Russia atona ka rimo na vura ku vuru Ukraine rogo Wegebe 24, 2022. Gere asa amirioni aboro i du rogo kere kpakarapai na i kini asadi ka kura rogo ringara kusayo niipo. a

 “I azumuda kikindigi abundu agu akuraha kini sumbu. Si aima du ni pa gunde nikerehe nga gu mi ainongo wai ka mi fura tipaha ya. Ho ani aini gupai ni nga gatara adu kinaho naatinda aboro, ani adiberã nibasa ka kura. Ani ambu ahe dunduko ki rogo kina wiri bete ahe gbua kurogo gu mangu aboro abaha giiyo yo. Ani adi kina gaani nyanyakipaha awaraga, adawa, ime na gu wirihe ka boro rihe. Ani ambu ahe dunduko na ki ndu ku ba gatara yo wa kikindigi bundu aasumbo pati rani.”—Nataliia naraka Kharkiv, Ukraine yo.

 “Da kuti gu regbo re, ani aaberãnga gupai nga vura ho nika du te. Mi aagia woro bundu ku rogo gu kura apapara gbata na gimi bangiri bambu kini zigizo. Mi adiaberã ka kura na ki rogo kina agu ahe du na nyanyakipaha. Mi akuru ti ndu uru 8:00 nga ga wiso na ki di gatara nga gu naadu ku Lviv yo, na ki di tarambiri ku Poland yo.”—Nadija, naraka Kharkiv, Ukraine yo.

Rogo gi kekapai re

•  Ginipai du nzunzu ye na gi kpakarapai re fu aboro?

•  Wari rengbe agi aboro naora rogo gayo aringara kusayo re ka gbia maabangirise ni?

•  Ya mo Baibiri rengbe ka undo agu aboro naora rogo gayo ringara kusayo areme?

 Ginipai du nzunzu ye na gi kpakarapai re fu aboro?

 Gu kpakarapai nga ga ora aboro Ukraine kusayo rogo gayo ringara atona mbiko gu zubohe nga ga agu abanzengere nga ga Russia yo. Ono tie, Baibiri nayugo gu kura nyanyaki ndupai nga gu nasa gi kpakarapai nga ga aboro naora kusayo rogo gayo ringara re:

•   Gu zogarago nga ga awiri aboro rogo zegino dunduko na rengba ka manga gupai aboro aidaha te. Irangbii namangasunge dedede na gayo pagbia kadu na ome kurii aboro na kini mangi fuyo gbegberẽ.—Batungusipai 4:1; 8:9.

•   Satana Bakitingbanga, nga ‘bazogo zegino,’ na gbegberẽ maapai kurii aboro, si nga gupai Baibiri ayugo gupai ti ni nga: “Zegino dunduko du ni zogozogo ho be gbegberẽ ko.”—Yoane 14:30; 1 Yoane 5:19.

•   Kurii gu kpakarapai wiri aboro aima digo ni gbiatiyo na ni tipa dungu akama agarã, ani naraka awere ti gu regbo Baibiri aima fura tipaha kumbatayo nga: “Rogo kusa rago gbegberẽ rago aye.” (2 Timoteo 3:1) Gu susi berewe nga, si adu nga gi regbo re nika du na avura, gberãngo, angbongi, gbiati riri akaza—nga agu apai nasa aboro i nioro kusayo rogo gayo akporo—Ruka 21:10, 11.

 Wari rengbe agi aboro naora rogo gayo aringara kusayo re ka gbia maabangirise ni?

 Baibiri nayugo gupai nga Bakusirani nga Yekova, b nga gu Mbori du na nyemuse gbiati nunga koyo du agu aboro ni naora rogo gayo aringara kusayo gbiati aguyo zubo kusayo rogo gayo akporo. (Pa Fu Rugute ni Ue he 10:18) Ko nakidohe ka nyasariipa gu kpakarapai nga ga agu aboro naora kusayo rogo gayo aringara vurube gako zogarago du ngbangbaturũ yo, i ayambaha nga ga Mbori Kindo, nga gu nika diaba gu zogarago nga ga aboro. (Daniere 2:44; Matayo 6:10) Yekova nika mangasunge na gako Kindo ka dia Satana Bakitingbanga kusayo. (ARomo 16:20) Gu Kindo re nika ngia gu zogarago nika du rogo zegino dunduko, si nika nyasariipa gu kparakaro naye mbiko ngbanda arago nga ga aringara. Aboro dunduko nika du ni aborokporo sa rogo zegino dunduko. Boro ho berewe si nika ida ni zubo kusayo kpuni te, bambiko Baibiri nakidohe nga: “Aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te; bambiko ngba Yekova nga ga arimbasa ko gumba ha.”—Mika 4:4.

 Kina ga Mbori kindo sa rengbe ka ye na nyenye ziga kuti gu kpakarapai aboro agbiatiyo areme na ni nga ga ora kusayo rogo gayo aringara. Yekova nika mangasunge na gako Kindo ka dia agu akpakarapai nasa aboro i nioro kusayo rogo gayo aringara. Mo bingo bete akpiapai:

•   Avura. “[Yekova] namanga pai, vura nyasi digida kpotosende yo.” (Atambuahe 46:9) Tipa ka ino wai Mbori nika nyasa riipa avura, mo gedi gu kekeapai nga “Wai du Zereda Nika ye ku Auru Kpotosende?”

•   Iraira mangapai na zuu. “Ko natumo ungayo be bau pai na zuu; kureyo ki du ni kikiipa he bangiriko.” (Atambuahe 72:14) Tipa ka rugatise na pa wai rengbe aboro ka aria agu asino naima zio baha ti boro tipa gbanga regbo, mo gedi gu kekeapai nga “Wai Ka Diabe Sogote.”

•   Zingo. “[Yekova] nabatasa irazingo ahe ho ni nakpara ni ku ari.” (Atambuahe 72:12) Tipa ka bi wai Mbori nika mangapai kuti gupai naye na zingo, mo gedi gu kekeapai nga “Is a Fair Economic System Possible?”

•   Zingo riahe. “Zende ahe zúku rogo ringara kpaima.” (Atambuahe 72:16) Tipa ka bi wai Mbori nika mangapai tipa ka sa gupai nga ka boro du nga na gomoro ya, mo gedi gu kekeapai nga “A World Without Hunger?”

 Ya mo Baibiri rengbe ka undo agu boro naora rogo gayo ringara kusayo areme?

 Gu rengo duho nga, ku pati gupai nga ga fu ndikidi maabangirise fu agu aboro naora kusayo rogo gayo aringara, Baibiri ima rengba ka undo yo tipa i mangipai kuti agu akpakarapai i gbiatiyo na ni awere.

 Bangua rengo nga ga Baibiri: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã.”—AFiripoio 4:6, 7.

 Gupai si ayugoho: Mo sana Mbori tipa gu zereda nga ga berãse na kpotose yo rogo agu apai dunduko mo agbia tiro na ni. Mo bi gu kekeapai nga “Philippians 4:6, 7—‘Do Not Be Anxious About Anything.’”