Mu February 24, 2022, basikalumamba bakucisi ca Russia bakanjila mu Ukraine, akutalisya mapenzi aataambiki calo cakapa kuti bantu banji baccije mucisi cabo. a

 “Mabbomba akali kubboloka koonse-koonse. Cakali kuyoosya kapati cakuti cilandaalila akupandulula. Notwakamvwa kuti kuli zitima zinyamuna bantu baccija nkondo, twakayeeya kunyamuka mpoonya-mpoonya. Twakazisiya zintu zyesu zyoonse akaambo kakuti aumwi wakeelede kunyamuna buyo kabbeeke komwe. Aboobo twakabweza buyo mapepa aayandika, misamu, maanzi alimwi atwakulya tusyoonto. Twakazisiya zintu zimbi zyoonse akubalikila kucitisyini cacitima kumwi mabbomba kaabboloka.”—Ba Nataliia, baku Kharkiv, Ukraine.

 “Tiitwakali kuyeeyela naaceya kuti inga kwabuka nkondo. Ndakatalika kumvwa kubboloka kwamabbomba kumasena aamwi aadolopo, alimwi mawindo aaŋanda yesu akali kuzungaana. Ndakanyamuka akubwezelezya buyo tuntu tusyoonto twakali kuyandika. Ndakazwa aŋanda kuma 8hrs kuseeni akutanta citima icakali kuunka ku Lviv, mpoonya ndakaakutanta bbaasi yakanditola ku Poland.”—Ba Nadija, baku Kharkiv, Ukraine.

Mucibalo eeci tulalanga-langa makani aatobela

•  Ncinzi cini capa kuti bantu basiye maanda aabo akuba bazangalisi?

•  Nkookuli bazangalisi nkobakonzya kujana bulangizi?

•  Sena Bbaibbele lilakonzya kubagwasya bazangalisi mazuba aano?

 Ncinzi cini capa kuti bantu basiye maanda aabo akuba bazangalisi?

 Bantu bakaccija mu Ukraine akaambo kankondo njobakatalisya basikalumamba baku Russia. Nokuba boobo, Bbaibbele lilaamba cini cipa kuti kube mapenzi aali boobu:

•   Mfwulumende zyabantu nyika yoonse zyaalilwa kupa bantu zintu nzyobayandika. Aabo bali mubweendelezi kanji-kanji babelesya nguzu zyabo kudyaaminina akupenzya bantu.—Mukambausi 4:1; 8:9.

•   Saatani Diabolosi, “mweendelezi wanyika,” ulabayunga kapati bantu cakuti Bbaibbele lyaamba kuti: “Nyika yoonse ili mumaanza aamubi.”—Johane 14:30; 1 Johane 5:19.

•   Kunze aamapenzi ngobali kulwana bantu kwamyaka minji, lino tupona muciindi Bbaibbele ncolyaamba kuti: “Mazuba aamamanino.” Kunze lyaboobo lyaamba kuti aciindi eeci “kuyooba ziindi zikatazya ncobeni.” (2 Timoteyo 3:1) Kuyungizya waawo, lyaamba kuti mazuba aaya anoozwide zintu zipa kuti bantu basiye maanda aabo, mbuli nkondo, ntenda zilicitikila, nzala, alimwi azilwazi.—Luka 21:10, 11.

 Nkookuli bazangalisi nkobakonzya kujana bulangizi?

 Bbaibbele liyubununa kuti Mulengi wesu Jehova, b ulabayanda kapati alimwi ulabeetelela bazangalisi abantu ibasiya maanda aabo. (Deuteronomo 10:18) Wasyomezya kumana mapenzi aabo kubelesya mfwulumende yakwe yakujulu, yiitwa kuti Bwami bwa Leza, yalo iiyoonjila mubusena bwamfwulumende zyabantu. (Daniele 2:44; Matayo 6:10) Jehova uyoobelesya Bwami bwakwe kunyonyoona Saatani Diabolosi. (Baroma 16:20) Bwami oobu buyakweendelezya nyika yoonse, akumana mapenzi aaboola akaambo kakwiindana zisi. Bantu boonse bayooba mukwasyi omwe uukamantene. Alimwi kunyina naba omwe uuyakusiya munzi wakwe alimwi, nkaambo Bbaibbele lisyomezya kuti: “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya, nkaambo majwi aaya azwa kumulomo wa Jehova wamakamu.”—Mika 4:4.

 Bulikke Bwami bwa Leza mbobukonzya kwaamana cakumaninina mapenzi aapa bantu kusiya maanda aabo. Jehova uyoobelesya Bwami bwakwe kugusya mapenzi aapa kuti bantu babe bazangalisi. Mucikozyanyo, amubone ncayoocita:

•   Nkondo. “[Jehova] ulamanizya nkondo.” (Intembauzyo 46:9) Kutegwa muzyibe Leza mbwayoocita oobo, amubale cibalo cakuti “Luumuno Anyika—Ino Luyooboola Buti?”

•   Kudyaamininwa alimwi ankondo. “[Jehova] uyoobavwuna kukudyaamininwa akunkondo.” (Intembauzyo 72:14) Kutegwa mumvwisye bantu mbobakonzya kusiya tumpenda tubyaabi ntobakajisi kwamyaka minji, amubale zibalo zijisi mutwe wakuti “Kumana Penzi Lyakusulaikana.”

•   Bucete. “[Jehova] uyoovwuna mucete uukwiilila lugwasyo.” (Intembauzyo 72:12) Kutegwa mubone Leza mbwayoomana mapenzi aaleta bucete, amubale cibalo cakuti “Sena Cilakonzyeka Kubantu Boonse Kuba Azintu Nzyobayandika?”

•   Nzala. “Kuyooba maila manji anyika.” (Intembauzyo 72:16) Kutegwa mubone Leza mbwayoopa kuti bantu boonse babe acakulya cikkwene, amubale cibalo cili mucikuwa cakuti “A World Without Hunger?”

 Sena Bbaibbele lilakonzya kubagwasya bazangalisi mazuba aano?

 Inzya. Kunze lyakubapa bulangizi bwakumbele bubotu, Bbaibbele lilakonzya kubagwasya bazangalisi noliba lino.

 Njiisyo yamu Bbaibbele: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu.”—Bafilipi 4:6, 7.

 Bupanduluzi: Kufwumbwa mubukkale momukonzya kulijana, amumulombe Leza kuti amupe luumuno lwamumizeezo. Amubale cibalo cakuti “Bafilipi 4:6, 7—‘Mutalibiliki Acintu Nociba Comwe.’”