Afuɛ 2022 Ɔktɔblu i le 10 su m’ɔ ti Kisie cɛn’n i nglɛmun nun’n, Risi’m be toli bɔnbu wie mun yili Ikrɛnin lɔ. Be waan Ikrɛninfuɛ’m be toli bɔnbu kun fa sacili pɔn ng’ɔ o Krime nin Risi be afiɛn’n nun. Kɛ politikifuɛ wie’m be seli kɛ Aamagedɔn kwla ju koko wa’n w’a cɛman yɛ sa sɔ’m be juli-ɔ.

•   Afuɛ 2022 Ɔktɔblu i le 6 su’n, Jo Baidɛnin m’ɔ ti Etazinin plezidan’n seli kɛ: “Kɛ ɔ fɛ i blɛ mɔ plezidan Kenedi nin Kibafuɛ’m be waan bé tótó be wun bɔnbu’n lele andɛ’n, Aamagedɔn nin-a mantanman koko kɛ nga sa le. Ɔ maan Aamagedɔn nunman mmua kun. […]. N bu i kɛ sɛ be fa bɔnbu tɛtɛ sɔ’m be kun alɛ’n saan Aamagedɔn alɛ’n jú.”

•   Afuɛ 2022 Ɔktɔblu i le 8 su’n, zronali kun m’ɔ suan BBC News usali Ikrɛnin plezidan Volodimii Zelɛnsiki kɛ, kɛ be fa bɔnbu tɛtɛ’m be kun alɛ’n sa benin yɛ ɔ kwla ju-ɔ. Ɔ tɛli su kɛ: “Sɛ be fa bɔnbu tɛtɛ sɔ mun kun alɛ’n Aamagedɔn jú. Asiɛ’n wunmuan’n kwla nunnun.”

 ?Sɛ be fa bɔnbu tɛtɛ sɔ’m be kun alɛ’n Aamagedɔn alɛ’n jú? ?I su ndɛ benin yɛ Biblu’n kan-ɔn?

 Cɛcɛ. Ndɛ mma “Aamagedɔn” o Biblu’n nun kpɛ kunngba cɛ. Ɔ o Sa Nglo Yilɛ 16:16 nun. Ndɛ mma sɔ’n kanman alɛ nga nvle’m be nin be wiengu mun be kun’n i ndɛ. Ɔ kan alɛ nga Ɲanmiɛn nin “famiɛn nga be o asiɛ wunmuan’n su’n” bé kún’n i ndɛ. (Sa Nglo Yilɛ 16:14) Aamagedɔn alɛ’n nun’n Ɲanmiɛn núnnún klɔ sran’m be awa mun.—Daniɛli 2:44.

 Kɛ Aamagedɔn alɛ’n wá tɔ́’n, sa ng’ɔ́ wá jú asiɛ’n su’n sɛ a kunndɛ kɛ á sí i su ndɛ kpa ekun’n kanngan ndɛ Qu’est-ce que la bataille d’Armaguédon? nun.

 Cɛcɛ. Kannzɛ mɛn siefuɛ’m be kwla fa bɔnbu tɛtɛ sɔ’m be kun alɛ’n sanngɛ Ɲanmiɛn su kplinman su kɛ be nunnun asiɛ’n. Biblu’n se kɛ:

•   “Asiɛ’n ká lɛ tititi.”—Akunndanfuɛ’n 1:4.

•   “Asiɛ’n yó sran kpa’m be liɛ, yɛ bé trán su tititi.”—Jue Mun 37:29.

 Sannge kusu, ndɛ nga Biblu’n kannin’n nin sa nga be ju dɔ nga su’n be kle kɛ ɔ cɛ kan’n sa cinnjin wie’m bé wá jú asiɛ’n su. (Matie 24:3-7; 2 Timote 3:1-5) Sɛ a kunndɛ kɛ á sí e ɲrun lɔ sa’m be su ndɛ nga Biblu’n kan’n, wafa nga e kle sran’m be Biblu’n nun like’n kwla uka-ɔ. Be tuɛmɛn i ti sika.