ata. “[Jehowa] ekɔ lo nkomiya ata lo nkɛtɛ k’otondo.” (Osambo 46:9) Dia mbeya woho wayokomiya Nzambi ata, adia sawo diele l’ɔtɛ a dui ɔnɛ: “La paix dans le monde : comment sera-t-elle établie?”

•   Dihɛnyɔki ndo awui wa ngala. “[Jehowa] ayowatsha oma lo dihɛnyɔki ndo oma l’awui wa ngala.” (Osambo 72:14) Dia nshihodia woho wayotshika anto waonga awɔ wa kɔlɔ wakahikama edja efula l’etema awɔ, adia asawo wele l’ɔtɛ a dui ɔnɛ: “Woho wa mbidja lohetsho otshumba.”

•   Wola. “[Jehowa] ayotsha ose wola layanga ekimanyielo, ndo mbolambola la ɔnɛ tshɛ laha l’okimanyedi.” (Osambo 72:12) Dia mbeya woho wayokandola Nzambi awui wele lo kiɔkɔ ya wola, adia sawo diele l’ɔtɛ a dui ɔnɛ: “Onde sho koka nongamɛ dia monga la dikongɛ di’awui wa falanga diele la losembwe?”

•   Ndjala ya kasha. “Mbo ya ndɛ yayoyala efula la nkɛtɛ.” (Osambo 72:16) Dia mbeya woho wayoyashikikɛ Nzambi dia minya ndjala, adia sawo diele l’ɔtɛ a dui ɔnɛ: “Plus jamais la faim dans le monde?” (Ndjala hatonga nto lanɛ la nkɛtɛ.)

 Onde Bible koka nkimanyiya ase dawo ɛlɔ kɛnɛ?

 Eelo. Laadiko wa tɔ mbisha ase dawo elongamelo k’oshika kendana la nshi yayaye, Bible koka tokimanyiya dia ndɔshana l’ekakatanu wahomana la so ɛlɔ kɛnɛ.

 Tɔndɔ dia lo Bible: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu.”​—Filipɛ 4:6, 7.

 Kɛnɛ kalembetshiya dui sɔ: Lɔmba Nzambi ki ka lo yimba ndo ka l’otema la ntondo k’okakatanu tshɛ wakokayɛ mpomana la wɔ. Enda sawo diata ɔnɛ: “Philippiens 4:6, 7​—‘Ne vous inquiétez de rien.’”