Ua haamata te nuu Rusia i te haru ia Ukraine i te 24 no Fepuare 2022, horo ê atura e rave rahi taata i to ratou fenua. a

 “Ua tupitahia te fenua. Mea fifi ia faataa i te mau tupuraa riaria mau itehia. I to matou iteraa e ua faaineinehia te mau pereoo auahi no te horo ê, faaoti atura matou i te faarue i te fenua e to matou oraraa taatoa. Ua rave noa matou i ta matou mau papie, raau, te pape e te tahi mau amuamuraa. A faaroo ai i te painaraa o te mau tupita ua haere matou i te vahi tapearaa pereoo auahi.”—Nataliia no Kharkiv i Ukraine.

 “Aita matou i manaˈo aˈe e e tupu iho â te tamaˈi. Ua faaroo vau i te painaraa i te tahi mau tuhaa o te oire e ua rûrû atoa i te mau haamaramarama. I te hora 8 i te poipoi, faarue atura vau i toˈu fare ma te rave noa i te mea faufaa mau. Ua rave au i te hoê pereoo auahi no te haere i Lviv e i muri iho i te hoê pereoo mataeinaa no te haere i Poronia.”—Nadija no Kharviv i Ukraine.

I roto i teie tumu parau

•  Eaha te mau tumu mau o te turai i te taata ia horo ê?

•  Ihea te feia horo ê e imi ai i te ravea?

•  E nehenehe anei te Bibilia e tauturu i te feia horo ê i teie mahana?

 Eaha te mau tumu mau o te turai i te taata ia horo ê?

 Ua tupu te ati i Ukraine no te rahi o te taata tei horo ê i te nuu Rusia. Te faaite nei râ te Bibilia, eaha te mau tumu mau o taua ati ra:

•   Aita te mau tia faatere na te ao nei i nehenehe e horoa i te taata i ta ratou e hinaaro mau ra. Pinepine te mau faatereraa i te faaohipa i to ratou mana no te haavî i te nunaa.—Koheleta 4:1; 8:9.

•   Te turai ra o Satani te Diabolo, oia hoi “te arii o teie nei ao,” i te taata ia rave i te ino. Te parau ra hoi te Bibilia: “Te vai nei râ to te ao atoa i raro aˈe i te mana o te varua ino.”—Ioane 14:30; Ioane 1, 5:19.

•   Hau atu i te mau fifi ta te huitaata i ite a hanere matahiti i teie nei, te ora ra tatou i ta te Bibilia i tohu, a na ô ai: “Ia ite râ oe e ia tae i te mau mahana hopea, e tau ino mau ïa e te fifi ia faaruru.” (Timoteo 2, 3:1) Te faaite atoa ra te Bibilia e e itehia i to tatou anotau i te mau tamaˈi, ati natura, oˈe e maˈi pee. E mau tupuraa hoi o te turai i te taata ia horo ê i to ratou fenua.—Luka 21:10, 11.

 Ihea te feia horo ê e imi ai i te ravea?

 Te parau ra te Bibilia, o Iehova b to tatou Atua poiete e te faaite ra o ˈna i te here e te aumihi i te feia atoa tei horo ê i to ratou fenua e fare. (Deuteronomi 10:18) Ua fafau o ˈna e e faaafarohia i te mau fifi o te feia tei horo ê na roto i ta ˈna faatereraa i te raˈi, oia hoi te Faatereraa arii a te Atua, o te mono i te mau faatereraa taata atoa. (Daniela 2:44; Mataio 6:10) E faaohipa Iehova i ta ˈna Faatereraa arii no te haamou ia Satani te Diabolo. (Roma 16:20) Hoê noa ïa Faatereraa na te ao nei a ore atu ai te mau amahamaharaa i rotopu i te mau nunaa. E riro te huitaata ei utuafare tahoêhia na te ao nei. Aita te taata e horo ê faahou i to ˈna fare no te mea te fafau ra te Bibilia: “E parahi ratou tataitahi i raro aˈe i ta ratou tumu vine e ta ratou tumu suke, e eita hoê e faariaria ia ratou, na te vaha hoi o Iehova o te mau nuu i parau.”—Mika 4:4.

 E faaohipa Iehova i ta ˈna Faatereraa arii no te faaore roa i te mau fifi o te turai i te taata ia horo ê i to ratou fenua. O tera Faatereraa arii anaˈe te ravea i mua i taua mau fifi ra. Eaha ïa ta Iehova e rave:

•   Te tamaˈi. “Te faaore nei [Iehova] i te mau tamaˈi.” (Salamo 46:9) No te ite nafea te Atua e faaore ai i te tamaˈi, a taio i te tumu parau “La paix dans le monde: Comment sera-t-elle établie?”

•   Te haavîraa e te hamani-ino-raa. “E faaora [Iehova] ia ratou i te haavîraa e te hamani-ino-raa.” (Salamo 72:14) No te ite nafea te taata e nehenehe ai e taui i ta ratou mau peu ino, a taio i te anairaa tumu parau “E nafea ia haapae roa i te riri?”

•   Te veve. “E faaora hoi [Iehova] i te taata veve o te hinaaro ra i te tauturu.” (Salamo 72:12) No te ite nafea te Atua e faaore ai i te veve, a taio i te tumu parau “Peut-on espérer un système économique plus juste?”

•   Te ereraa i te maa. “E rahi te huero maa i nia i te fenua.” (Salamo 72:16) No te ite nafea te Atua e faaore ai i te oˈe, a taio i te tumu parau “Plus jamais la faim dans le monde?”

 E nehenehe anei te Bibilia e tauturu i te feia horo ê i teie mahana?

 E. Hau atu i te horoa i te hoê tiaturiraa papu no a muri aˈe, te tauturu nei te Bibilia i te taata ia faaruru i te mau fifi ta ratou e ite nei.

 Aratairaa Bibilia: “Eiaha ïa e haapeapea noa ˈˈe, na roto râ i te pure e te taparuparuraa e te haamaitairaa, a faaite i ta outou mau aniraa i te Atua. E na te hau o te Atua, tei hau ê i te mau manaˈo atoa, e tiai i to outou aau e feruriraa.”—Philipi 4:6, 7.

 Te auraa: A ani i te Atua i te hau o roto i mua i te mau fifi atoa ta oe e faaruru. A hiˈo i te tumu parau “Phillipiens 4:6, 7: ‘Ne vous inquiétez de rien.’”