Kà lèlà boo lọ̀ọ̀leè Monday, October 10, 2022, pá Russia beè tã́ kele-kele bèm náa nvee gbò pọ̀b bon ea di Ukraine bàà dee aa ló deé e pá Ukraine beè tã́ pọ̀b náa kyọ̀ọ̀mà káà múú ea di gbà-gbá Crimea nè Russia. Gbò nuí beè naaá pọ́ì ńkem̀ tṍó aa ló tṍó e gbò bìlà bẹbẹ̀l beè ãane gbò nen kọọ̀ èé beè gé láá kpeesĩ́ ló tã̀àgã̀ e baala kólíe Àmágidòn.

•   “Lọl tã́gíní tṍó e John F Kennedy ea géè bẹ̀l U.S. beè di dí boo kpòté vaá bà tã́gã́gi bèm náa tẹlẹ Cuba a, è gáà kpáá kpeena sĩ́ ló nú ea é láá naa kọọ̀ Àmágidòn á dù. . . . Ním bulà kọọ̀ bàé láá kpáá nyimá tẽ́ gè tã́gã́gi íb gbò bèm náaí vaá Àmágidòn náa é nááá.”​—Níà bé e Joe Biden ea gé bẹl U.S. beè kọ́ ló October 6, 2022 naa ẽ́.

•   “Nda zigà kọọ̀ èé gé kpeesĩ́ ló Àmágidòn, níí é nveè tã̀àgã̀ ló zivè kà bàlà booí.”​—Níà bé e Volodymyr Zelensky ea gé bẹl Ukraine beè kọ́ naa tṍó e bà bĩináe gbò pọ́lọ́ nú ea é láá sìlà aa mm̀ ge tã́gã́gi bèm náa nvee sĩ́dee gbẹá boo BBC Niùz ló October 8, 2022 e.

 É kọọ̀ ge tã́gã́gi bèm náa nvee sĩ́dee é náa kọọ̀ Àmágidòn á naaá? Éé ní e Kpá Káí kọ́ kilma ló é?

 Ẽ́èe. Áá mm̀ kpá Kùùà 16:16 ní e moǹ bel ea kọlà Àmágidòn di mm̀ Kpá Káí é. Náa gé lóá bel nyòòmà bé ea é béá zẹ̀ẹ̀ gbò dó bàlà boo, sõò a gé lóá bel nyòòmà bé ea é béá zẹ̀ẹ̀ Bàrì nè “dénè gbò méné ea gé bẹl bàlà boo.” (Kùùà 16:14) Bàrì é tú bé gím Àmágidòn nvèèmà kùbmà ló bẹbẹ̀l gbò nen.​—Dániẹ̀l 2:44.

 Ge kpáá nó gã́bug nu ea kil ló nú e bé Àmágidòn é náá ló boo kunukẽ̀í, bugi togó bel ea kọ́ọ̀ Éé Ní Ea Dú Bé Àmágidòn Ẽ?

 Ẽ́èe. Náa kal ló béè kọọ̀ gbò nen é beè láá tã́gã́gi bèm náa dì deèsĩ́, Bàrì náa é sọtọ́ deè kọọ̀ bàá kyọ̀sĩ́ boo kunukẽ̀í. Kpá Káí kọ́ọ̀:

•   “Boo kunukẽ̀í dì dọ̀ọ̀mà dè-dè.”​—Ẹ̀klìzíástìs 1:4.

•   Gbò lé lab dògò ní e bàé tõó boo kunukẽ̀í ẽ́, vaá bàé tõó boo dọ̀ọ̀mà dè-dè.”​—Psalm 37:29.

 Kọ̀láá bé ea dì naa, gbò kọ́ọ̀ bùlà Bàrì ea di mm̀ Kpá Káí nè gbò nú ea gé nááá zógè kọọ̀ e dũuà iná kuló tṍó e pọ̀bkà nyààa ea gáà naaá tọ́ọ̀ tóm é gé bã ló boo kunukẽ̀í. (Máátìù 24:​3-7; 2 Tímotì 3:​1-5) Gbĩ́tẽ́ ló gbò nú e Kpá Káí kọ́ ea kil ló dì deèsĩ́ tení dú ló bẹẹ kpá gè zọ̀ọ̀mà nen noá Kpá Káí e née ólò tú kpègè ló.