ᲙᲣᲠᲪᲮᲐᲡ ᲠᲓᲐᲗ!
ლტოლვილობა —უკრაინას მილიონობით ადამიან იტენს
2022 წანაშ 24 ფრევალს რუსეთიშ ჯარქ უკრაინაშა გემშეჭკირ, მუდგაქ ხალხ სერიოზულ საფრთხეშ თუდო ქიგიორინუ. თინეფ ოცადნა, მუთ შილებე მალას ქიდიტუან ქიანა. a
„თექ ბომბუა მიშჷ. ნინათ ვემაჭარე, მუ საშინელ სიტუაცია რდჷ. მუჟამსით ქიგებგით, ნამდა ხალხიშ გიშაჸუნაფალო მატარებელ რდჷ გერნაფილ, ულა გინობჭყვიდით. ხვალე ართ ჩანთაშ ღალა შემლებდეს; მთელ სქან ცხოვრება ართ ჭიჭე რუგზაკის ოკო ქენანტირნეკო, ათეშენ ხვალე საბუთეფიშ, წამალეფიშ, წყარიშ დო ჭიჭე გურიშდამარგებელიშ ღალაქ შემალებუეს. შხვა ირფელ ქიდიბტეთ დო ბომბეფ ცენდუნ თეშ მიდაფრთით მატარებელიშ სადგურშა“ (ნატალია, ხარკოვ, უკრაინა).
„ბოლო წუთშახ ბჯერდეს, ნამდა ომ ვეჸუაფუდ. ქალაქიშ შხვადოშხვა კუნთხუშე აფეთქებეფიშ ხონარ მარჩქილედეს დო აკოშკეფ იზარზალუდ. გეგნობჭყვიდ მიდამრთუმუდკო დო ხვალე აუცილებერ მუდგარენეფ მიდებღკო. ოჭმარეშ 8:00-ის გეგნოფრთჷ ჸუდეშე, მატარებელით ლვოვშა მიდაფრთჷ დო თევრეშე ავტობუსით პოლონეთშა გინიბლჷ“ (ნადია, ხარკოვ, უკრაინა).
თე სტატიას:
მუ რე თე ლტოლვილობაშ ნამდვილ მიზეზეფ?
უკრაინას თე ლტოლვილობაშ დოჭყაფაშ მიზეზიქ რუსეთიშ ჯარიშ მიშაჭკირუაქ იჸუ. მარა ბიბლია შხვა, უმოს ტომბა მიზეზეფს მირაგადნა:
ადამიანურ მთავრობეფს ვეშულებნა დაკმაყოფილან ხალხიშ საჭიროებეფ. მთავრობაშ წარმომადგენელეფ მუნეფიშ ძალაუფლებას უმენტაშო შხვეფიშ დაჩაგრებელო ირინუანა (ეკლესიასტე 4:1; 8:9).
სატანა ეშმაკის, ნამუთ „ქვეყნიერებაშ მართველ“ რე, თიცალ გლახა გავლენა უღჷ მთელ მსოფლიოშა, ნამდა ბიბლია იჩიებ: „მთელ ქვეყნიერება უბადოშ ხეს რე“ (იოანე 14:30; 1 იოანე 5:19).
თი პრობლემეფს, ნამდგას ადამიანეფ საუკუნეეფ რე ობრძოლნა, ხოლო შხვეფქ ქიგიაძინ, მუშენდა ფცხოვრენთ პერიოდის, ნამდგაშ გურშენ ბიბლიურ წინასწარმეტყველება იჩიებ: „ბოლო დღალეფს ძნელო გარზებელ დრო დოდირთუ“ (2 ტიმოთე 3:1). თეწკუმა ართო, თე პერიოდის იჸუაფუდ ომეფ, სტიქიურ უბედრობეფ, შქირენა დო ეპიდემიეფ — მოვლენეფ, ნამუთ ადამიანეფს ქუდატებაფუანდჷ ჸუდეეფს (ლუკა 21:10, 11).
სო შეულებნა ლტოლვილეფს იმენდიშ მეღება?
ბიბლია იჩიებ, ნამდა ჩქინ გუმაჭყაფალს, იეჰოვას, b უჸორს დო გურშა მეუღ ლტოლვილეფიშ დო თინეფიშ გაჭირება, მიდგას ჸუდეეფქ აჸუეს დატებელქ (კანონი 10:18). თინა მოპირნა, ნამდა ზეციერ მთავრობაშ, ღორონთიშ სამეფოშ, საშვალებათ მოსპუნს ლტოლვილეფიშ პრობლემეფს. თე სამეფო დოთირანს ადამიანურ მთავრობეფს (დანიელი 2:44; მათე 6:10). იეჰოვა მუშ სამეფოს გეგმირინუანს, ნამდა განადგურას სატანა ეშმაკ (რომაელები 16:20). თე სამეფო მთელ მსოფლიოს იმართველენს დო თიშ ჭყოლოფათ მეტო ვეჸუაფ სახელმწიფო საზღვარეფ. არძა ადამიან გაერთიანებულ იჸუაფ ართ დიდ ოჯახის. მითინს ვაჸი ჸუდეშე ონტებელ, მუშენდა ბიბლია მოპირნა: „თითოულ მუშ ბინეხიშ დო ლუღიშ თუდო გითოხედას იჸი დო მითინ ვა დაშქურინუანს თინეფს, მუშენდა ლაშქარეფიშ ღორონთ, იეჰოვა, იჩიებ თეს“ (მიქა 4:4).
ხვალე ღორონთიშ სამეფოს შეულებ ლტოლვილობაშე საბოლა საშველიშ მოღალა. იეჰოვა გეგმირინუანს მუშ სამეფოს, ნამდა მოსპას თი პრობლემეფ, მუდგაშ გურშენ ხალხის ჸუდეეფ აფჷ დატებელ. მაგალთო:
ომეფ. „[იეჰოვა] მოსპუნს ომეფს“ (ფსალმუნი 46:9). თიშ გაგებელო, მუჭო გაკეთენს ღორონთ თეს, წეკითხით სტატია: „მუჭო დოდირთუ მშვიდობა დედამიწას?“ [ქორთ.].
დაჩაგრება დო ძალადობა. „დაჩაგრება დო ძალადობაშე ირსხენს თინეფს“ (ფსალმუნი 72:14). თიშ გაგებელო, მუჭო შეულებ ხალხის ჩეთხინუას თეცალ საქციელ, წეკითხით სტატიეფიშ სერია: „გიორჯგინით გოჯოგაფას!“ [ქორთ.].
სიღარიბე. „[იეჰოვა] დერსხენს ღარიბის, ნამუთ მოხვარას ითხინს“ (ფსალმუნი 72:12). თიშ გაგებელო, მუჭო მოსპუნს ღორონთ სიღარიბეშ მიზეზეფს, წეკითხით სტატია: „ქიჸუაფუნო დღას ეკონომიკურ თანასწორობა?“ [ქორთ.].
შქირენა. „ხვეიანო იჸუაფ მარცვლეულ დედამიწას“ (ფსალმუნი 72:16). თიშ გაგებელო, მუს გაკეთენს ღორონთ, ნამდა მითინ ვა რდას შქირენულ, წეკითხით სტატია: „მილიარდ ადამიანშა ოჭკუმალით დაკმაყოფილებაშ მცდელობა“ [ქორთ.].
შეულებნო ბიბლიას ამდღა ლტოლვილეფიშ მოხვარა?
ქო. ბიბლია ლტოლვილეფს მომავალიშ იმენდის არზენს. თეწკუმა ართო, ოხვარ თინეფს, გიორჯგინან თი პრობლემეფს, ნამდგას ამდღა ხვადუნა.
ბიბლიურ პრინციპ: „გამოუცდელს არძა სიტყვაშ ჯერს, მარა გურგოჩამილ ოკვირ მუშ ნაბიჯეფს“ (იგავები 14:15).
მუს ნიშნენს თე სიტყვეფ: დეფიქრით, მუ ოშქურანჯ სიტუაციეფს შილებე ინოლათ დო მუჭო შეგალებენა დუდიშ თხილუა. კურცხას რდათ, ნამდა დუდ ეუჩილითუათ თი კათას, მით ოცადნა, ახალ ტერიტორიას ლტოლვილეფიშ გლახა მდგომარეობა უბადოთ გეგმირინუან.
ბიბლიურ პრინციპ: „ოჭკუმალ, მიკაქუნალ დო დუდიშ გითაფორაფალ ქომღუნან-და, თეს გებჯერდათ“ (1 ტიმოთე 6:8).
მუს ნიშნენს თე სიტყვეფ: მთავარ ყურადღება მატერიალურ ნივთეფშა ვეგნიღათ. აუცილებერს ქიგეჯერდუთ-და, უმოს ბედნერ იჸუაფუთ.
ბიბლიურ პრინციპ: „ათეშენ ირფელს, მუჭოთ თქვა გოკონა, ნამდა შხვეფქ მიგექცუან, თქვა ხოლო თეშ ქიმექცით თინეფს“ (მათე 7:12).
მუს ნიშნენს თე სიტყვეფ: რდათ მომთმენეფ დო კეთილეფ. თე თვისებეფიშ გიმორჩქინა მიგეხვარებნა, დემსახურათ შხვეფშე პატიცემა დო თინეფ უმოს ადვილო მეიღენა.
ბიბლიურ პრინციპ: „მითინს ვეგნუგათ მანგიორ“ (რომაელები 12:17).
მუს ნიშნენს თე სიტყვეფ: გურიშმოულას ვემეჩათ საშვალება, მანგიორ გეგნგოგაფუან. თენა ხოლო უმოსო გაუფრაშენს სიტუაციას.
ბიბლიურ პრინციპ: „ირფელიშ კეთებაშ ძალა მიღჷ ჩქიმ გუმამანგარებელიშ მოხვარათ“ (ფილიპელები 4:13).
მუს ნიშნენს თე სიტყვეფ: ღორონთის თქვან ცხოვრებას მნიშვნელოვან ადგილ დუთმით დო ქუდურაგადეთ თის ლოცვათ. თინა ქიმერჩანა გარზებელ ძალას.
ბიბლიურ პრინციპ: „მუთუნშე ვედიჭყათ წუხება, არძა თქვან ოთხუალ ლოცვას ქუწით ღორონთის, ქეხვეწით დო მარდულობათ ქუდურაგადეთ, დო ღორონთიშ მშვიდობა, ნამუთ ნებისმიერ აზრშე უმოს რე, დეცვენს თქვან გურს დო გონებას ქრისტე იესოშ საშვალებათ“ (ფილიპელები 4:6, 7).
მუს ნიშნენს თე სიტყვეფ: მუდგა მდგომარეობას ვა მოხვადათინ, ქოთხით ღორონთის შინაგან სიმშვიდე. ქოძირით სტატია «ფილიპელები 4:6 7 — „მუთუნშე ვედიჭყათ წუხება“» [ქორთ.].
a რუსეთიშ უკრაინაშა მიშაჭკირუაშ მაჟია დღას გაეროშ ლტოლვილეფიშ უმაღლეს კომისარიატიქ (UNHCR) უკრაინაშ კრიზისის უმაღლეს დონეშ საგანგებო მდგომარეობაშ სტატუს ქიმეჩ. 12 დღაშა ჟირ მილიონშე მეტ ადამიანს აჸუ დატებელქ უკრაინაქ დო ონტებელქ მეზობელ ქიანეფშა. თეს გეძინელ, მილიონ ადამიანს ქიანაშ შხვა კუნთხუშა აჸუ გინაულარქ.
b იეჰოვა რე ღორონთიშ სახელ (ფსალმუნი 83:18). ქოძირით სტატია „მი რე იეჰოვა?“.
შილებე თექ ხოლო მიგეწონან
ᲙᲣᲠᲪᲮᲐᲡ ᲠᲓᲐᲗ!
რუსეთიქ უკრაინაშა გემშეჭკირ—ისრულებნო თეთ ბიბლიურ წინასწარმეტყველება?
თაშ ქორენ-და, ქიჩიებნო ბიბლია, მუჭო ითებუ თე ირფელ?
ძირითად ბიბლიურ გურაფეფ
მუ რე ღორონთიშ სამეფო?
მსახურებაშ დროს, იესო დიდ ყურადღებას ამახვილენდჷ ღორონთიშ სამეფოშე. საუკუნეეფიშ დინახალე, ხალხ სამეფოშ მოულაშ გურშენ ლოცულენდჷ.
